នារសៀលថ្ងៃទី០៣ ខែកក្កដា ឆ្នាំ២០២៣ លេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្តសៀមរាប បានរៀបចំបើកកិច្ចប្រជុំប្រចាំឆមាសទី១ ឆ្នាំ២០២៣ ដើម្បីពិភាក្សាលើការងារត្រៀមបំរុង បង្ការ និងឆ្លើយតបលើការងារគ្រប់គ្រងគ្រោះមហន្តរាយ ដោយសារគ្រោះធម្មជាតិ និងឧបទ្ទវហេតុផ្សេងៗតាមបណ្តាស្រុកក្រុងទាំង១២ ក្នុងទូទាំងខេត្ត ក្រោមអធិបតីភាព លោក អ៊ឹង គឹមលាង អភិបាលរងខេត្ត និងជាប្រធានលេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្ត (គ.គ.ម.ខ) និងវត្តមានលោក លោកស្រីជាថ្នាក់ដឹកនាំ តំណាងមន្ទីរអង្គភាពស្ថាប័ននានាក្នុងខេត្ត អាជ្ញាធរស្រុកក្រុងទាំង១២ ផងដែរ។
នាឱកាសនោះដែរ បន្ទាប់ពីបានស្តាប់របាយការណ៍អំពីការងារអនុវត្តការងារគ្រប់គ្រងគ្រោះមហន្តរាយរបស់ គ.គ.ម.ខ អង្គប្រជុំក៏បានពិភាក្សាទៅលើបញ្ហាប្រឈមទៅនឹងគ្រោះថ្នាក់ធម្មជាតិដោយរន្ទៈបាញ់ ការត្រៀមដោះស្រាយស្រូវពូជសម្រាប់ការស្តារឡើងវិញដោយសារគ្រោះរាំងស្ងួតក្នុងរដូវវស្សា ដើម្បីសាបព្រោះឱ្យទាន់រដូវ ពិភាក្សាទៅលើផលប៉ះពាល់នៃប្រឡាយរំដោះទឹកជំនន់តាមបណ្តាស្រុកដោយសារការដាក់លូមិនត្រូវតាមបច្ចេកទេស ឬចាក់ដីលុបបិទមុខទឹក និងពន្លឿនការផ្តល់របាយការណ៍បឋមឱ្យបានលឿន និងតាមដានស្រង់ទិន្នន័យឱ្យបានច្បាស់លាស់ក្នុងករណីមានគ្រោះមហន្តរាយកើតឡើងក្នុងមូលដ្ឋាន។
មានមតិបូកសរុបកិច្ចប្រជុំ លោក អ៊ឹង គឹមលាង បានស្នើដល់អាជ្ញាធរក្រុងស្រុកត្រូវរូតរះធ្វើរបាយការណ៍បឋមឱ្យបានលឿនអំពីករណីគ្រោះធម្មជាតិ ឬឧបទ្ទេវហេតុផ្សេងៗក្នុងមូលដ្ឋានរបស់ខ្លួន ផ្តល់មកលេខាធិការដ្ឋានគ្រប់គ្រងគ្រោះមហន្តរាយខេត្ត និងបន្តតាមដានស្រង់ស្ថិតិលំអិត ច្បាស់លាស់នៅពេលបន្តបន្ទាប់ ដើម្បីក្រុមការងារលេខាធិការដ្ឋានធ្វើរបាយការណ៍រាយការណ៍ជូនទៅគណៈកម្មាធិការជាតិគ្រប់គ្រងគ្រោះមហន្តរាយ បានជ្រាប និងដើម្បីមានវិធានការដោះស្រាយ និងឆ្លើយតបបានទាន់ពេលវេលាជូនទៅបងប្អូនប្រជាពលរដ្ឋដែលរងផលប៉ះពាល់ដោយគ្រោះមហន្តរាយផ្សេងៗ។ បន្ថែមពីនេះអាជ្ញាធរស្រុកក្រុងឃុំសង្កាត់ ត្រូវពង្រឹងការផ្តល់របាយការណ៍តាមប្រព័ន្ឋបញ្ចូលព័ត៌មានទាន់ហេតុការណ៍ (PRISM) និងប្រព័ន្ឋថ្មី kobo tool box តាមការណែនាំរបស់គណៈកម្មាធិការជាតិគ្រប់គ្រងគ្រោះមហន្តរាយ និងរបាយការណ៍ប្រចាំខែ ឆមាស និងប្រចាំឆ្នាំជូនថ្នាក់ដឹកនាំខេត្ត និងថ្នាក់ដឹកនាំជាតិបានទាន់ពេលវេលា។
ព័ត៌មានជាតិ ថ្មីៗ
លោកអភិបាលរងខេត្ត ក៏បានណែនាំបន្ថែមដល់អាជ្ញាធរមូលដ្ឋានទាំងអស់ ត្រូវតាមដាន និងកត់ត្រាករណីរន្ទះបាញ់ ទៅលើភូមិសាស្ត្រណាដែលកើតមានញឹកញាប់ជាងគេ ព្រមទាំងពិនិត្យវត្ថុឬសម្ភាៈនៅលើខ្លួនជនរងគ្រោះ និងទីតាំងនោះផងដែរដើម្បីស្រាវជ្រាវមូលហេតុ និងមានវិធានការត្រៀមបង្ការ ព្រមទាំងបានណែនាំឱ្យទប់ស្កាត់ការចាក់ដី ឬការដាក់លូដោយខ្វះលក្ខណៈបច្ចេកទេសទៅលើមុខទឹក ឬប្រឡាយបញ្ចៀសទឹកជំនន់ ជាពិសេសបណ្តាស្រុកទាំង៦ នៅតាមបណ្តោយផ្លូវជាតិលេខ៦។ ជាមួយគ្នានេះ គណៈកម្មាធិការគ្រប់គ្រងគ្រោះមហន្តរាយខេត្ត នឹងបន្តប្រជុំផ្សព្វផ្សាយអំពីការចុះឈ្មោះប្រព័ន្ឋប្រកាសព័ត៌មានឱ្យដឹងមុន ១២៩៤ ជូនដល់គណៈកម្មាធិការគ្រប់គ្រងគ្រោះមហន្តរាយក្រុង ស្រុក ឃុំ សង្កាត់ ដើម្បីផ្សព្វផ្សាយឱ្យបានទូលំទូលាយដល់ប្រជាពលរដ្ឋ៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
