នៅព្រឹកថ្ងៃទី ១៩ខែ មិថុនា ឆ្នាំ២០២៣នេះ ការិយាល័យប្រជាពលរដ្ឋខេត្តសៀមរាប សហការជាមួយសាកលវិទ្យាល័យសៅស៍អ៊ីសថ៍អេសសៀខេត្តសៀមរាប បានបើកវគ្គផ្សព្វផ្សាយស្តីពីតួនាទី ភារកិច្ច និង សមត្ថកិច្ចរបស់ការិយាល័យប្រជាពលរដ្ឋរាជធានី ខេត្ត និង របៀបប្រើប្រាស់កម្មវិធីទូរស័ព្ទដៃ(មតិយើង) ជូនដល់សាស្ត្រាចារ្យ និសិ្សត នៃសាកលវិទ្យាល័យ សៅស៍អ៊ីសថ៍អេសសៀ ចំនួន១២២នាក់ ក្នុងនោះស្រីចំនួន៧៦នាក់ ក្រោមអធិបតីភាពលោក មាន សុធី សាកលវិទ្យាធិការ សាកលវិទ្យាល័យ សៅស៍អ៊ីសថ៍អេសសៀ និង លោក នេត ផល្គុន ប្រធានការិយាល័យប្រជាពលរដ្ឋខេត្តសៀមរាប ។
មានប្រសាសន៍ក្នុងឱកាសនោះ លោក មាន សុធី សាកលវិទ្យាធិការ សាកលវិទ្យាល័យសៅស៍អ៊ីសថ៍អេសសៀខេត្តសៀមរាប បានសម្ដែងនូវការសាទរចំពោះវគ្គផ្សព្វផ្សាយនេះ ដែលធ្វ់ឲ្យសាស្ត្រាចារ្យ និសិ្សតទាំងអស់នៃសាកលវិទ្យាល័យ ឲ្យបានយល់ច្បាស់អំពីតួនាទី ភារកិច្ច និង សមត្ថកិច្ចរបស់ការិយាល័យប្រជាពលរដ្ឋ ហើយក៏ជាប្រវត្តិសាស្ត្រមួយ ដែលសាកលវិទ្យាល័យ ទទួលបាននូវវគ្គផ្សព្វផ្សាយថ្មីមួយនេះ និង ជាវិញ្ញាសារមួយ សម្រាប់និសិ្សតគ្រប់រូប ត្រូវធ្វើលិខិតបទនៅពេលបញ្ចប់ការសិក្សាផងដែរ ។
លោក នេត ផល្គុន ប្រធានការិយាល័យប្រជាពលរដ្ឋខេត្ត បានឲ្យដឹងថា វគ្គផ្សព្វផ្សាយនេះ មានគោលបំណងលើកកម្ពស់អភិបាលកិច្ច ក្នុងការផ្តល់សេវា និង ការអភិវឌ្ឍន៍សេដ្ឋកិច្ចនៅរដ្ឋបាល ថ្នាក់ក្រោមជាតិ តាមរយៈការពង្រឹងតួនាទី ភាកិច្ច ក្នុងការទទួល និង សម្រុះសម្រួលដោះស្រាយបណ្តឹងនៅ ក្រៅប្រព័ន្ធតុលាការ ដែលពាក់ព័ន្ធ នឹងការផ្តល់សេវាសាធារណៈ និងការគ្រប់គ្រងរដ្ឋបាល នៅរដ្ឋបាលថ្នាក់ក្រោមជាតិ ក្នុងគោលដៅ កំណត់យន្តការ គោលការណ៍ បែបបទ និង នីតិវិធីនៃការសម្រុះសម្រួលដោះស្រាយបណ្តឹងនៅថ្នាក់ក្រោមជាតិ និង អំពីរបៀបប្រើប្រាស់កម្មវិធីទូរស័ព្ទដៃ (មតិយើង) ដើមី្បបង្កភាពងាយស្រួលដល់ប្រជាពលរដ្ឋ ក៏ដូចសិស្ស និសិ្សត មិនចំណាយ ពេលវេលាទៅកាន់ការិយាល័យប្រជាពលរដ្ឋឡើយ ។
លោកបន្តថា ការិយាល័យប្រជាពលរដ្ឋ ជាយន្តការអព្យាក្រឹត្យមួយបានបង្កើតឡើងនៅរដ្ឋបាលខេត្ត សម្រាប់ទទួល និង សម្រុះសម្រួល ដោះស្រាយបណ្តឹងក្រៅប្រព័ន្ធតុលាការ ពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់ ខេត្ត ហើយអំពីតួនាទី ភារកិច្ចរបស់ការិយាល័យ គឺទទួលនិងប្រមូលពាក្យបណ្តឹងនានា ក្នុងដែនសមត្ថកិច្ចរបស់ខ្លួន និង ធ្វើសម្រាំងវាយតម្លៃពាក្យបណ្តឹងដែលទទួលបាន ព្រមទាំងបញ្ជូនពាក្យបណ្តឹងទាំងឡាយណា ស្ថិតក្នុងដែនសមត្ថកិច្ចខ្លួន ទៅស្ថាប័នមានសមត្ថកិច្ច និង តាមដានដោះស្រាយ ជូនព័ត៌មានត្រឡប់ទៅម្ចាស់បណ្តឹង ព្រមទាំងបានធ្វើការស៊ើបអង្គេត បណ្តឹងលើកអនុសាសន៍ អំពីវិធានការដោះស្រាយបណ្តឹង និង តាមដានការអនុវត្តវិធានការដោះស្រាយបណ្តឹង ដែលស្ថិតក្នុងដែនសមត្ថកិច្ចរបស់ខ្លួន ។
ជាមួយគ្នានោះ លោក នេត ផល្គុន បានបង្ហាត់បង្ហាញ អំពីរបៀបប្រើប្រាស់កម្មវិធីទូរស័ព្ទដៃ (មតិយើង) ដើមី្បមានភាពងាយស្រួលដល់បងប្អូនដែលមានបញ្ហាកើតឡើងនៅក្នុងមូលដ្ឋានខ្លួន ឬ ក៏ភាពមិនពេញចិត្តនិងមិនស្របតាមតម្រូវការរបស់ប្រជាពលរដ្ឋ លើការងារបម្រើសេវាសាធារណៈ និង ការគ្រប់គ្រង ដឹកនាំរបស់បុគ្គលណាម្នាក់ ដោយមានល័ក្ខការណ៍ជាសម្ងាត់ជូនបងប្អូនទៀតផង ពិសេសការប្រើប្រាស់តាមប្រព័ន្ធទូរស័ព្ទ ក៏ជាការកាត់បន្ថយនូវពេលវេលារបស់បងប្អូន ទៅធ្វើការដាក់ពាក្យបណ្តឹងនៅការិយាល័យប្រជាពលរដ្ឋ ។
លោក នេត ផល្គុន បញ្ជាក់ថា ការិយាល័យប្រជាពលរដ្ឋ គឺស្ថិតនៅជាប់ជាមួយអង្គភាពច្រកចេញចូលតែមួយ ព្រមទាំងមានតុពិសេសជាអចិន្ត្រៃយ៍នៅទីនោះផងដែរ ៕
អត្ថបទនិងរូបភាព: លោក ម៉ី សុខារឹទ្ធ
កែសម្រួល៖ លោក លីវ សាន្ត
