គណៈកម្មាធិការបក្សស្រុកស្រីស្នំ ខេត្តសៀមរាប នៅព្រឹកថ្ងៃទី២៨ ខែមិថុនា ឆ្នាំ២០២៣នេះ បានរៀបចំបើកវគ្គបណ្តុះបណ្តាលច្បាប់ បទបញ្ជា និងនីតិវិធី ស្តីពីការ បោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ដល់ភ្នាក់ងារគណបក្ស និងអ្នកសង្កេតការណ៍ ចំនួន៤០២នាក់ ដើម្បីមានសមត្ថភាពគ្រប់គ្រាន់សម្រាប់ចូលរួមពិនិត្យដំណើរការបោះឆ្នោត និងរាប់សន្លឹកឆ្នោតនាពែលខាងមុខ ក្នុងន័យធានាឲ្យបាននូវភាពត្រឹមត្រូវ។
បើតាមលោក ហ៊ន់ ឫទ្ធិ ប្រធានគណៈកម្មាធិការបក្សស្រុក បានឲ្យដឹងថា វគ្គបណ្តុះបណ្តាលច្បាប់ បទបញ្ជា និងនីតិវិធី ស្ដីពីការបោះឆ្នោតដែលរៀបចំឡើងនេះ មានរយៈពេលពីរថ្ងៃ ចាប់ពីថ្ងៃទី២៨-២៩ ខែមិថុនា ឆ្នាំ២០២៣ ចែកជាបីលើក ក្នុងមួយលើក២ឃុំ ដោយសិក្ខាមដែលចូលរួម គឺជាភ្នាក់ងារគណបក្ស សមាគមនារី និង គ.២៧៨ ដោយមានលោក យុន លីណេ សមាជិកគណៈកម្មាធិការគណបក្សខេត្ត និងជាគ្រូឧទ្ទេសនៃក្រុមការងារយុវជនគណបក្សខេត្ត និងគ្រូជំនួយថ្នាក់ខេត្ត និងស្រុក ជាគ្រូឧទ្ទេសផងដែរ។
ក្នុងឱកាសនោះដែរ ឯកឧត្តម សយ ទិត្យាវង្ស សមាជិកគណៈអចិន្ត្រៃយ៍ នៃគណៈកម្មាធិការគណបក្សខេត្ត បានមានប្រសាសន៍ថា វគ្គបណ្តុះបណ្តាលនាពេលនេះ ពីតជាមានសារៈសំខាន់ណាស់ ក្នុងការជួយជំរុញដល់ភ្នាក់ងារគណបក្ស និងអ្នកសង្កេតការណ៍ឲ្យមានសមត្ថភាពគ្រប់គ្រាន់សម្រាប់ចូលរួមពិនិត្យដំណើរការបោះឆ្នោត និងរាប់សន្លឹកឆ្នោត ក្នុងការធានានូវភាពត្រឹមត្រូវ សេរីភាព តម្លាភាព និងយុត្តិធម៌ ព្រមទាំងលើកកម្ពស់លទ្ធិប្រជាធិប តេយ្យ សេរីពហុបក្ស នៃការបោះឆ្នោតនៅកម្ពុជា។ ជាមួយគ្នានោះ ឯកឧត្តម ក៏បានផ្តាំផ្ញើដល់សិក្ខាកាមទាំងអស់ ត្រូវរក្សារបៀបរៀបរយ យកចិត្តទុកដាក់ស្ដាប់ការធ្វើបទបង្ហាញដោយគ្រូឧទ្ទេស និងយកចំណេះដឹងពីវគ្គបណ្តុះបណ្តាលដ៏មានសារៈសំខាន់នេះ ទៅអនុវត្តនៅតាមមូលដ្ឋានរបស់ខ្លួន ក្នុងការគោរពតាមច្បាប់ បទបញ្ជា និងនីតិវិធី និងប្រតិទិនរបស់ គ.ជ.ប. នៅពេល បោះឆ្នោតជ្រើសតាំងតំណាងរាស្រ្តនីតិកាលទី៧ ដែលនឹងប្រព្រឹត្តទៅ នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ឱ្យទទួលបានជោគជ័យ៕
អត្ថបទ និងរូបភាព៖ លោក ធន់ ពូថេ
កែសម្រួល៖ អ៊ុន ណារាជ្យ
