អំពូលសូឡាចំនួន៣០០អំពូល ត្រូវបានបំពាក់បន្ថែមទៀត នៅតាមដងផ្លូវមុខផ្ទះប្រជាពលរដ្ឋ ក្នុងភូមិសាស្រ្តឃុំរំចេក ស្រុកបន្ទាយស្រី ខេត្តសៀមរាប ដើម្បីកាត់បន្ថយគ្រោះថ្នាក់ចរាចរណ៍ និងបង្កើនសុវត្ថិភាពក្នុងភូមិ-ឃុំពេលយប់ ដែលត្រូវបានប្រារព្ធពិធីបើកការដ្ឋានដាក់អំពូលសូឡា កាលពីរសៀលថ្ងៃទី០១ ខែមិថុនា ឆ្នាំ២០២៣ម្សិលមិញនេះ ក្រោមអធិបតីភាព ឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី ។
ឯកឧត្តម សែម សុវណ្ណនី មានប្រសាសថា ការដាក់ឲ្យប្រើប្រាស់ផ្លូវការអំពូលសូឡាបន្ថែមក្នុងភូមិសាស្រ្តឃុំរំចេកនាថ្ងៃនេះគឺបានចូលរួមចំណែកជាមួយរដ្ឋាភិបាល ធ្វើឱ្យប្រសើរឡើងដល់ភូមិឃុំមានសុវត្ថិភាពនៅតាមទីជនបទ ជាពិសេសជួយកាត់បន្ថយគ្រោះថ្នាក់ចរាចរណ៍ ងាយស្រួលក្នុងការធ្វើដំណើរទៅប្រកបមុខរបប និងធុរៈផ្សេងៗនៅពេលយប់ព្រលប់ ព្រមទាំងបានជួយលើកសោភ័ណភាពផ្លូវទៅតាមភូមិឲ្យប្រជាពលរដ្ឋជួយថែរក្សាឲ្យបានយូ ដើម្បីជាប្រយោជន៍ទៅថ្ងៃខាងមុខទៀត។
ឯកឧត្តមបន្ថែមថា រយៈកាលកន្លងមក ដោយមើលឃើញពីការលំបាកក្នុងការរស់នៅប្រចាំថ្ងៃ របស់បងប្អូនប្រជាពលរដ្ឋដោយសារតែដំបូលផ្ទះមានការធ្លុះធ្លាយនោះ ក្រុមការងារថ្នាក់ជាតិចុះមូលដ្ឋានស្រុកបន្ទាយស្រី បានជួយសាងសង់ផ្ទះធ្វើពីស័ង្កសី ជូនប្រជាពលរដ្ឋនៅមូលដ្ឋានឃុំរំចេក បានចំនួន១០៧ខ្នងផ្ទះ ដែលគ្រោងដាក់ឲ្យចូលរស់នៅជាផ្លូវការនៅខែកក្កដាខាងមុខនេះ។
តាមរបាយការណ៍លោក ឆែម សួន មេឃុំរំចេក បានឲ្យដឹងថា ក្នុងភូមិសាស្ត្រឃុំរំចេកកន្លងមក រដ្ឋបាលស្រុកបន្ទាយស្រីបានដាក់អំពូលសូឡាចំនួន២៤០អំពូល ដោយមានការឧបត្ថមពីឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី ក្នុងឆ្នាំ២០២៣នេះ និងដាក់ ៣០០អំពូលបន្ថែមទៀត នៅលើផ្លូវចំនួនពីរខ្សែប្រវែង៦ ០០០ម៉ែត្រ នៅតាមមុនផ្ទះប្រជាពរដ្ឋ ដោយភ្ជាប់ពីឃុំត្បែង ទៅឃុំព្រះដាក់ ចំងាយ ៤ ៥០០ម៉ែត្រ ដាក់ចំនួន២២៥អំពូល ភ្ជាប់ពីភូមិសាលាក្រវ៉ាន់ ទៅភូមិរំចេក ប្រវែង១ ៥០០ម៉ែត្រ ដាក់ចំនួន៧៥អំពូល ។
សូមជម្រាបថានៅទូទាំងស្រុកបន្ទាយស្រី បច្ចុប្បន្ន មានអំពូលសូឡាដើរដោយថាមពលពន្លឺព្រះអាទិត្យ សរុបចំនួន ១២៦១អំពូល បានមកពីសប្បុរសជន ក្រុមការងារថ្នាក់ជាតិចុះជួយស្រុក និងមានការចូលរួមថវិកាបដិភាគរបស់ប្រជាពលរដ្ឋ នៅក្នុងមូលដ្ឋាន ៕
អត្ថបទ និងរូបភាព៖ លោក ធន់ ពូថេ
កែសម្រួលអត្ថបទ ៖ លោក លីវ សាន្ត
