ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានអំពាវនាវឱ្យបងប្អូនប្រជាពលរដ្ឋដែលមានឈ្មោះក្នុងបញ្ជីបោះឆ្នោត សូមទៅបោះឆ្នោតជ្រើសតាំងតំណាងរាស្រ្តនីតិកាលទី៧ ដែលនឹងប្រព្រឹត្តិនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ឱ្យបានគ្រប់ៗគ្នា ដើម្បីជ្រើសរើសប្រមុខដឹកនាំប្រទេសដែលគិតពីសុខទុក្ខប្រជាជន និងបំរើប្រជាជន ឱ្យបានគ្រប់ៗគ្នា កុំជឿទៅតាមការញុះញង់របស់អ្នកណាទាំងអស់ ព្រោះនេះជាសិទ្ធិរបស់យើង និងរួមគ្នាការពារសន្តិភាព ដែលបានកសាងមកទាំងលំបាក និងការពារនូវអ្វីដែលជាសមិទ្ធផលរបស់សង្គមជាតិ ដែលបានកសាងរួមគ្នា ខណៈរាជរដ្ឋាភិបាល នឹងបន្តកសាងហេដ្ឋារចនាសម្ព័ន្ធចាំបាច់ ដើម្បីទាក់ទាញវិនិយោគិនមកបន្ថែមទៀតទាំងនៅទីក្រុងភ្នំពេញ និងតាមបណ្តាខេត្តនានា ព្រមទាំងបន្តគិតគូរពីផលប្រយោជន៍របស់កម្មករទាំងអស់ផងដែរ។
ឯកឧត្តម អ្នកឧកញ៉ា សៀង ណាំ មានប្រសាសន៍យ៉ាងដូច្នេះ ក្នុងឱកាសចុះជួបសំណេះសំណាលសួរសុខទុក្ខបងប្អូនប្រជាពលរដ្ឋចំនួន៣.៥០០នាក់នៅឃុំចំនួនពីរក្នុងស្រុកក្រឡាញ់ គឺឃុំរោងគោ និងឃុំស្រណាល កាលពីព្រឹកថ្ងៃទី១៤ ខែមិថុនា ឆ្នាំ២០២៣នេះ រួមដំណើរជាមួយឯកឧត្ដម អ៊ាន ឃុន ប្រធានក្រុមប្រឹក្សាខេត្តសៀមរាប និង លោកស្រី ម៉ននី រង្សី អភិបាលរងខេត្ត អមដំណើរដោយក្រុមការងារខេត្តចុះជួយឃុំ និង អភិបាលស្រុក ប្រធានក្រុមប្រឹក្សាស្រុក ព្រមទាំងអាជ្ញាធរមូលដ្ឋាន ។
ឯកឧត្តម សៀងណាំ បន្តថា ប្រមុខរាជរដ្ឋាភិបាលកម្ពុជា បានខិតខំប្រឹងប្រែងរំដោះនិងអភិវឌ្ឍប្រទេសជាតិ តាំងពីបាតដៃទទេរពីគំនរផេះផង ក្នុងរបបខ្មែរក្រហម ឲ្យមានការរីកចម្រើនលូតលាស់គួរឱ្យស្មានមិនដល់រហូតមកដល់សព្វថ្ងៃ ដែលអ្វីៗទាំងអស់ គឺដើម្បីតែប្រជាជននិងប្រទេសជាតិ ដែលជាឆន្ទៈប្តូរផ្តាច់របស់ប្រមុខរាជរដ្ឋាភិបាលយើង ពិសេសក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី បាននាំមកនូវការបង្រួបបង្រួមជាតិផ្សះផ្សារជាតិ បានបង្កើតរបបរាជានិយមអាស្រ័យរដ្ឋធម្មនុញ្ញ ឡើងវិញ និងបាននាំមកនូវសុខសន្តិភាពពេញលេញ មានការអភិវឌ្ឍរីកចម្រើន ឥតឈប់ឈរលើគ្រប់វិស័យមកដល់ពេលនេះ។
ក្នុងឱកាសនោះដែរ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បានមានប្រសាសន៍លើកឡើងពីការអភិវឌ្ឍនិងរីកចម្រើនលូតលាស់ របស់ស្រុកក្រឡាញ់ ដែលរាជរដ្ឋាភិបាលបានផ្តល់កញ្ចប់ថវិកា តាមរយៈឯកឧត្តម សៀង ណាំ និងក្រុមការងាររាជរដ្ឋាភិបាលចុះជួយមូលដ្ឋានស្រុកក្រឡាញ់ សម្រាប់អភិវឌ្ឍន៍ហេដ្ឋារចនាសម្ព័ន្ធរូបវ័ន្តនៅមូលដ្ឋានមានជាអាទិ៍ សាលារៀន មណ្ឌសុខភាព មន្ទីរពេទ្យ ផ្លូវថ្នល់ខ្វាត់ខ្វែង ផ្សារលក់ដូរ អគ្គិសនី ព្រះវិហារ ទីវត្តអារាម ស្រះទឹក ប្រឡាយ អណ្តូងទឹក អាង ស្តុកទឹក បង្គន់អនាម័យសាធារណៈ និងឯកជន បណ្តាញផ្លូវគមនាគមន៍ ស្ពាន អគារស្នាក់នៅ។ល។ ឯកឧត្តម បានជំរុញដល់រដ្ឋបាលស្រុកនិងអាជ្ញាធរមូលដ្ឋានឱ្យបន្តយកចិត្តទុកដាក់លើការបំរើសេវាសាធារណៈឱ្យកាន់តែល្អប្រសើរជូនប្រជាពលរដ្ឋ ជាពិសេសលើឯកសារអត្រានុកូលដ្ឋាន ផ្សេងៗដែលជាតម្រូវការចាំបាច់របស់ពួកគាត់ ដោយឈរលើគោលការណ៍ លឿនរហ័ស តម្លាភាព គណនេយ្យភាព៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សាន្ត
