អគារមណ្ឌលសុខភាពមួយខ្នង មានទទឹង ១៥ម៉ែត្រ និងបណ្តោយ ២០ម៉ែត្រ ដែលបានបំពាក់សំភារៈបរិក្ខាដូចជា ប្រព័ន្ឋចំរោះទឹកស្អាត សំភារៈអគ្គីសនី និងបរិក្ខាពេទ្យ តសំយ៉ាប ចាក់ដីបំពេញធ្លាខាងមុខ ដែលចំណាយថវិកាសរុបជិត ៨ម៉ឺនដុល្លារ ក្នុងនោះ ៧ម៉ឺនដុល្លារ ជាថវិកាផ្ទាល់របស់ ឯកឧត្តម អ្នកឧកញ៉ា បណ្ឌិត សៀង ណាំ និងលោកជំទាវ និងមួយចំនួនទៀតបានពីសប្បុរសជន ត្រូវបានកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការនៅព្រឹកថ្ងៃទី២៩ ខែមិថុនា ឆ្នាំ២០២៣នេះ ក្រោមអធិបតីភាព ឯកឧត្តម អ្នកឧកញ៉ា បណ្ឌិត សៀង ណាំ តំណាងរាស្ត្រមណ្ឌលសៀមរាប និងលោក ពិន ប្រាកដ អភិបាលរងខេត្ត ព្រមទាំងវត្តមានថ្នាក់ដឹកនាំនៃមន្ទីរសុខាភិបាលនៃរដ្ឋបាលខេត្ត លោកអភិបាលស្រុក អាជ្ញាធរមូលដ្ឋាន និងប្រជាពលរដ្ឋជាច្រើនរូប។
បើតាមលោក សូរ ប្លាតុង អភិបាលស្រុកប្រាសាទបាគង បានឲ្យដឹងថា ឃុំកំពង់ភ្លុក ពីមុនមានតែប៉ុស្តិ៍សុខភាពតូចមួយធ្វើពីឈើបណ្តែតលើផ្ទៃទឹក និងមានសភាពចាស់ទ្រុឌទ្រោមខ្លាំងពិបាកក្នុងការផ្តល់សេវាសុខាភិបាលជូនប្រជាពលរដ្ឋជាខ្លាំង ដោយមានការទទូចស្នើសុំពីបងប្អូនប្រជាពលរដ្ឋផង និងដោយបានការយគិតគូរយកចិត្តទុកដាក់ពី ឯកឧត្តម សៀង ណាំ ឯកឧត្តមក៏ទទួលយក និងដោះស្រាយជូននូវអគារថ្មនេះឡើង។
មានប្រសាសន៍ក្នុងឱកាសនោះ លោក ពិន ប្រាកដ អភិបាលរងខេត្ត បានថ្លែងអំណរអរគុណយ៉ាងជ្រាលជ្រៅចំពោះ អ្នកតំណាងរាស្រ្តមណ្ឌលខេត្តសៀមរាប និងលោកជំទាវព្រមទាំងបុត្រាបុត្រី ដែលតែងតែបរិច្ចាគធនធានផ្ទាល់ខ្លួន ក៏ដូចជាគៀគរសប្បុរសជននានា ដើម្បីបានផ្តល់នូវជំនួយមនុស្សធម៌ដ៏ថ្លែថ្លា សម្រាប់ប្រជាជនកម្ពុជា ពិសេសខេត្តសៀមរាប ដែលសកម្មភាពទាំងនេះ គឺពិតជាបានរួមចំណែកមួយក្នុងការលើកកម្ពស់ដល់ វិស័យសេដ្ឋកិច្ច សង្គមកិច្ចក្នុងខេត្តផងដែរ។ ហើយមណ្ឌលសុខភាពថ្មីនេះ នឹងជួយសម្រួលដល់ការលំបាកសម្រាប់បងប្អូនប្រជាពលរដ្ឋក្នុងមូលដ្ឋានដែលពីមុនមិនធ្លាប់មាន។ ជាមួយគ្នានោះ លោកក៏បានស្នើដល់បងប្អូនប្រជាពលរដ្ឋ អាជ្ញាធរភូមិ ឃុំ និងមន្រ្តីសុខាភិបាលដែលនៅទីនេះ ត្រូវចូលរួមថែករក្សាអាគារមណ្ឌលសុខភាពនេះឱ្យបានគង់វង្សយូរអង្វែងតទៅ ព្រោះវាជាទ្រព្យសម្បត្តិរួមរបស់យើងទាំងអស់គ្នាសម្រាប់បំរើសេវាសុខភាពដល់យើងទាំងអស់គ្នា។
មានមតិសំណេះសំណាលនាពេលនោះដែរ ឯកឧត្តម សៀង ណាំ បានជម្រុញដល់បងប្អូនប្រជាពលរដ្ឋឱ្យគិតគូពីសុខភាព ព្រោះសុខភាពល្អផ្តើមពីការរស់នៅប្រកបដោយអនាម័យជាប្រចាំ អនាម័យនាំមកនូវសុខភាពល្អដែលជាកត្តាចាំបាច់សម្រាប់ជីវិតម្នាក់ៗ និងជួយកាត់បន្ថយទាំងការចំណាយថវិកាក្នុងគ្រួសារក្នុងការចំណាយទៅលើថ្នាំសង្កូវ និងមិនប៉ះពាល់ដល់ពេលវេលានៃការរកទទួលទាន។ ឯកឧត្តមថា មណ្ឌលសុខភាពថ្មីនេះជាសមិទ្ឋផលមួយក្នុងចំណោមសមិទ្ឋផលនានាជាច្រើនដែលបានបង្កើតឡើងក្នុងខេត្តសៀមរាប។ និយាយដោយឡែក និងនៅទូទាំងប្រទេសនិយាយជារួម សមិទ្ឋផលធំៗទាំងអស់អាចកើតមាន និងរីកចម្រើនទៅបាន គឺដោយសារប្រទេសជាតិមានសុខសន្តិភាព តាមរយៈគោលនយោបាយឈ្នះ ឈ្នះ ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រី បាននាំមកនូវការបង្រួបបង្រួមជាតិផ្សះផ្សារជាតិ និងបាននាំមកនូវសុខសន្តិភាពពេញលេញ រស់នៅក្រោមដំបូលសន្តិភាពតែមួយ រួមគ្នាអភិវឌ្ឍប្រទេសជាតិរីចម្រើនលើគ្រប់វិស័យ មិនអាចនឹងគណនាបានអស់។ ហេតុនេះសូមបងប្អូនយាយាតាប្រជាពលរដ្ឋគ្រប់រូបត្រូវរួមគ្នាការពារសន្តិភាពមិនត្រូវឱ្យសន្តិភាពនេះ ត្រូវបានបំផ្លាញដោយជនណាម្នាក់នោះទេ ទោះជាអស់តម្លៃណាក៏ដោយ និងចូលរួមថែរក្សាការពារនូវរាល់សមិទ្ឋផលទាំងឡាយរបស់ជាតិ ធ្វើយ៉ាងណាឱ្យសមិទ្ឋិផលដែលយើងសម្រេចបានដោយឆ្លងកាត់ការលំបាក និងឧបសគ្គគ្រប់បែបយ៉ាងទម្រាំបានដូចសព្វថ្ងៃនេះ ឱ្យបានស្ថិតនៅគង់វង្សជាអមតៈ។
ឯកឧត្តមតំណាងរាស្ត្រ ក៏បានអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតគ្រប់រូប អញ្ជើញទៅបោះឆ្នោតជ្រើសតាំងតំណាងរាស្ត្រនិតិកាលទី៧នៃរដ្ឋសភានៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ឱ្យបានគ្រប់ៗគ្នា ដើម្បីបន្តជម្រុញនិងលើកកម្ពស់លទ្ឋិប្រជាធិបតេយ្យនិងការអភិវឌ្ឍប្រទេសជាតិឱ្យកាន់តែមានការរីកចម្រើនថែមទៀត៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
