នៅបរិវេណវត្តរាជបូណ៌ ស្ថិតក្នុងភូមិវត្តបូព៌ សង្កាត់សាលាកំរើក ក្រុងសៀមរាប កាលពីរសៀលថ្ងៃទី០៤ ខែមិថុនា ឆ្នាំ២០២៣នេះ សម្តេចព្រះព្រហ្មរតនមុនី ពិន សែម សិរីសុវណ្ណោ គណៈមហានិកាយ នៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ ព្រមទាំងព្រះមន្ត្រីសង្ឈគ្រប់ជាន់ថ្នាក់ រួមជាមួយអាជ្ញាធរខេត្តសៀមរាប មន្ត្រីរាជការ និងគណៈគ្រប់គ្រង ក្រុមប្រឹក្សាភិបាល និងក្រុមប្រឹក្សាផ្តល់យោបល់ផ្នែកទំនាក់ទំនងសាធារណៈទាំងអស់ នៃមន្ទីរពេទ្យកុមារអង្គរ បានមូលមតិគ្នាជាឯកច្ឆន្ធ ប្រារព្ធពិធីបុណ្យផ្កាប្រាក់មហាសាមគ្គី ឆ្នាំទី១០ ដោយមានទាំងការដង្ហែអង្គផ្កាប្រាក់ផង ដើម្បីកៀរគរមូលនិធិ និង រៃអង្គាសថវិកា សម្រាប់ទ្រទ្រង់ដល់ដំណើរការប្រតិបត្តិនៃមន្ទីរពេទ្យកុមារអង្គរ ខេត្តសៀមរាប ក្នុងការផ្តល់សេវាថែទាំ និងព្យាបាលដល់កុមារកម្ពុជា។
លោក ងួន ច័ន្ទភក្ត្រា នាយកមន្ទីរពេទ្យកុមារអង្គរខេត្តសៀមរាប បានឱ្យដឹងថា៖ ពិធីបុណ្យផ្កាប្រាក់មហាសាមគ្គីនេះ យើងបានប្រារព្ធឡើងជារៀងរាល់ឆ្នាំ ដែលពេលនេះគឺជាឆ្នាំទី១០ហើយ ហើយយើងប្រមូលបានថវិកាជាបឋមចំនួន៨៩.៦៨៨ ដុល្លារសហរដ្ឋអាមេរិក ដែលការចូលរួមបរិច្ចាគថវិការបស់មហាជនទាំងក្នុងនិងក្រៅប្រទេស មកកាន់មន្ទីរពេទ្យ ពិតជាមានសារៈសំខាន់ខ្លាំងណាស់ ដើម្បីបន្តដំណើរការពិនិត្យ និងព្យាបាលជំងឺជូនដល់កុមារកម្ពុជា ព្រោះថារាល់ថ្ងៃមន្ទីរពេទ្យពឹងផ្អែកថវិកា៧០ភាគរយ បានមកពីសប្បុរជននៅក្រៅប្រទេស និង៣០ភាគរយបានមកពីសប្បុរសជនក្នុងប្រទេស។
លោកបន្តថា ក្នុងនាមមន្ទីរពេទ្យកុមារអង្គរខេត្តសៀមរាប លោកសូមថ្លែងអំណរគុណយ៉ាងជ្រាលជ្រៅជាទីបំផុត ចំពោះព្រះសង្ឃ និង ថ្នាក់ដឹកនាំខេត្ត ព្រមទាំងសប្បុរសជនទាំងអស់ ដែលបានបន្តចូលរួមបរិច្ចាគថវិកាជូនដល់មន្ទីរពេទ្យ ដើម្បីបន្តដំណើរការពិនិត្យ និងព្យាបាលជំងឺជូនដល់កុមារកម្ពុជា ហើយថវិកាដែលទទួលបានពីការរៀបចំពិធីបុណ្យផ្កាប្រាក់នេះ គឺជាចំណែកដ៏សំខាន់បំផុតដើម្បីថែរក្សាដំណើរការផ្តល់សេវាពិនិត្យ ព្យាបាល ថែទាំ សង្គ្រោះជីវិតកុមារកម្ពុជា ប្រកបដោយគុណភាព ក្តីមេត្តាករុណា និងឥតគិតកម្រៃ នៅក្នុងមន្ទីរពេទ្យកុមារអង្គរ។
លោកបន្តទៀតថា មន្ទីរពេទ្យកុមារអង្គរខេត្តសៀមរាប បានបង្កើតឡើងនៅក្នុងឆ្នាំ១៩៩៩ ក្នុងគោលដៅផ្តល់សេវាពិនិត្យ និងព្យាបាលជំងឺប្រកបដោយគុណភាព និងឥតគិតថ្លៃជូនដល់កុមារកម្ពុជា ដែលជារៀងរាល់ថ្ងៃ មន្ទីរពេទ្យទទួលការពិនិត្យនិងព្យាបាលជំងឺជូនកុមារចំនួន៣៥០នាក់ និងក្នុងមួយឆ្នាំមានចំនួនជាង១ម៉ឺននាក់ ដោយមានផ្តល់នូវសេវាកម្មជាច្រើនដូចជា៖ ការពិគ្រោះជំងឺ សម្រាកនៅមន្ទីរពេទ្យ សង្រ្គោះបន្ទាន់ វះកាត់ ព្យាបាលជំងឺមហារីក ព្យាបាលកុមារមានជំងឺភ្នែក និងសុខភាពមាត់ធ្មេញ ហើយជារៀងរាល់ឆ្នាំ មន្ទីរពេទ្យតែងតែចូលរួមជាមួយក្រសួងសុខាភិបាល ធ្វើការបណ្តុះបណ្តាលផ្នែកគិលានុដ្ឋាក គ្រូពេទ្យរាប់រយនាក់ និងបន្តសកម្មភាពចុះអប់រំសុខភាពជូនសហគមន៍នៅតាមទីជនបទជាដើម៕
អត្ថបទ និងរូបភាព៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
