ស្ថានទូតឥណ្ឌា ប្រចាំនៅកម្ពុជា គ្រោងនឹងរៀបចំទិវា “យោគ:អន្តរជាតិ” លើកទី៩ នៅរាជធានីភ្នំពេញ និងនៅខេត្តសៀមរាប។
យោងតាមលិខិតរបស់ស្ថានទូតប្រទេសឥណ្ឌា ប្រចាំកម្ពុជា គោរពជូនរដ្ឋមន្ត្រីក្រសួងទេសចរណ៍ និងរដ្ឋមន្ត្រីក្រសួងអប់រំ យុវជន និងកីឡា កម្ពុជា កាលពីថ្ងៃទី២៥ ឧសភា ឆ្នាំ២០២៣ ដែលអ្នកព័ត៌មានទើបទទួលបាននាថ្ងៃទី១៤ ខែមិថុនានេះ បានឲ្យដឹងថា ទិវាយោគ:អន្តរជាតិ លើកទី៩នេះ នឹងត្រូវធ្វើឡើងនៅថ្ងៃទី១៨ ខែមិថុនា ឆ្នាំ២០២៣ នៅសួនច្បារវិមានឯករាជ្យ រាជធានីភ្នំពេញ និងនៅថ្ងៃទី២១ មិថុនា ធ្វើនៅមុខប្រាសាទអង្គរ ខេត្តសៀមរាប។
ទិវាយោគ:អន្តរជាតិនេះ ត្រូវបានក្រសួងទេសចរណ៍កម្ពុជា ចាត់ទុកថា ជាយុទ្ធនាការមួយដ៏សំខាន់ ក្នុងការផ្សព្វផ្សាយតំបន់ទេសចរណ៍ដ៏មានសក្តានុពលរបស់កម្ពុជា ទៅកាន់ពិភពលោកផងដែរ។ ជាមួយគា្ននេះ កាលពីថ្ងៃទី០៥ ខែមិថុនា ឆ្នាំ២០២៣ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ក៏បានដាក់លិខិតមួយគោរពជូនឯកឧត្តម ប៊ិន ឈិន ឧបនាយករដ្ឋមន្ត្រី រដ្ឋមន្ត្រីទីស្តីការគណ:រដ្ឋមន្ត្រី ដើម្បីសុំគោលការណ៍សហការជាមួយស្ថានទូតឥណ្ឌា ឲ្យបានរៀបចំ “ទិវាយោគ:អន្តរជាតិ” នៅរាជធានីភ្នំពេញ និងខេត្តជាគោលដៅទេសចរណ៏សំខាន់ៗ។
ក្នុងខ្លឹមសារលិខិតបានលើកឡើងថា ទិវាយោគ:អន្តរជាតិនេះ ទទួលបានការគាំទ្រចូលរួមពីភ្ញៀវទេសចរ ជាតិ-អន្តរជាតិរាប់ពាន់នាក់ និងបានចូលរួមចំណែកក្នុងការផ្សព្វផ្សាយពីសក្តានុពលទេសចរណ៍កម្ពុជាយ៉ាងធំធេងលើទីផ្សារអន្តរជាតិ។ ដើម្បីបន្តការផ្សព្វផ្សាយលំហាត់ប្រាណយោគ: ក៏ដូចជាការផ្សព្វផ្សាយគោលដៅ ទេសចរណ៍កម្ពុជាឲ្យកាន់តែទូលំទូលាយ និងមានប្រសិទ្ធភាពខ្ពស់។ លិខិតដដែលបានបន្តថា “ដោយព្រឹត្តិការណ៍នេះមានសារសំខាន់ ក្នុងការជំរុញការផ្សព្វផ្សាយយុទ្ឋនាការ “ឆ្នាំទស្សនាកម្ពុជា ២០២៣ ក៏ដូចជាការបន្តពង្រឹងកិច្ចសហប្រតិបត្តិការជាមួយសាធារណរដ្ឋឥណ្ឌា ខ្ញុំបាទគោរពស្នើសុំការអនុញ្ញតជាគោលការណ៍ឱ្យក្រសួងទេសចរណ៍សហការជាមួយស្ថានទូតឥណ្ឌារៀបចំ “ទិវាយោគ:អន្តរជាតិ”លើកទី៩ នៅរាជធានីភ្នំពេញ និងខេត្តសៀមរាប ដោយ អនុវត្តន៍យ៉ាងខ្ជាប់ខ្ជួននូវវិធានសុខាភិបាល និងវិធានការការពារ “៣កុំ ៣ការពារ” របស់ប្រមុខរាជរដ្ឋាភិបាល”។
កន្លងមក ទិវាយោគ:អន្តរជាតិ ត្រូវបានស្ថានទូតឥណ្ឌា ប្រចាំកម្ពុជា សហការជាមួយក្រសួងទេសចរណ៍ រៀបចំធ្វើឡើងបាន ៧លើករួចមកហើយ។ បើទោះបីជាយ៉ាងណា ទិវានេះ ក៏បានអាក់ខានចំនួន ២ឆ្នាំ នៅឆ្នាំ២០២០ និង២០២១ ដោយសារវិបត្តិ នៃជំងឺកូវីដ-១៩ ។
ការធ្វើយោគ: ត្រូវបានគេចាត់ទុកថា គឺជាការហ្វឹកហាត់ផ្នែកផ្លូវកាយ និងផ្លូវចិត្តតាមបែបបុរាណ មានដើមកំណើតនៅប្រទេសឥណ្ឌា ដោយពាក្យថា “យោគ” នេះមកពីសំស្ក្រឹត និងមានន័យថាចូលរួមឬរួបរួម។ សំខាន់ជាងនេះ យោគ: គឺលើកស្ទួយនូវសន្តិភាព ក្នុងពិភពលោកដែលស្របតាមគោលការណ៍របស់ឥណ្ឌា Vasudhaiva | Kutumbakam ដែលមានន័យថា “ពិភពលោកគឺជាគ្រួសារតែមួយ”៕ អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
