ការអនុវត្តកម្មវិធីអប់រំផ្សព្វផ្សាយពីបញ្ហាសុខភាពភ្នែកនៅតាមគ្រឹះស្ថានសិក្សា គឺបានចូលរួមចំណែកយ៉ាងច្រើន ក្នុងការកាត់បន្ថយភាពពិការភ្នែក ដែលអាចបង្ការបានប្រកបដោយលទ្ធផលល្អប្រសើរ និងបានសហការជាមួយអ្នកពាក់ព័ន្ធនានា ក្នុងការវាស់គំហើញសិស្សនៅតាមគ្រឹះស្ថានសិក្សា ក្នុងគោលបំណងស្តារគំហើញរបស់សិស្សានុសិស្សដែលបញ្ហាខ្សោយគំហើញ ដើម្បីឱ្យពួកគេ មានលទ្ធភាពសិក្សារៀនសូត្រពេញលេញ។
ថ្លែងក្នុងកម្មវិធីអប់រំផ្សព្វផ្សាយ ស្ដីពីសុខភាពភ្នែកដល់ក្រុមយុវជនជាសិស្សវិទ្យាល័យអង្គរ នៅក្រុងសៀមរាប នាព្រឹកថ្ងៃទី៧ ខែមិថុនា ឆ្នាំ២០២៣នេះ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានបញ្ជាក់ថា យោងតាមការអង្កេតរហ័សពីស្ថានភាពពិការភ្នែកដែលអាចបង្ការបាននៅឆ្នាំ២០១៩ បានបង្ហាញថា អត្រាប្រើវ៉ាឡង់នៃភាពពិការភ្នែកត្រូវបានប៉ាន់ស្មានថាមានប្រមាណជា ០.៣៧% ក្នុងចំណោមប្រជាជនទូទៅក្នុងប្រទេសកម្ពុជា ហើយមូលហេតុសំខាន់នៃគំហើញចុះខ្សោយ និងភាពពិការភ្នែក គឺមានរហូតដល់ ៨០.៤% ដែលបណ្តាលមកពីជំងឺបាយភ្នែក និងជំងឺភ្នែកកំហុសកំណុំរូបភាព។ ហើយបើតាមការអង្កេតដាច់ដោយឡែកមួយទៀតអំពីបញ្ហាកំហុសកំណុំរូបភាពក្នុងចំណោមកុមារតាមសាលារៀនលើក្រុមអាយុ១១ដល់១៤ឆ្នាំ នៅកម្ពុជាក្នុងឆ្នាំ២០១២ បង្ហាញថា កុមារនៅតាមទីប្រជុំជន/ទីក្រុង ប្រមាណជា ១៣% មានបញ្ហាកំហុសកំណុំរូបភាព ឬ ភ្នែកម្ហូប។
លោកជំទាវកិត្តិបណ្ឌិត មានប្រសាសន៍ទៀតថា ដើម្បីឆ្លើយតបនឹងបញ្ហាទាំងនេះ ក្រសួងកិច្ចការនារី ក្រសួងសុខាភិបាល ក្រសួងអប់រំ បានសហការជាមួយនឹងមូលនិធិហ្វ្រេដហូឡូ អនុវត្តគម្រោងបង្កើនវិសាលភាពសេវាកំហុសកំណុំរូបភាពនៅកម្ពុជា ដើម្បីកាត់បន្ថយអត្រាប្រេវ៉ាឡង់នៃភាពពិការភ្នែក និងឆ្លើយតបចំពោះការរីកចម្រើនន វិស័យបច្ចេកវិទ្យា ដែលតម្រូវការប្រើប្រាស់ភ្នែកកាន់តែកើនឡើងរាល់ថ្ងៃ។ ក្នុងនោះក្រសួងកិច្ចការនាវីកំពុងអនុវត្តកម្មវិធីផ្សព្វផ្សាយអប់រំសុខភាពភ្នែក និងប្រាប់ពីសេវាពិនិត្យ ព្យាបាលដែលមាន និងតម្រូវការវ៉ែនតា តាមរយៈយុទ្ធសាស្ត្រដែលមានការចូលរួមពីសហគមន៍។ លើសពីនេះទៅទៀត គម្រោងបាននឹងកំពុងរៀបចំផែនការ បើកយុទ្ធនាការថ្នាក់ជាតិ (SEE NOW Campaign) អប់រំផ្សព្វផ្សាយ លើកកម្ពស់ការយល់ដឹងអំពីសុខភាពភ្នែក និងជំរុញឱ្យប្រជាពលរដ្ឋ ដែលមានបញ្ហាភ្នែកទៅទទួលសេវាក្នុងចំណោមប្រជាជនទូទៅ និង រួមទាំងសិស្សានុស្ស នៅតាមសាលារៀនផងដែរ។
ព័ត៌មានជាតិ ថ្មីៗ
លោក បាក់ តូក្យូ ប្រធានអង្គការមូលនិធិហ្វ្រេតហូឡូ បានឲ្យដឹងថា សម្រាប់កម្មវិធីដែលរៀបចំឡើងនេះដែរ គឺដើម្បីផ្តល់ចំណេះដឹងដល់សិស្សានុសិស្សទាំងអស់ឱ្យយល់ដឹងកាន់តែច្បាស់ពីសុខភាពភ្នែក ពិតជាមានសារៈសំខាន់ណាស់សម្រាប់មនុស្សគ្រប់រូប និងជួយដោះស្រាយបញ្ហា កំហុសកំណុំរូបភាព ដែលធ្វើឱ្យយើងមើលឃើញមិនច្បាស់ ទៅជាមើលឃើញច្បាស់។ ក្នុងណើមានបញ្ហាកំហុសកំណុំរូបភាព ៤ប្រភេទដែលយើងផ្ដោតសំខាន់រួមមាន៖ ភ្នែកម្ហូប ដែលជាភ្នែកមើលឆ្ងាយមិនច្បាស់ តែមើលជិតច្បាស់, ភ្នែកប្រេះប៊ីត ដែលអាចមើលវត្ថុតូចៗនៅទីជិតមិនច្បាស់ វាកើតឡើងចំពោះមនុស្សមានវ័យចាប់ពីអាយុ ៤០ឡើងទៅ តែមើលឆ្ងាយមានលក្ខណៈធម្មតា, ភ្នែកអាស្ទិកម៉ាត ជាភ្នែកដែលមើលជិត ឬមើលឆ្ងាយមិនច្បាស់ ឃើញរូបភាពជាស្រមោល ព្រិល ជារលក ឬផ្អៀងៗ និងភ្នែកអ៊ីពែរម៉េត្រូប ដែលជាភ្នែកដែលមើលទាំងជិត និងឆ្ងាយមិនច្បាស់។ បញ្ហាកំហុសកំណុំរូបភាពទាំង ៤ប្រភេទនេះ គឺយើងអាចបង្ការបានតាមរយៈការប្រើប្រាស់វ៉ែនតាឱ្យបានត្រឹមត្រូវ ដូចនេះត្រូវយកចិត្តទុកដាក់ថែរក្សាភ្នែករបស់អ្នក។
ក្នុងឱកាសនោះដែរ លោក អ៊ឹង គឺមលាង អភិបាលរងខេត្តសៀមរាប បានណែនាំដល់ក្មួយៗជាសិស្សានុសិស្សទាំងអស់ សូមយកចិត្តទុកដាក់ឲ្យបានខ្ពស់ចំពោះបញ្ហាសុខភាពភ្នែករបស់ក្មួយៗ ប្រសិនបើក្មួយៗមានបញ្ហាពិបាកក្នុងការមើលទោះមើលជិត ឬមើលឆ្ងាយ មើលមិនច្បាស់ មើលទៅព្រាលៗ សូមក្មួយៗប្រញាប់ទៅជួបគ្រូពេទ្យជំនាញឯកទេសភ្នែក ដើម្បីជួយក្មួយៗឱ្យមើលឃើញបានច្បាស់ល្អឡើងវិញ។ ត្រូវយកចិត្តទុកដាក់ក្នុងការថែទាំសុខភាពភ្នែក និងប្រើប្រាស់ភ្នែកឱ្យបានត្រឹមត្រូវ កុំលេងហ្គេមអេឡិចត្រូនិក មើលទូរទស្សន៍ កុំព្យូទ័រ ទូរស័ព្ទដៃ លើសពី ២ម៉ោងក្នុង១ថ្ងៃ ត្រូវអង្គុយមើលទូរទស្សន៍យ៉ាងតិចប្រហែល៣ម៉ែត្រពីទូរទស្សន៍ និងឧស្សាហ៍ព្រិចភ្នែក ហើយត្រូវអង្គុយយ៉ាងតិច ៣០សង់ទីម៉ែត្រ ពីអេក្រង់កុំព្យូទ័រ បរិភោគអាហារមានតុល្យភាព សារជាតិចិញ្ចឹមគ្រប់គ្រាន់សម្រាប់រាងកាយយើងផងដែរ៕
អត្ថបទ និងរូបភាព៖ លោក អ៊ុន ណារាជ្យ
