គម្រោងជួសជុលផ្លូវដីក្រហម ២ខ្សែ ស្ថិតក្នុងឃុំតាសៀម និងឃុំស្វាយលើ ក្នុងស្រុកស្រុកស្វាយលើ ខេត្តសៀមរាប ដែលជាគម្រោងមូលនិធិឃុំសង្កាត់ឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅថ្ងៃទី១៩ ខែមិថុនា ឆ្នាំ២០២៣ ខណៈដែលអាជ្ញាធរស្រុក និងឃុំ បានណែនាំដល់ម្ចាស់ក្រុមហ៊ុនដែលទទួលបានសិទ្ធក្នុងការងារជួសជុលផ្លូវទាំង២ខ្សែខាងលើ ត្រូវមានទំនួលខុសត្រូវឲ្យបានខ្ពស់ ក្នុងការជួសជុលផ្លូវទាំងនេះ ធ្វើយ៉ាងណាឲ្យស្របតាមលក្ខខណ្ឌដែលមានក្នុងកិច្ចសន្យា។
លោក ឡុង ហំ អភិបាលរងស្រុកស្វាយលើ បានបញ្ជាក់ថា តាមរយៈបទពិសោធន៍កាលពីឆ្នាំកន្លងទៅ មានក្រុមហ៊ុនខ្លះដែលទទួលបានសិទ្ធក្នុងការជួសជុល និងសាងសង់ផ្លូវនៃគម្រោងមូលនិធិឃុំសង្កាត់ មិនអនុវត្តតាមគោលការណ៍ និងកិច្ចសន្យា ដែលធ្វើឲ្យការងារស្ថាបនាផហលូវមានភាពយឺតយ៉ាវ ពិបាកដល់ប្រជាពលរដ្ឋក្នុងការធ្វើដំណើរប្រចាំថ្ងៃ។ ជាមួយនឹងបទពិសោធន៍នេះ ក្នុងនាមអាជ្ញាធរស្រុក ក៏ដូចជាអាជ្ញាធរឃុំ សុំណែនាំដល់ម្ចាស់ក្រុមហ៊ុនម៉ៅការដែលទទួលបានសិទ្ធជួសជុល ធ្វើយ៉ាងណាត្រូវមានការទទួលខុសត្រូវចំពោះក្រុមការងារ ដោយអនុវត្តទៅតាមលក្ខខណ្ឌដែឡបានសន្យា ធ្វើយ៉ាងណាឲ្យការងារជួសជុលនេះសម្រេចបានទៅតាមការគ្រោងទុក និងមានគុណភាពល្អ។ ក្នុងនោះដែរគ្រប់ក្រុមហ៊ុនទាំងអស់ត្រូវមានការសហការគ្នាឲ្យបានជិតស្និតក្នុងការអនុវត្តការងារនេះ ហើយអាជ្ញាធរមូលដ្ឋានត្រូវតាមដានជាប្រចាំទៅលើការងារជួសជុលផ្លូវក្នុងមូលដ្ឋានខ្លួន ហើយប្រសិនបើក្រុមហ៊ុនណាមិនអនុវត្តតាមគោលការ អាជ្ញាធរឃុំត្រូវមានវិធានការចាំបាច់ណាមួយក្នុងការដោះស្រាយ និងអាចរាយការណ៍មកកាន់អាជ្ញាធរស្រុកដោះស្រាយបន្តក្នុងករណីចាំបាច់។
គួរឲ្យដឹងថា គម្រោងដែលបានបញ្ចបើការដេញថ្លៃនាពេលនេះ មានចំនួនពីរគម្រោងក្នុងនោះ៖ សម្រាប់គម្រោងទី១ ស្ថិតក្នុងឃុំតាសៀម គឺគម្រោងជួសជុលផ្លូវដីក្រហមប្រវែង១.៤៥០ម៉ែត្រ, ទទឹង៥ម៉ត្រ, កម្រាសក្រួស០,៥ម៉ែត្រ, ជួសជុល និងសាងសងលូមុខកាត់១ម៉ែត្រ ចំនួន៥កន្លែង និងដាក់ស្លាកសញ្ញាគម្រោងចំនួន២កន្លែង ក្នុងតម្លៃប៉ានស្មាន ១១៣.២៥៤.៣៩៤រៀល ដោយមានក្រុមហ៊ុនចូលរួមដេញថ្លៃចំនួនបី។ ជាលទ្ធផលបានទៅលើក្រុមហ៊ុន ពៅ រ៉ាឌី ក្នុងតម្លៃ ១១២.០០០.០០០រៀល។ ដោយឡែកសម្រាប់គម្រោងទី២ ស្ថិតក្នុងឃុំស្វាយលើ គឺគម្រោងជួសជុលផ្លូវដីស ក្រាលក្រួសក្រហម ប្រវែង២.២០៧ម៉ែត្រ, ទទឹង៥ម៉ត្រ, កម្រាស ០,៥ម៉ែត្រ និងសាងសងលូមូលមុខកាត់១ម៉ែត្រ ចំនួន២កន្លែង និងដាក់ស្លាកសញ្ញាគម្រោងចំនួន២កន្លែង ក្នុងតម្លៃប៉ានស្មាន ១៥០.៤៦៥.១៥១រៀល ដោយមានក្រុមហ៊ុនចូលរួមដេញថ្លៃចំនួនប្រាំ។ ជាលទ្ធផលបានទៅលើក្រុមហ៊ុន អំ ឡូ ក្នុងតម្លៃ ១៤៩.០៦៩.០០០រៀល។
ក្រោយបញ្ចប់គម្រោងនៃការដេញថ្លៃនេះ ចំពោះក្រុមទាំង២ ដែលទទួលបានការម៉ៅការគម្រោងជួសជុលផ្លូវខាងលើ បានធ្វើការប្ដេជ្ញាចិត្ត ដោយសន្យាថា នឹងអនុវត្តការងារជួសជុលផ្លូវទាំង២ខ្សែនេះឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមានចែងនៅក្នុងកិច្ចសន្យា។ ហើយប្រសិនជាក្រុមហ៊ុនអនុវត្តខុសពីកិច្ចសន្យា ក្រុមនឹងធានាទទួលខុសត្រូវទាំងអស់ចំពោះការងារជួសជុលលើគម្រោងនេះ៕
អត្ថបទ និងរូបភាព៖ លោក អ៊ុន ណារាជ្យ
