គម្រោងសាងសង់ផ្លូវមេតុងអាមេ១ខ្សែ និងគម្រោងជួសជុលផ្លូវដីសក្រាលគ្រោះក្រហម២ខ្សែ ស្ថិតក្នុងឃុំកំពង់ក្តី និងឃុំគោកធ្លកលើ ក្នុងស្រុកជីក្រែង ខេត្តសៀមរាប ដែលជាគម្រោងមូលនិធិឃុំសង្កាត់ឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅថ្ងៃទី២៨ ខែមិថុនា ឆ្នាំ២០២៣ ខណៈដែលអាជ្ញាធរស្រុក និងឃុំ បានណែនាំដល់ម្ចាស់ក្រុមហ៊ុនដែលទទួលបានសិទ្ធក្នុងការងារជួសជុលផ្លូវទាំង៣ខ្សែខាងលើ ត្រូវមានទំនួលខុសត្រូវឲ្យបានខ្ពស់ ក្នុងការជួសជុលផ្លូវទាំងនេះ ធ្វើយ៉ាងណាឲ្យស្របតាមលក្ខខណ្ឌដែលមានក្នុងកិច្ចសន្យា។
មានប្រសាសន៍ក្នុងឱកាសនោះ លោក ម៉ូវ ជា អភិបាលរងស្រុកជីក្រែង បានណែនាំដល់ម្ចាស់ក្រុមហ៊ុនម៉ៅការដែលទទួលបានសិទ្ធសាងសង់ និងជួសជុល ធ្វើយ៉ាងណាត្រូវមានការទទួលខុសត្រូវចំពោះក្រុមការងារ ដោយអនុវត្តទៅតាមលក្ខខណ្ឌដែឡបានសន្យា ធ្វើយ៉ាងណាឲ្យការងារសាងសង់នឹងជួសជុលនេះសម្រេចបានទៅតាមការគ្រោងទុក មានគុណភាពល្អ ដើម្បីឲ្យទាន់ពេលវា និងតម្រូវការប្រជាពលរដ្ឋ។ ក្នុងនោះដែរគ្រប់ក្រុមហ៊ុនទាំងអស់ត្រូវមានការសហការគ្នាឲ្យបានជិតស្និតក្នុងការអនុវត្តការងារនេះ ហើយអាជ្ញាធរមូលដ្ឋានត្រូវតាមដានជាប្រចាំទៅលើការងារសាងសង់នឹងជួសជុលផ្លូវក្នុងមូលដ្ឋានរបស់ខ្លួន ហើយប្រសិនបើក្រុមហ៊ុនណាមិនអនុវត្តតាមគោលការ អាជ្ញាធរឃុំត្រូវមានវិធានការចាំបាច់ណាមួយក្នុងការដោះស្រាយ និងអាចរាយការណ៍មកកាន់អាជ្ញាធរស្រុកដោះស្រាយបន្តក្នុងករណីចាំបាច់។
បើតាមគណៈកម្មការលទ្ធកម្មឃុំកំពង់ក្តី បានឲ្យដឹងថា គម្រោងដែលបានបើកការដេញថ្លៃនាពេលនេះ គឺគម្រោងសាងសង់ផ្លូវបេតុងអាមេ១ខ្សែ ប្រវែង ១៥២ម៉ែត្រ ទទឹង៥ម៉ែត្រ កម្រាស់សមេតុង០.១៥ម៉ែត្រ សាងសង់លូកាត់ផ្លូវចំនួន២កន្លែង លូមូលភ្លោះមុខកាត់១ម៉ែត្រ ប្រវែង៦ម៉ែត្រ ចំនួន១កន្លែង សាងសង់លូមូលទោលមុខកាត់០.៦ម៉ែត្រ ប្រវែង៦ម៉ែត្រ ចំនួន១កន្លែង ដាក់លូការពារផ្លូវមុខកាត់០.៨ម៉ែត្រ ចំនួន៤កង់ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១១៨.៣៩៦.៥៣៩រៀល ដោយមានក្រុមហ៊ុនចូលរួមដេញថ្លៃចំនួនប្រាំ។ ជាលទ្ធផលបានទៅលើក្រុមហ៊ុន វីរៈ ៩៩៩៩ ក្នុងតម្លៃ ១១៦.៧០០.០០០រៀល។
ព័ត៌មានជាតិ ថ្មីៗ
ដោយឡែកគណៈកម្មការលទ្ធកម្មឃុំគោកធ្លកលើ បានឲ្យដឹងដែលថា គម្រោងដែលបានបើកការដេញថ្លៃនាពេលនេះ គឺគម្រោងជួសជុលផ្លូវដីសក្រាលគ្រោះក្រហម២ខ្សែ ប្រវែង ១៣៨៥ម៉ែត្រ ជើងទេM ១.៥ម៉ែត្រ លូមូលកាត់ផ្លូវ១កន្លែង ដាក់លូការពារផ្លូវមុខកាត់០.៨ម៉ែត្រ ចំនួន៤កង់ និងស្លាកសញ្ញាគម្រោង១កន្លែង ក្នុងតម្លៃប៉ាន់ស្មាន ១០២.១៨៨.១៦៩ រៀល ដោយមានក្រុមហ៊ុនចូលរួមដេញថ្លៃចំនួនប្រាំ។ ជាលទ្ធផលបានទៅលើក្រុមហ៊ុន ម៉ូវ ស៊ីថាយ MST ក្នុងតម្លៃ ១០១.១០៥.១០០រៀល។
សូមជម្រាបថា ក្នុងការដេញថ្លៃនេះដែរមន្រ្តីបច្ចេកទេសសាលាខេត្ត គណៈកម្មការលទ្ធកម្មឃុំ ក្រុមហ៊ុនម៉ៅការ អ្នកសារព័ត៌មាន បានទទួលស្គាល់ថាការដេញថ្លៃ សម្រាប់គម្រោងមូលនិធិឃុំទាំងពីរនេះ ថាពិតជាបានអនុវត្តត្រឹមត្រូវតាមនិតិវិធីរបស់សៀវភៅនែនាំស្ដីពីគម្រោងអនុវត្តមូនិធីឃុំសង្កាត់។ ជាមួយគ្នានោះ ក្រុមហ៊ុនទាំង២ ដែលទទួលបានការម៉ៅការគម្រោងផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងអនុវត្តការងារសាងសង់ក្រោយចុះកិច្ចសន្យាជាមួយឃុំប្រំាពីរថ្ងៃ ដែលធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា៕
អត្ថបទ និងរូបភាព៖ លោក ហ៊ុន ឆៃលាង
កែសម្រួល៖ អ៊ុន ណារាជ្យ
