ព្រឹត្តិការណ៍នៃការប្រកួតបាល់ទាត់ពាន់រង្វាន់អភិបាលខេត្តសៀមរាប រដូវកាលទី១ ឆ្នាំ២០២៣ ត្រូវបានបិទបញ្ចប់ដោយជោគជ័យ ដោយម្ចាស់ជើងឯកបានទៅលើក្រុមបាល់ទាត់ហនុមានក្រុងសៀមរាប។
បើតាមលោក លី ប៊ុណ្ណា ប្រធានមន្ទីរអប់ រំយុវជន និងកីឡា ខេត្ដសៀមរាប បានឱ្យដឹងថា ព្រឹត្តិការណ៍បាល់ទាត់ពាន់រង្វាន់អភិបាលខេត្តសៀមរាប លើកទី១ ឆ្នាំ២០២៣នេះ មានក្រុមចូលរួមសរុប ១៤ក្រុម មកពី១២ក្រុង-ស្រុក រួមនឹងសាលាខេត្តសៀមរាប និងស.ស.យ.ក.ខេត្ត ដោយក្នុងមួយក្រុមមានចំនួន ៣៦នាក់។ ឆ្លងកាត់ការប្រកួតមានរយៈពេល ១៨សប្តាហ៍ ចាប់ពីថ្ងៃទី១១ ខែកុម្ភៈ ដល់ថ្ងៃទី១៧ ខែមិថុនា ឆ្នាំ២០២៣នេះ ក្រុមដែលគ្រោងជើងឯកបានទៅលើក្រុមបាល់ទាត់ហនុមានក្រុងសៀមរាប, លេខ២ បានទៅក្រុមបាល់ទាត់ហនុមានស្រុកពួក និងលេខ៣ បានទៅលើក្រុមហនុមានក្រុងអង្គរ។
ព័ត៌មានជាតិ ថ្មីៗ
ថ្លែងក្នុងពិធីបិទ លោក យន់ លីណេ អភិបាលរងខេត្ដ បានង្លែងការកោតសរសើរចំពោះការរៀបចំឲ្យមានកម្មវិធីប្រគួតកីឡាបាល់ទាត់ដណ្តើមពានរង្វាន់របស់អភិបាលខេត្តនេះឡើង ដែលបានរួមសហការល្អជាមួយមន្ទីរអប់រំយុវជន និងកីឡាខេត្ត ក្នុងការលើកស្ទួយវិស័យកីឡារកម្ពុជា ឲ្យមានកិត្តិយសលើឆាកអន្តរជាតិ តាមរយៈសកម្មភាពនៃការចូលរួមរបស់កីឡាករមកពីក្រុងស្រុក។ តាមរយៈនៃការប្រគួតដែលបានបញ្ចប់នាពេលនេះ យើងជ្រើសរើសរកឃើញនូវកីឡាករឆ្នើមៗ ហើយក៏ជាការវាស់ស្ទង់កម្រិតបច្ចេកទេសប៉ុណ្ណោះទេ គឺផ្តល់នូវធនធានមនុស្ស ប្រកបដោយសម្បទាមាំមួន សុខភាពល្អ និង ប្រាជ្ញាឈ្លាសវៃ មានការសាមគ្គីល្អ ទូលំទូលាយ ក្នុងការរួមគ្នាថែរក្សាការពារបូរណភាពទឹកដី ប្រពៃណីទំនៀមទំលាប់ឲ្យបានគង់វង្ស។
លោកបន្តទៀតថា វិស័យកីឡាបានលើស្ទួយកិត្តិយសជាតិ ធ្វើឲ្យអន្តរជាតិ កាន់តែស្គាល់អត្តចរិក ទំនៀមទំលាប ប្រពៃណីខ្មែរ ហើយកីឡាជាទូតសន្តិភាព និង សាមគ្គីភាព ធ្វើឲ្យយុវវ័យគ្រប់រូបចាកឆ្ងាយពីគ្រឿងញៀន។ លោកក៏បានផ្តាំផ្ញើ និង អំពាវនាវដល់គ្រប់ស្ថាប័ន សហគមន៍ គ្រឹះស្ថានសិក្សា បន្តនូវវប្បធម៌សាមគ្គី ដើមី្បឲ្យវិស័យកីឡា មានការអភិវឌ្ឍន៍រីកចម្រើន ក្នុងគោលដៅសុខមាលភាពផ្លូវកាយ បញ្ញាស្មារតី ដើមី្បរួមចំណែកលើកស្ទួយកិត្យានុភាពជាតិ កីឡានាំមកនូវសន្តិភាព៕
