ក្នុងពិធីជួបសំណេះសំណាល និងទទួលទានអាហារជាមួយសិក្ខាកាមកំពុងរៀនផ្នែកបដិសណ្ឋារកិច្ច ចំនួន ៣០០នាក់ នៅសាកលវិទ្យាល័យអង្គរ ខេត្តសៀមរាប នាថ្ងៃទី២០ ខែមិថុនា ឆ្នាំ២០២៣នេះ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានលើកឡើងថា ប្អូនៗដែលកំពុងរៀនផ្នែកបដិសណ្ឋារកិច្ចទាំងអស់ សុទ្ធសឹងតែជាសរសរទ្រូង ដ៏រឹងមាំសម្រាប់វិស័យទេសចរណ៍របស់កម្ពុជា ជាពិសេសខេត្តសៀមរាបផ្ទាល់តែម្តង។
លោកជំទាវ បន្ថែមថា ការបង្កើតឲ្យមានវគ្គបណ្តុះបណ្តាលផ្នែកបដិសណ្ឋារកិច្ច ដោយមិនគិតថ្លៃនេះ ជាឱកាសដ៏ល្អមួយសម្រាប់យុវជនបន្តវេន ជាពិសេសយុវជនដែលមកពីគ្រួសារមានជីវភាពខ្វះខាត ពុំមានលទ្ធភាពរៀនបន្ត ដែលអាចឲ្យពួកគាត់ ចាប់យកជំនាញដ៏ច្បាស់លាស់មួយសម្រាប់ចិញ្ចឹមជីវិត និងផ្គត់ផ្គង់គ្រួសារ។
មានវត្តមានក្នុងឱកាសនោះ លោក ហ្វីលីព សែតកៅ ប្រធានសមាគមក្លឹបទេសចរណ៍សៀមរាប ដែលជាអ្នករៀបចំវគ្គបណ្តុះបណ្តាលនេះ បានឲ្យដឹងថា វគ្គនេះមានរយៈពេល សរុប៦ខែ ដោយចាប់ផ្តើមកាលពីខែឧសភា ឆ្នាំ២០២៣ រួមមានផ្នែកបដិសណ្ឋារកិច្ចទេសចរណ៍ ផ្នែកការិយាល័យជួរមុខ ផ្នែកគេហកិច្ច និងផ្នែកសេវាកម្មម្ហូបអាហារ និងភេសជ្ជៈ។ លោកថា ក្នុងការបណ្តុះបណ្តាលនេះ សិក្ខាកាមនឹងសិក្សាពី ទ្រឹស្តី និងការអនុវត្តន៍ក្នុងថ្នាក់រៀនចំនួន២ខែ ហើយ៤ខែទៀត ជាវគ្គកម្មសិក្សា ដែលតម្រូវឲ្យសិក្ខាកាម ត្រូវទៅធ្វើការហាត់ការតាមមុខជំនាញរាងៗខ្លួននៅតាមបណ្តាសណ្ឋាគារ ភោជនីយដ្ឋាន និងក្រុមហ៊ុននានា ក្នុងខេត្តសៀមរាប។
ប្រធានសមាគមរូបនេះ បន្តថា រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចតេជោ ហ៊ុន សែន តាមរយៈអនុសាសន៍ ដាក់ ឲ្យអនុវត្តផែនការមេអភិវឌ្ឍន៍ទេសចរណ៍ខេត្តសៀមរាប ២០២១-២០៣៥ ដោយសម្ដេចតេជោ បានស្នើរឲ្យគ្រប់ភាគីពាក់ព័ន្ធទាំងអស់ ផ្ដល់អាទិភាពដល់ការអនុវត្តជាក់ស្ដែង ដើម្បីចូលរួមចំណែកក្នុងការលើកកម្ពស់ “វិស័យទេសចរណ៍ជាមាសបៃតង” ដែលជាវិស័យមួយចូលរួមដល់ការសម្រេច បាននូវគោលដៅអភិវឌ្ឍន៍ប្រកបដោយចីរភាពឆ្នាំ ២០៣០ របស់កម្ពុជាផងដែរ។
គួរជម្រាបថា ការបើកវគ្គបណ្តុះបណ្តាលនេះ ធ្វើឡើងក្នុងគោលបំណងបំពេញកម្លាំងពលកម្ម ផ្នែកបដិសណ្ណារកិច្ចក្នុងវិស័យទេសចរណ៍ក្នុងខេត្តសៀមរាប បន្ទាប់ពីវិស័យមួយនេះទទួលរងផលប៉ះពាល់យ៉ាងខ្លាំង អំឡុងពេលដែលពិភពលោកជួបវិបត្តិជំងឺឆ្លងកូវីដ-១៩។ បើតាមស្ថិតិត្រឹមចុងខែធ្នូ ឆ្នាំ២០២១ វិបត្តិជំងឺកូវីដ-១៩ បានធ្វើឲ្យប៉ះពាល់ដល់បុគ្គលិកសរុបចំនួន៣២,៨១១នាក់ ក្នុងចំណោមអាជីវកម្មសរុបជាង ២,២០០ អាជីវកម្ម ដែលត្រូវបានបិទ-ផ្អាកទូទាំងប្រទេស។
អត្ថបទនិងរូបភាព: លោក ជា ស្រស់
កែសម្រួល៖ លោក សេង ផល្លី
