នារសៀលថ្ងៃទី១២ ខែមិថុនា ឆ្នាំ២០២៣នេះ សមាគមលើកកម្ពស់ពលករ និងអតីតពលករដើម្បីសប្បុរសធម៌ និងអង្គការសម្ព័ន្ទយុវជនអន្តរជាតិ នៃសាធារណរដ្ឋកូរ៉េ ប្រចាំនៅកម្ពុជា បានសហការគ្នារៀបចំសិក្ខាសាលាអប់រំផ្លូវចិត្ត ស្ដីពី “ការកសាងសមត្ថភាព និងភាពជាអ្នកដឹកនាំដល់យុវជន” នៅខេត្តសៀមរាប ដែលសិក្ខាសាលានេះមានរយៈពេល៣ថ្ងៃ ចាប់ពីថ្ងៃ១២-១៤ ខែមិថុនា ឆ្នាំ២០២៣ ដើម្បីចូលរួមចំណែកលើកកម្ពស់សមត្ថភាព និងភាពជាអ្នកដឹកនាំដល់យុវជនក្នុងយុគសម័យទំនើបនៃសាកលភាវូបនីយកម្ម ដោយមានអ្នកចូលរួមប្រមាណ ៣.៥០០នាក់។
ថ្លែងក្នុងឱកាសនោះ ឯកឧត្តមបណ្ឌិត ស៊ាន បូរ៉ាត រដ្ឋលេខាធិការនៃក្រសួងអប់រំ យុវជន និងកីឡា មានប្រសាសន៍ថា អង្គសិក្ខាសាលានាពេលនេះ គឹវាមានសារ:សំខាន់ខ្លាំងណាស់ ក្នុងការអបរំផ្លូវចិត្តឲ្យយើងប្រព្រឹត្តិល្អ ដាស់តឿនសតិអារម្មណ៍ផ្លូវចិត្ត កុំឲ្យគិតធុញថប់ច្រើនពេក យើងត្រូវចេះប្រើចិត្តឲ្យបានស្ងប់រំងាប់ កុំក្តៅក្រហាយត្រូវចេះអត់ធ្មត់ ហើយសិក្ខាសាលានេះដែរ បានផ្តល់វគ្គអប់រំផ្សព្វផ្សាយអំពីការអប់រំសុខភាពផ្លូវចិត្ត គោលលបំណងសំខាន់ៗ នៃការផ្សព្វផ្សាយ គឺអ្នកចូលរួមនឹងទទួលបាននូវខ្លឹមសារអំពីសុខភាព សុខភាពផ្លូវចិត្ត និងការតានតឹងចិត្តដែលមានផលវិបាកនៃការតានតឹងផ្លូវចិត្ត យើងត្រូវចេះរបៀបជួយខ្លួនឯងដោយការគិតល្អ គិតត្រូវដោយខ្លួនឯង។
ឯកឧត្តមបណ្ឌិត បានបន្តថាការអប់រំផ្លូវចិត្ត វាគឺជាគន្លឹះសំខាន់ៗ ក្នុងការកាត់បន្ថយនូវភាពតានតឹងផ្លូវចិត្ត និងការរកជំនួយប្រឹក្សាយោបល់ពីអ្នកជំនាញសុខភាពផ្លូវចិត្ត។ បញ្ហាធ្លាក់ទឹកចិត្តអាចកើតមានទូទៅចំពោះមនុស្សគ្រប់រូប ហើយវាអាចកើតមានញឹកញាប់ ក្នុងជីវិតរបស់បុគ្គលម្នាក់ៗ ទាំងនេះជាសញ្ញាមួយចំនួនសម្គាល់ថាអ្នកមានជំងឺធ្លាក់ទឹកចិត្ត បាក់ទឹកទឹក អារម្មណ៍ក្រៀមក្រំខុសធម្មតា បាត់បង់ចំណង់ចំណូលចិត្ត ឬភាពរីករាយក្នុងសកម្មភាពដែលធ្លាប់ចូលចិត្តកន្លងមក បាត់បង់ថាមពលនិងគ្មានកម្លាំងកំហែង បាត់បង់ទំនុកចិត្ត មានអារម្មណ៍ស្តីបន្ទោសខ្លួនឯង ពិបាកផ្ចង់អារម្មណ៍ឬបំពេញការងារប្រចាំថ្ងៃ ចង់ស្លាប់ ពិបាកគេង និងប្រែប្រួលការញ៉ាំជាដើម។
មានប្រសាសន៍ក្នុងឱកាសនោះដែរ លោក ពិន ប្រាកដ អភិបាលរងខេត្តសៀមរាប បានលើកឡើងថា វគ្គបណ្តុះបណ្តាលនាពេលនេះ គឺយើងរួមគ្នាប្រមូលផ្ដុំគំនិតយោបល់ល្អៗ ដើម្បីចូលរួមចំណែកជាមួយរាជរដ្ឋាភិបាល ក្នុងការលើកកម្ពស់កម្រិតជីវភាពរស់នៅរបស់ប្រជាជននៅតាមសហគមន៏នានា តាមរយះការផ្ដល់នៅចំណេះដឹងជាមូលដ្ឋាននិងឱកាសការងារផ្សេងៗផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
