នៅព្រឹកថ្ងៃទី០១ ខែកក្កដា ឆ្នាំ២០២៣ សម្ដេចពិជ័យសេនា ទៀ បាញ់ បេក្ខភាពតំណាងរាស្ត្រមណ្ឌលសៀមរាប និងប្រធានក្រុមការងាររាជរដ្ឋាភិបាលចុះមូលដ្ឋានខេត្ដសៀមរាប បានដឹកនាំសមាជិកគណបក្សប្រជាជនកម្ពុជា ក្នុងខេត្តសៀមរាប ដែលមានសមាជិកចូលរួមជាង១ម៉ឹននាក់ ដែលពិធីនេះប្រព្រឹត្តទៅនៅក្នុងបរិវេណមុខសាលាខេត្តសៀមរាប។
នាឱកាសនោះ សម្ដេចពិជ័យសេនា ទៀ បាញ់ មានប្រសាសន៍ថា ការជួបជុំគ្នាដង្ហែក្បួនឃោសនារកសម្លេងឆ្នោតនៅពេលនេះ គឺបង្ហាញអំពីការរួមនៃកម្លាំងសាមគ្គី ដែលកើតចេញពីសមាជិក សមាជិកា នៃគណបក្សប្រជាជនកម្ពុជា ហើយក៏ជាការបង្ហាញឲ្យឃើញនូវឧត្ដមភាព កិត្យានុភាពរបស់សមាជិកសមាជិកា ដើម្បីបង្ហាញដល់បងប្អូនប្រជាពលរដ្ឋ ក៏ដូចជាអ្នកពាក់ព័ន្ធនានា ឲ្យយល់ និងឃើញច្បាស់ អំពីកំលាំងសាមគ្គីដែលគណបក្សប្រជាជនកម្ពុជា បាននាំមកនូវភាពជោគជ័យ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស។
សម្ដេចពិជ័យសេនា ទៀ បាញ់ បានថ្លែងអំណរគុណចំពោះសមាជិកសមាជិការបស់គណបក្សប្រជាជនកម្ពុជា ដែលមានវត្តមាននាឱកាសនេះ និងបានគោរពថ្លែងអំណរគុណដ៏ជ្រាលជ្រៅជាទីបំផុតចំពោះសមាជិកសមាជិកាគណបក្សប្រជាជនទាំងអស់ ព្រមទាំងប្រជា ពលរដ្ឋដែលតែងតែគាំទ្រគណបក្សប្រជាជនកម្ពុជា ជារៀងរហូតមក និងសូមមេត្តាបន្តអញ្ជើញទៅបោះឆ្នោតគាំទ្រជូនគណបក្សប្រជាជនកម្ពុជាជាថ្មីទៀត ដែលមានលេខរៀងទី១៨ នៅលើសន្លឹកឆ្នោត ព្រោះគណបក្សប្រជាជនកម្ពុជា ដែលដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន គឺជាគណបក្ស ដែលបានបញ្ចប់សង្គ្រាមដ៏រុាំរ៉ៃនៅកម្ពុជា បាននាំមកនូវសន្តិភាព និងការឯកភាពជាតិពេញលេញ ហើយបាននិងកំពុងដឹកនាំកសាងអភិវឌ្ឍន៍ប្រទេសជាតិឲ្យមានការរីកចម្រើនរុងរឿង លើគ្រប់វិស័យ។
សមាជិកសមាជិកាដែលបានចូលរួមនាឱកាសនោះដែរ បានសម្ដែងមោទកភាពដែលខ្លួនមានគណបក្សប្រជាជនកម្ពុជាដឹកនាំប្រទេស និងមានថ្នាក់ដឹកនាំល្អ ដែលធ្វើឱ្យប្រទេសជាតិមានការអភិវឌ្ឍន៍មានការរីកចំរើនជាបបន្ដបន្ទាប់។ ប្រជាពលរដ្ឋមានក្តីសង្ឃឹម និងស្នាមញញឹម ដែលកើតចេញពីស្ថិរភាព សន្តិភាព និងការយកចិត្តទុកដាក់ពីរាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា។ ពួកគាត់នឹងទៅបោះឆ្នោតឲ្យមេដឹកនាំគណៈបក្សរបស់ខ្លួន ដែលបានបង្កើតឱ្យមានសន្តិភាព និងការអភិវឌ្ឍន៍ ដែលគ្មានគណៈបក្សណាអាចប្រៀបផ្ទឹមបាន។
ក្នុងឱកាសនោះដែរ សម្ដេចពិជ័យសេនា ទៀ បាញ់ បានដឹកនាំបញ្ជាក្នុងការដង្ហែក្បួន បើកយុទ្ធនាការឃោសនាបោះឆ្នោតនៅបណ្ដាស្រុកក្នុងខេត្តសៀមរាប ប្រកបដោយភាពអធិកអធម និងសប្បាយរីករាយ ក្រោមការគាំទ្រពីប្រជាពលរដ្ឋនៅតាមដងផ្លូវ ដើម្បីត្រៀមទទួលយកជ័យជំន្នះ នៅក្នុងការ បោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ៕
