កាលពីរសៀលថ្ងៃទី១៣ ខែមិថុនា ឆ្នាំ២០២៣ នៅបញ្ជាការដ្ឋានយោធភូមិភាគទី៤ ឯកឧត្តម ឧត្តមសេនីយ៍ឯក ពៅ ហេង អញ្ជើញចូលរួមក្នុងកិច្ចប្រជុំពិភាក្សា និងចុះត្រួតពិនិត្យទីតាំងចម្ការមីន ស្ថិតនៅចន្លោះ០.៧ គីឡូម៉ែត្រពីព្រំដែនកម្ពុជា-ថៃ និង១គីឡូម៉ែត្រជុំវិញមូលដ្ឋានកងទ័ព ស្ថិតក្នុងភូមិសាស្ត្រខេត្តឧត្តរមានជ័យ និងខេត្តព្រះវិហារ ក្នុងទិសយោធភូមិភាគទី៤ ស្ថិតក្រោមអធិបតីភាពឯកឧត្តម លី ធុជ ទេសរដ្ឋមន្ត្រី ទទួលបន្ទុកបេសកកម្មពិសេសអនុប្រធានទី១ អាជ្ញាធរមីន។
ឯកឧត្តមឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ បានមានមតិស្វាគមន៍ និងលើកឡើងពីភូមិសាស្ត្រទទួលខុសត្រូវលើខ្សែបន្ទាត់ព្រំដែនរបស់ទិសយោធភូមិភាគទី៤ ដែលមាន៤ខេត្តគឺខេត្តសៀមរាប ,ឧត្តរមានជ័យ ,ព្រះវិហារ ,និងខេត្តកំពង់ធំ។ ឯកឧត្តម បន្តថា បច្ចុប្បន្នយោធភូមិភាគទី៤ យើងមានកងអនុសេនាតូចចំនួន០៤ កងដោះបំផ្លាញមីន។ ដោយឡែកកាលពីថ្ងៃទី០៧ ខែមិថុនា ឆ្នាំ២០២៣ យើងបានទទួលរថយន្តសង្គ្រោះចំនួន ២គ្រឿង និងម៉ាស៊ីនរាវមីនជម្រៅជ្រៅចំនួន ២គ្រឿង ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន តាមរយ: ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។
ឯកឧត្តម លី ធុជ ទេសចរមន្ត្រី បានមានប្រសាសន៍ថា ពិធីសំណេះសំណាលដ៏មានសារសំខាន់ៗ និងបានបង្ហាញឲ្យឃើញពីការគិតគូរយកចិត្តទុកដាក់ខ្ពស់ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចំពោះសុខទុក្ខរបស់កងកម្លាំងប្រតិបត្ដិករ បោសសម្អាតមីនរបស់យើង មិនត្រឹមតែប៉ុណ្ណោះទេសម្តេចបានលើកទឹកចិត្ត ផ្ដល់នូវកម្លាំងចិត្ត ដល់យើងទាំងអស់គ្នា ពីគ្រប់ភាគីពាក់ព័ន្ធ ឲ្យខិតខំរួមគ្នាពុះពារសម្រេចនូវបេសកកម្មជាតិ ដ៏មានសារសំខាន់ គឺការបោសសម្អាតមីន យុទ្ធភ័ណ្ឌមិនទាន់ផ្ទុះ និងពីសង្គ្រាមឲ្យអស់ពីក្រោមដី ដើម្បីធានាសុខសុវត្ថិភាព របស់ប្រជាពលរដ្ឋ និងសម្រេចគោលដៅ ជាខេត្ដដែលគ្មានមីននាពេលខាងមុខ ហើយនេះក៏ជាការផ្សព្វផ្សាយពីការចាប់ផ្ដើមអនុវត្តនូវគម្រោងរបស់សម្ដេចតេជោ សម្រាប់សកម្មភាពមីនក្រោមមូលបទ «ផ្ដល់ដីមានសុវត្ថិភាព បង្កើតស្នាមញញឹម» ក្នុងភូមិសាស្ត្ររបស់ទិសយោធភូមិភាគទី៤ និងដល់ភាគីដែលពាក់ព័ន្ធ សាធារណជន និងប្រជាពលរដ្ឋ បានជ្រាប និងចូលរួមគាំទ្រអនុវត្តផងដែរ។ ឯកឧត្តម បានបន្ថែមទៀតថា សូមប្ដេជ្ញាគាំទ្រ និងចូលរួមសហការយ៉ាងពេញទំហឹងជាមួយ កងកម្លាំងបោសសម្អាតមីនទាំង៤កង របស់យោធភូមិភាគទី៤ និងអំពាវនាវដល់ប្រជាពលរដ្ឋ ដែលរស់នៅតាមខ្សែបន្ទាត់ព្រំដែន ជាពិសេសអតីតយុទ្ធជន ដែលបានដឹង និងស្គាល់ទីតាំងកប់គ្រាប់មីន និងយុទ្ធភ័ណ្ឌមិនទាន់ផ្ទុះផ្សេងៗ សូមសហការផ្ដល់ព័ត៌មាន ពីទីតាំងទាំងនោះ ដល់អាជ្ញាធរដែនដី កងកម្លាំងបោសសម្អាតមីន ដើម្បីយើងរៀបចំផែនការ ធ្វើការបោសសម្អាត ប្រមូលយកទៅកម្ទេចចោល សំដៅធានាផ្ដល់សុវត្ថិភាព ដល់ការប្រើប្រាស់ដី និងស្នើឲ្យអាជ្ញាធរមូលដ្ឋាន គ្រប់លំដាប់ថ្នាក់ ត្រូវបង្កលក្ខណ:ងាយស្រួល និងផ្ដល់កិច្ចសហការឲ្យបានពេញលេញ ដល់កងកម្លាំងប្រតិបត្ដិករបោសសម្អាតមីន ដែលកំពុងអនុវត្ដក្រោមគម្រោង របស់សម្ដេចតេជោ សម្រាប់សកម្មភាពមីន ក្រោមមូលបទ «ផ្ដល់ដីមានសុវត្ថិភាព បង្កើតស្នាមញញឹម» ឲ្យបំពេញការងារប្រកបដោយសុវត្ថិភាព និងជោគជ័យតាមផែនការ ដែលបានគ្រោងទុក៕
អត្ថបទ និងរូបភាព: លោកបូ សាវី តែសម្រួលដោយ លីវ សុខុន!!!
