ផ្លូវដីសមួយខ្សែ ប្រវែង ៤,៥០០ម៉ែត្រ ក្នុងឃុំខ្នារសណ្ដាយ ស្រុកបន្ទាយស្រី ខេត្តសៀមរាប ត្រូវបានបើកការដ្ឋានសាងសងជាផ្លូវការ នៅព្រឹកថ្ងៃទី០១ ខែមិថុនា ឆ្នាំ២០២៣នេះ ក្រោមវត្តមានឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី ដើម្បីសម្រួលដល់ការធ្វើដំណើរ និងដឹកជញ្ជូន ផលិតផលកសិកម្ម ក៏ដូចជាទៅទទួលសេវាផ្សេងៗ ជូនប្រជាពលរដ្ឋក្នុងមូលដ្ឋាន។
បើតាមលោក រិន ឡូត អភិបាលស្រុកបន្ទាយស្រី បានអោយដឹងថា ផ្លូវដីសមួយខ្សែ ដែលបានបើកការដ្ឋានសាងសង់នេះមានប្រវែង ៤,៥០០ម៉ែត្រ ទទឹង៧ម៉ែត្រ ចាប់ពីចំណុចភូមិទួលក្រឡាញ់ តរភ្ជាប់ដល់ភូមិអូរម្នាស់ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប។ លោកថា ផ្លូវមួយនេះពីមុនជាផ្លូវរទះគោ ដោយឃើញពីការលំបាក និងសំណូមពរពីប្រជាពលរដ្ឋ ក្រុមការងារថ្នាក់ជាតិចុះមូលដ្ឋានស្រុកបន្ទាយស្រី ក៏បានផ្ដល់ផ្លូវមួយខ្សែនេះ ដើម្បីជួយសម្រួលដល់ប្រជាពលរដ្ឋទូទៅ ធ្វើដំណើរឆ្លងកាត់។
ព័ត៌មានជាតិ ថ្មីៗ
ក្នុងឱកាសនោះដែរ ឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី មានប្រសាសន៍ថា ដោយហេតុតែកង្វះខាតនៃការតភ្ជាប់ខាងផ្នែកហេដ្ឋារចនាសម្ព័ន្ធ បងប្អូនប្រជាពលរដ្ឋ តែងជួបការលំបាកក្នុងការធ្វើដំណើរ និងដឹកជញ្ជូនកសិផល ពិបាកក្នុងការទៅទទួលសេវារដ្ឋបាល សេវាសុខាភិបាល ក៏ដូចជាការបញ្ជូនកូនចៅទៅមកសាលារៀន។ ចំពោះផ្លូវមួយខ្សែនេះ ពិតជាមានសារះសំខាន់ខ្លាំងណាស់ ប្រៀបដូចសរសៃឈាមរបស់ប្រជាពលរដ្ឋ សម្រាប់ធ្វើដំណើរ និងដឹកជញ្ជូនផលិតផលកសិកម្ម ប្រចាំថ្ងៃ ដែលកន្លងមកបងប្អូនប្រជាពលរដ្ឋ តែងតែទទូចចង់បានផ្លូវមួយមួយខ្សែនេះ សម្រាប់ការធ្វើដំណើរ ប្រកមុខរបរ ចិញ្ជិមជីវិត ប្រចាំថ្ងៃរបស់របស់ពួកគាត់។ ផ្លូវមួយខ្សែនេះដែរ គឺកើតឡើងដោយសារការចូលរួមថវិការរបស់ ឯកឧត្តមផ្ទាល់ រួមជាមួយក្រុមការងារថ្នាក់ជាតិចុះមូលដ្ឋានស្រុកបន្ទាយស្រី បានចំនួន ១៦.០០០ដុល្លារ ជាពិសេសការចូលរួមសហការរបស់ប្រជាពលរដ្ឋក្នុងមូលដ្ឋាន ក្នុងការលះបង់ដី ដំណាំ មួយចំនួនក្នុងការឈូសឆាយធ្វើផ្លូវថ្មីនេះ៕
អត្ថបទ និងរូបភាព៖ លោក ធន់ ពូថេ
កែសម្រួល៖ អ៊ុន ណារាជ្យ
