នៅសាលប្រជុំសាលាខេត្តសៀមរាប នារសៀលថ្ងៃទី៧ ខែមិថុនា ឆ្នាំ២០២៣ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានដឹកនាំបើកកិច្ចប្រជុំសាមញ្ញាលើកទី៤៩ របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០២៣ ជាឆ្នាំចុងក្រោយនៃអាណត្តិទី៣ ដោយមានការចូលរួមពីសំណាក់ ឯកឧត្តម ទៀ សីហា អភិបាលខេត្ត រួមនឹងវត្តមានឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត តំណាងអាជ្ញាធរអប្សារា លោកលោកស្រីអាជ្ញាធរក្រុង-ស្រុក ថ្នាក់ដឹកនាំមន្ទីរ-អង្គភាព លោកនាយក នាយករងរដ្ឋបាល នាយក-នាយករងទីចាត់ការ អង្គភាពនានាជុំវិញខេត្ត ដោយកិច្ចប្រជុំនេះធ្វើឡើងដោយផ្ទាល់ និងតាមប្រព័ន្ធហ្សូម។
ក្នុងកិច្ចប្រជុំនេះដែរ ក្រុមប្រឹក្សាខេត្តបានអនុម័តទៅរបៀបវារៈ ៤ចំណុច ព្រមទាំងបានអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៤៨ និងរបាយការប្រចាំខែឧសភា របស់រដ្ឋបាលខេត្តរួចមក សមាជិកសមាជិកាក្រុមប្រឹក្សាខេត្ត ក៏បានលើកឡើងនូវបញ្ហាមួយចំនួន ពីបញ្ហាលើការមិនទាន់តម្លើងបង្គោលភ្លើងបំភ្លឺដងផ្លូវ បញ្ហាសុខភាពរបស់ប្រជាពលរដ្ឋ សំខាន់កុមារនៅរដូវភ្លៀងធ្លាក់ ពីជំងឺគ្រុនឈាម គ្រុនចាញ់ គ្រុនឈិក ព្រមទាំងបញ្ហានៅពេលមានផ្គរន្ទះ និងស្នើសុំធ្វើការកែតម្រូវខ្លឹមអត្ថន័យនៅក្នុងរបាយការណ៍ផងដែរ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ ឯកឧត្តម ទៀ សីហា បានធ្វើការបកស្រាយ ព្រមទាំងបានអនុញ្ញាតិជូនអស់លោកប្រធានមន្ទីរ-អង្គភាពពាក់ព័ន្ធ ដើម្បីធ្វើការបំភ្លឺជូនអង្គប្រជុំ។ ឯកឧត្តមក៏បានជម្រុញដល់អាជ្ញាធរក្រុងស្រុក ត្រូវបង្កើនយកចិត្តទុកដាក់ខ្ពស់ អំពីសុខមាភាពរបស់ប្រជាពលរដ្ឋ នៅក្នុងរដូវមានភ្លៀងធ្លាក់នេះ តែងតែបង្កឲ្យកើតមានជំងឺគ្រុនចាញ់ គ្រុនឈាម និងគ្រុនឈិក សំខាន់លើកុមារក៏ដូចមនុស្សគ្រប់វ័យ។ ជាមួយគ្នានោះឯកឧត្តម ក៏បានសំណូមពរដល់អាជ្ញាធរជាតិអប្សរា សុំឲ្យមានការយោគយល់ ចំពោះបងប្អូនប្រជាពលរដ្ឋ ដែលស្ម័ត្រចិត្តផ្លាស់ទៅកាន់ទីតាំងថ្មី ភូមិអភិវឌ្ឍន៍រុនតាឯក និងតំបន់ពាក់ស្នែង ស្រុកអង្គរធំ ក្នុងការរុះរើផ្ទះសម្បែងបងប្អូន ក្នុងរដូវភ្លៀងធ្លាក់ដែលបង្កការលំបាកដល់បងប្អូន។
មានមតិបូកសរុបកិច្ចប្រជុំ ឯកឧត្តម អ៊ាន ឃុន ថ្លែងថា តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកបដោយក្រមសីលធម៌វិជ្ជាជីវៈ ពីសំណាក់ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាព និងអ្នកពាក់ព័ន្ធទាំងអស់ បានញ៉ាំងឲ្យដំណើរការនៃកិច្ចប្រជុំសាមញ្ញលើកទី៤៩ របស់ក្រុមប្រឹក្សាខេត្ត ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក។ ជាមួយគ្នានេះ ឯកឧត្តម ក៏បានថ្លែងនូវអំណរគុណយ៉ាងជ្រាលជ្រៅ ចំពោះឯកឧត្តមអភិបាលខេត្ត ក៏ដូចជាថ្នាក់ដឹកនាំមន្ទីរអង្គភាព អាជ្ញាធរខេត្ត/ក្រុង/ស្រុកទាំងអស់ ដែលបានយកចិត្តទុកដាក់ក្នុងការដោះស្រាយរាល់បញ្ហាដែលបានលើកឡើងនេះ ព្រោះបញ្ហាទាំងនេះ គឺជាបញ្ហារបស់ប្រជាពលរដ្ឋដែលតែងតែលើកឡើងជាអន្លើៗ ។
ជាមួយគ្នានេះ ឯកឧត្តមប្រធានក្រុមប្រឹក្សាខេត្ត ក៏បានថ្លែងការកោតសរសើរដល់ថ្នាក់ដឹកនាំខេត្ត ដែលបានខិតខំអភិវឌ្ឍន៍ខេត្តឲ្យមានសន្តិសុខ សណ្តាប់ធ្នាប់ល្អ នៃព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅលើទឹកដីខេត្តសៀមរាប ព្រមទាំងអនុវត្តការងារប្រកបដោយប្រសិទ្ធភាព មានសាមគ្គីភាពផ្ទៃក្នុង និង មានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការ នៅរដ្ឋបាលថ្នាក់ក្រោមជាតិផងដែរ៕
អត្ថបទ និង រូបភាព៖ លោក ម៉ី សុខារិទ្ធ , ស៊ាន សុផាត
កែសម្រួល៖ លោក អ៊ុន ណារាជ្យ
