ក្រុមការងារនៃក្រុមប្រឹក្សាជាតិគាំពារសង្គម បានសាកសួរនិងផ្ដល់ព័ត៌មានលម្អិតបន្ថែមអំពីដំណើរការនៃការកំណត់អត្តសញ្ញាណ និងអត្ថប្រយោជន៍នៃបណ្ណសមធម៌ ដល់ប្រជាពលរដ្ឋ នៅភូមិធម្មជាតិរុនតាឯកស្រុកបន្ទាយស្រី ខេត្ដសៀមរាប។ ការចុះទស្សនៈកិច្ច និងផ្ដល់ព័ត៌មាននេះ ធ្វើឡើងកាលពីរសៀលថ្ងៃទី៣០ ខែឧសភា ឆ្នាំ២០២៣នេះ។
ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការប្រតិបត្តិនៃក្រុមប្រឹក្សាជាតិគាំពារសង្គម មានប្រសាសន៍ថា ដោយមានការចង្អុលបង្ហាញ និងឱ្យមានការយកចិត្តទុកដាក់ខ្ពស់ លើសុខទុក្ខ និងផ្តល់ការគាំពារសេវាសង្គមរយៈពេលវែងដល់បងប្អូនប្រជាពលរដ្ឋ ដែលព្រមផ្លាស់ប្តូរលំនៅដ្ឋានពីតំបន់រមណីយដ្ឋានអង្គរ និងតាមមាត់ស្ទឹងសៀមរាប មកកាន់ភូមិធម្មជាតិរុនតាឯក ស្រុកបន្ទាយស្រី ខេត្តសៀមរាប ក្រុមការងារបានធ្វើយយុទ្ធនាការ ដោយមានការចូលរួមពីតំណាងក្រសួង-ស្ថាប័នជំនាញនិងពាក់ព័ន្ធនានាជាច្រើនរូប ចុះសួរសុខទុក្ខនិងផ្ដល់ព័ត៌មាននូវសារៈសំខាន់ពីប័ណ្ណសមធម៌ ក៍ដូចផ្ដល់សេវាគាំពារសង្គមនេះផងដែរ។
ឯកឧត្ដមបន្ដថា ក្រុមប្រឹក្សាជាតិគាំពារសង្គមដែលជាសេនាធិការរបស់រាជរដ្ឋាភិបាលក្នុងការសម្របសម្រួល និងតម្រង់ទិសរួមលើការងារគាំពារសង្គម បានដឹកនាំសម្រួបសម្រួលយ៉ាងសកម្ម ក្នុងការធ្វើយ៉ាងណាឱ្យបងប្អូនប្រជាពលរដ្ឋទាំងអស់ដែលព្រមមករស់នៅជាក់ស្តែងនៅភូមិធម្មជាតិរុនតាឯកទទួលបានការគាំពារ និងជាពិសេសអាចទទួលបានការឧត្តម្ភសាច់ប្រាក់ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ក៏ដូចជាប្រាក់ឧត្តម្ភពីកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំជាដើម ដែលជាការណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។ នាឱកាសនោះឯកឧត្ដម រស់ សីលវ៉ា ក៍បានដឹកនាំក្រុមការងារពិនិត្យមើលវឌ្ឍនភាពនៃការអភិវឌ្ឍន៍រីកចំរើននៅភូមិធម្មជាតិរុនតាឯកផងដែរ។
សូមបញ្ជាក់ថា បណ្ណសមធម៌ ឬបណ្ណក្រីក្រនេះ មានអត្ថប្រយោជន៍ជាច្រើន រួមមានការទទួលបានការពិនិត្យ និងព្យាបាលជំងឺនៅពេទ្យរដ្ឋដោយមិនចាំបាច់បង់ថ្លៃក្រោមមូលនិធិសមធម៌សុខាភិបាល កម្មវិធីឧបត្ថម្ភសាច់ប្រាក់ជូនស្រីមានផ្ទៃពោះ និងកុមារអាយុក្រោម២ឆ្នាំ និងជាពិសេសប្រាក់ឧបត្ថម្ភប្រចាំខែពីកម្មវិធីឧបត្ថម្ភសាច់បា្រក់ជូនគ្រួសារក្រីក្រ និងងាររងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ជាដើម៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
