ថ្ងៃទី១៤ ខែមិថុនា ឆ្នាំ២០២៣ ឯកឧត្ដម នាយឧត្ដសេនីយ៍ សែម សុវណ្ណនី អនុប្រធាទី២ អាជ្ញាធរមីនកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី បានអញ្ជើញបំពាក់មេដាយការពារជាតិជូនដល់អតីតយុទ្ធជន ក្នុងស្រុកបន្ទាយស្រី ខេត្តសៀមរាប សរុបចំនួន ៧៩០នាក់។
ពិធីបំពាក់មេដាយការពារជាតិនេះ ប្រារព្ធឡើងក្នុងបរិវេណវត្តសិលាចារ ស្ថិតក្នុងឃុំខ្នារសណ្ដាយ ស្រុកបន្ទាយស្រី ដែលមានការអញ្ជើញចូលរួមពី លោក ពិន ប្រាកដ អភិបាលរងខេត្តសៀមរាប ឧត្ដមសេនីយ៍ទោ ស៊ិន ភាត់ មេបញ្ជាការ តំបន់ប្រតិបត្តិការសឹករងសៀមរាប និងជាប្រធានសមាគមអតីតយុទ្ធជនកម្ពុជា ខេត្តសៀមរាប លោក រិន ឡូត អភិបាលស្រុកបន្ទាយស្រី ព្រមទាំងឯកឧត្តម លោកជំទាវ លោក លោកស្រី ក្រុមការងាររាជរដ្ឋាភិបាលចុះជួយស្រុកបន្ទាយស្រី មន្ទីរ អង្គភាពជុំវិញខេត្តយ៉ាងច្រើនកុះករ។
តាមរបាយការណ៍ ឧត្ដមសេនីយ៍ទោ ស៊ិន ភាត់ បង្ហាញថា បច្ចុប្បន្ន អតីតយុទ្ធជនក្នុងខេត្តសៀមរាប មានចំនួនសរុប ៨,៨៦៤នាក់ និងត្រូវបានស្នើបំពាក់មេដៃការពារជាតិជូន មានចំនួន៧,៧៤៤នាក់ ក្នងនោះស្រុកបន្ទាយស្រី មានអតីតយុទ្ធជន ៩០៩នាក់ ហើយត្រូវបានបំពាក់មេដៃការពារជាតិនាពេលនេះ មានចំនួន៧៩០នាក់។ ឧត្ដមសេនីយ៍ទោ ស៊ិន ភាត់ បន្ថែមថា ចាប់ពីឆ្នាំ២០១៧មក សមាគមអតីតយុទ្ធជនកម្ពុជា ខេត្តសៀមរាប បានសាងសង់ផ្ទះជូនដល់សមាជិក ដែលមានជីវភាពទីទ័លក្រ របស់ខ្លួន បានចំនួន ៩០ខ្នងផ្ទះ ដែលនេះជាអំណោយរបស់សម្តេចអគ្គមហាសេនាបតី តេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី និងបានបញ្ជូនអតីតយុទ្ធជនចំនួន ៤១គ្រួសារ ដើម្បីទៅទទួលផ្ទះ ៤១ខ្នង នៅក្នុងដីសម្បទានសង្គមកិច្ចក្នុងខេត្តឧត្ដមានជ័យ។
មានប្រសាសន៍សំណេះសំណាលក្នុងឱកាសនោះ ឯកឧត្ដម នាយឧត្ដសេនីយ៍ សែម សុវណ្ណនី លើកឡើងថា គំរូវីរភាព និងការពលី លះបង់សាច់ស្រស់ ឈាមស្រស់ ដើម្បីបុព្វហេតុជាតិមាតុភូមិ បានដក់ជាប់ក្នុងដួងចិត្តរបស់ប្រជាជនកម្ពុជាគ្រប់រូប។ ជាពិសេស សម្ដេចតេជោ ហ៊ុន សែន ក្នុងនាមប្រធានសមាគមអតីតយុទ្ធជនកម្ពុជា តែងតែនឹករលឹក និងដឹងគុណដល់អតីតយុទ្ធជនគ្រប់ជាន់ថ្នាក់ ដែលបានចូលរួមរំដោះកម្ពុជា ពីបនប្រល័យពូជសាសន៍ ប៉ុល ពត ក៏ដូចជា ចូលរួមគាំទ្រការដឹកនាំនូវនយោបាយឈ្នះ ឈ្នះរបស់សម្ដេចរហូតប្រទេសកម្ពុជាទទួលបានសន្តិភាព និងការអភិវឌ្ឍជាង៤០ឆ្នាំនេះ។
ឯកឧត្ដម នាយឧត្ដសេនីយ៍ បញ្ជាក់បន្ថែមថា ការបំពាក់ជូននូវគ្រឿងឥស្សរិយយស ជូនដល់អតីតយុទ្ធជនកម្ពុជា ក្នុងឱកាសនេះ គឺពិតជាមានសារៈសំខាន់ណាស់ ដែលជាកិត្តិយសផ្ដល់ជូនដោយប្រមុខរាជរដ្ឋាភិបាល ចំពោះអតីតយុទ្ធជន ដោយមិនមានការរើសអើង ក្នុងការរួមចំណែកក្នុងកិច្ចការពារទឹកដី និងរក្សាបាននូវសុខសន្តិភាព ដែលនាំមកនូវភាពរីកចម្រើនរហូតមកដល់ពេលបច្ចុប្បន្ន។
ក្នុងពិធីសំណេះសំណាលប្រកបដោយមនោសញ្ចេតនានេះ ឯកឧត្ដម នាយឧត្ដសេនីយ៍ សែម សុវណ្ណនី បានជួបសំណេះសំណាលជាមួយយុទ្ធមិត្ត ដែលធ្លាប់ចូលរួមការពារជាតិមាតុភូមិនាពេលអតីតកាល ជាមួយនឹងក្ដីរំភើប ដែលឯកឧត្ដមមិននឹកស្មានថាបានជួបគ្នាជាថ្មី ដែលទាំងនេះបានមកពីការដឹកនាំប្រកបដោយគុណធម៌ របស់សម្ដេចតេជោ ទើបអតីតយុទ្ធជន បានជួបជុំគ្នា និងមើលឃើញការអភិវឌ្ឍសម្រាប់មនុស្សជំនាន់ក្រោយដូចសព្វថ្ងៃ។
ទន្ទឹមនោះ ឯកឧត្ដម នាយឧត្ដសេនីយ៍ សែម សុវណ្ណនី ក៏បាននាំយកអំណោយរបស់សម្ដេចតេជោ ហ៊ុន សែន ចែកជូនដល់អតីតយុទ្ធជនចំនួន៧៩០នាក់ ដែលក្នុងម្នាក់ៗទទួលបានថវិកាចំនួន ៥០ ០០០រៀល ក្រមា ១ និងអាហារសម្រន់។ ឯកឧត្តមក៏បានអំពាវនាវដល់អតីតយុទ្ធជន និងប្រជាពលរដ្ឋកម្ពុជាទាំងអស់ ទៅចូលរួមបោះឆ្នោតជ្រើសមេដឹកនាំ ដែលប្រកបដោយគុណធម៌ និងនាំមកនូវសុខសន្តិភាព និងការអភិវឌ្ឍតទៅមុខទៀត នៅថ្ងៃទី២៣ ខែកក្កដា ឆ្នាំ២០២៣ខាងមុខនេះ។
អត្ថបទ និងរូបភាព៖ លោក ធន់ ពូថេ
កែសម្រួល៖ លោក សេង ផល្លី
