លោក នីម វាន់សំ ប្រធានគណ:កម្មការរៀបចំការបោះឆ្នោតខេត្តសៀមរាប បានឲ្យដឹងថា ការឃោសនារកសំឡេងឆ្នោតឆ្នាំ២០២៣ ក្នុងរយៈពេលបីថ្ងៃនេះ បានដំណើរការយ៉ាងរលួន ដែលមកដល់ថ្ងៃនេះ មានគណបក្សនយោបាយចំនួនបី បានធ្វើយុទ្ធនារួមមាន៖ គណបក្សប្រជាជនកម្ពុជា គណបក្សខ្មែររួបរួមជាតិ គណបក្សស្ដ្រីដើម្បីស្រ្ដី ប៉ុន្ដែសកម្មភាពយុទ្ធនាការធំដែលមានមនុស្សរាប់ម៉ឺនាក់ចូលរួមដង្ហែក្បួន គឺមានតែគណបក្សប្រជាជនកម្ពុជាតែប៉ុណ្ណោះ ក្រៅពីនោះមានតែធ្វើសកម្មភាពតូចៗ និងធ្វើសកម្មភាពចែកខិត្ដប័ណ្ណ។
លោកបានបន្ដថា ការឃោសនាបោះឆ្នោតមកដល់ថ្ងៃនេះ មិនមានភាពមិនប្រក្រតីអ្វីកើតឡើងនោះឡើយ ពោលរយៈពេល បីថ្ងៃនេះ ដំណើរបានយ៉ាងល្អប្រសើរ ដោយមានសមត្ថកិច្ចជួយសម្រួលគ្រប់គោលដៅទាំងអស់។ ជាមួយគ្នានោះ លោកបានអំពាវនាវដល់គណបក្សនយោបាយទាំងអស់ ត្រូវឱ្យគោរពនិតិវិធីដែល គ.ជ.ប បានចែង ហើយបើគណបក្សនយោបាយណាមួយចង់ធ្វើយុទ្ធនាការដង្ហែររកសំលេងគាំទទ្ររបស់ខ្លួនក្នុងការបោះឆ្នោតឆ្នាំ២០២៣នេះ ត្រូវជូនដំណឹងដល់គខបឱ្យបានត្រឹមត្រូវ ដើម្បីគណៈកម្មការរៀបចំការបោះឆ្នោតខេត្ដជួយសម្រួលកុំឱ្យមានបញ្ហាអ្វីកើតឡើង។ ជាមួយគ្នានោះ លោកក៍ស្នើរសល់អ្នកគាំទ្រគណបក្សនិមួយៗត្រូវធ្វើការអត់ធ្មត់ បើសិនបើការដង្ហែរក្បួនបានប៉ះគ្នានៅតាមដងផ្លូវ។
លោក នីម វាន់សំ បានបញ្ជាក់ថា សម្រាប់ការឃោសនារកសំលេងឆ្នោតជ្រើសរើសតំណាងរាស្ដ្រអាណត្ដិទី៧ ឆ្នាំ២០២៣នេះ មានរយៈពេល២១ថ្ងៃ ដោយបានធ្វើឡើងចាប់ពីថ្ងៃទី១-២១ ខែកក្កដា ឆ្នាំ២០២៣ ក្នុងសម្រាប់មណ្ឌលសៀមរាប មានគណបក្សចំនួន១៤ បានឈឈ្មោះបោះឆ្នោត ប៉ុន្ដែចាប់ពីថ្ងៃទី១-៣ ខែកក្កដានេះ មានតែគណបក្សបីប៉ុណ្ណោះ បានធ្វើការឃោសនារកសំឡេងឆ្នោត។ ហើយដើម្បីធានាបាននូវបរិយាកាសសន្តិសុខ សុវត្ថិភាព និងសណ្តាប់ធ្នាប់ល្អ គ្មានការបំភិតបំភ័យ គ្មានការគំរាមកំហែង និងគ្មានអំពើហិង្សាណាមួយនោះ គ.ជ.ប បានណែនាំដល់លេខាធិការដ្ឋានសន្តិសុខបោះឆ្នោតរាជធានីខេត្ត រៀបចំការបោះឆ្នោត គណៈកម្មការឃុំសង្កាត់រៀបចំការបោះឆ្នោត ឱ្យយកចិត្តទុកដាក់សហការអនុវត្តតាមគោលការណ៍ និងវិធានការយ៉ាងត្រឹមត្រូវបំផុត។ ដើម្បីសន្តិសុខ និងសុវត្ថិភាពក្នុងពេលបោះឆ្នោតខាងមុខនោះ គឺត្រូវបានចាត់ចែងរៀបចំកម្លាំងនគរបាល កងរាជអាវុធហត្ថ និងកងយោធពលខេមរភូមិន្ទឱ្យបំពេញភារកិច្ចជាភ្នាក់ងារសន្តិសុខបោះឆ្នោតឱ្យបានល្អប្រសើរផងដែរ។ពង្រឹងកិច្ចសហការឱ្យបានជាប់ជាប្រចាំជាមួយគណៈបញ្ញាការ ឯកភាពរដ្ឋបាលរាជធានី ខេត្ត ដែលមានស្នងការដ្ឋាននគរបាលរាជធានី ខេត្ត ជាសេនាធិការ ពិសេសកម្លាំង ការពារក្នុងពេលឃោសនាបោះឆ្នោត ការពារទីស្នាក់ការ ការពារការិយាល័យបោះឆ្នោត និង ការិយាល័យរាប់សន្លឹកឆ្នោត ក្នុងករណីមានការអុកឡុករំខាន ការគំរាមកំហែង ឬការប្រព្រឹត្ត អំពើល្មើសច្បាប់ផ្សេងៗ៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ