នៅសាលាខេត្តកំពត នាព្រឹកថ្ងៃទី១៩ ខែមិថុនា ឆ្នាំ២០២៣ ឯកឧត្តម ថាច់ ផែន រដ្ឋលេខាធិការក្រសួងព័ត៌មាន តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រី ខៀវ កាញារីទ្ធ បានអញ្ជើញប្រកាសចូលកាន់មុខតំណែង លោកស្រី ប៉ូ ចាន់រស្មី ជាប្រធានមន្ទីរព័ត៌មានខេត្តកំពតថ្មី ជំនួស ឯកឧត្តម អោក សំណាង ដែលត្រូវទទួលភារកិច្ចថ្មីជាសមាជិកក្រុមប្រឹក្សាខេត្ត ដោយពិធីនេះក៏មានការចូលរួមពីលោកស្រី យូ សុគន្ធ អភិបាលរងខេត្តកំពត ប្រតិភូក្រសួង ប្រធានមន្ទីរព័ត៌មានមកពីតាមបណ្ដាខេត្ត រួមនឹងថ្នាក់ដឹកនាំ និងមន្ត្រីរាជការក្នុងខេត្តជាច្រើនរូប។
លោកស្រី យូ សុគន្ធ អភិបាលរងខេត្ត មានប្រសាសន៍ថា បច្ចុប្បន្នវិស័យព័ត៌មានមានការអភិវឌ្ឍន៍រីកចម្រើនគួរទីមោទន ពិសេសតាមរយៈមន្ទីរព័ត៌មានខេត្តកំពត ឃើញថាសមត្ថភាពល្អប្រសើរលើសកម្មភាពការងារព័ត៌មាន ដោយបានផ្សាយផ្ទាល់ជាច្រើនលើព្រឹត្តិការណ៍ជាតិ និងព្រឹត្តិការណ៍ដែលរៀបចំដោយរដ្ឋបាលខេត្ត ព្រមទាំងបានរៀបចំព័ត៌មានអំពីសកម្មភាពរបស់ថ្នាក់ដឹកនាំខេត្ត អំពីសមិទ្ធផលរបស់ខេត្ត និងការបង្កើតកម្មវិធីនានាជាច្រើន សម្រាប់បងប្អូនប្រជាពលរដ្ឋខេត្តកំពត ក៏ដូចប្រជាពលរដ្ឋទូទាំងប្រទេសបានទស្សនា និងស្វែងយល់អំពីភាពរីកចម្រើនលើគ្រប់វិស័យក្នុងខេត្ត។
ក្នុងពិធីនោះលោកស្រី ប៉ូ ចាន់រស្មី ដែលជាប្រធានមន្ទីរព័ត៌មានខេត្តកំពតថ្មី បានឡើងប្តេជ្ញាគោរព និងអនុវត្តន៍ឱ្យបានខ្ជាប់ខ្ជួននូវរដ្ឋធម្មនុញ្ញ លិខិតបទដ្ឋានគតិយុត្ត និងច្បាប់ទាំងឡាយរបស់ព្រះរាជាណាចក្រកម្ពុជា និងបន្តអនុវត្តគោលនយោបាយរបស់រាជរដ្ឋាភិបាល ជាពិសេសតាមការណែនាំរបស់ ក្រសួងព័តមាន និងរដ្ឋបាលខេត្ត ព្រមទាំងបន្តរក្សាសាមគ្គីភាព ឯកភាពផ្ទៃក្នុង និង រក្សាទំនាក់ទំនង សហការល្អ ជាមួយបណ្តាមន្ទីរ/អង្គភាពជុំវិញខេត្ត លើគ្រប់វិស័យ។ បន្តយកចិត្តទុកដាក់ចំពោះ ការងារលើកកម្ពស់វិស័យព័តមាន អោយកាន់តែប្រសើរឡើងថែមទៀត ពិសេស ខិតខំយកចិត្តទុកដាក់បង្កើនសមត្ថភាពបន្ថែម និងបទពិសោធន៍ ធ្វើយ៉ាងណាឱ្យការអនុវត្តតួនាទី ភារកិច្ចកាន់តែមានប្រសិទ្ធិខ្ពស់។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ ក្នុងនាមឯកឧត្តមរដ្ឋមន្ត្រីក្រសួងព័ត៌មាន ឯកឧត្តម ថាច់ ផែន បានថ្លែងការកោតសរសើរ និងវាយតំលៃខ្ពស់ ចំពោះកិច្ចខិតខំប្រឹងប្រែងបំពេញកិច្ចការងារបានយ៉ាងល្អ របស់លោក អោក សំណាង អតីតប្រធានមន្ទីរព័ត៌មានខេត្តកំពត ដែលត្រូវទៅកាន់ភារកិច្ចថ្មី តែបានបន្សល់ទុកនូវស្នាដៃ និងលទ្ធផលការងារជាច្រើន។ តាមរយៈប្រធានមន្ទីព័ត៌មានខេត្តកំពតថ្មី គឺមានភារកិច្ច និងការទទួលខុសត្រូវច្រើនដែលធ្វើបន្តទៅមុខទៀត ហើយប្រធានមន្ទីរ គឺជាផ្នែកមួយនៃមន្រ្តីព័ត៌មាន ជាអ្នកធ្វើទំនាក់ទំនងជាមួយអ្នកសារព័ត៌មាន ដើម្បីផ្សព្វផ្សាយនៅពេលមានបញ្ហាអ្វីមួយកើតឡើង គឺអាចបកស្រាយពន្យល់ទៅប្រជាពលរដ្ឋវិញបានឆាប់រហ័ស ថាតើរឿងនេះមកពីមូលហេតុអ្វី ដើម្បីមានការយល់ច្រឡំ។
ឯកឧត្តម រដ្ឋលេខាធិការ ក៏បានជម្រុញលើកទឹកចិត្តដល់ប្រធានមន្ទីរព័ត៌មានខេត្តកំពតថ្មី ត្រូវពង្រឹងសាមគ្គីភាពផ្ទៃក្នុងអោយបានរឹងមាំ ពិសេសចាំបាច់ត្រូវតែមានកិច្ចសហការល្អជសមួយថ្នាក់ដឹកនាំមន្ទីរ និងមន្រ្តីក្នុងអង្គភាពទាំងអស់ ដើម្បីបន្តបំពេញរាល់ភារៈកិច្ច និងជំនាញនីមួយៗអោយសម្រេចបានលទ្ធផលល្អថែមទៀត ពិសេសធ្វើអោយវិស័យព័ត៌មាន និងសោតទស្សន៌ ក្នុងខេត្តកាន់តែរីកចំរើនបន្ថែមទៀត៕
