នៅសាលសន្និសីទសណ្ឋាគារសុខាសៀមរាប នាព្រឹកថ្ងៃទី០៤ ខែកក្កដា ឆ្នាំ២០២៣នេះ ឯកឧត្តម ស៊ាន បូរ៉ាត់ រដ្ឋលេខាធិការក្រសួងអប់រំ យុវជន និងកីឡា បានអញ្ជើញប្រគល់សញ្ញាបត្រជូនដល់សមណៈនិសិ្សត និងនិសិ្សត ចំនួន ២.១៤១អង្គ/នាក់ នៃកម្រិតថ្នាក់បរិញ្ញាបត្រ បរិញ្ញាបត្ររង និងបរិញ្ញាបត្រជាន់ខ្ពស់ នៃសាកលវិទ្យាល័យឯកទេសនៃកម្ពុជា CUS សាខាខេត្តសៀមរាប ដោយមានការចូលរួមពីសំណាក់ឯកឧត្តម លោកជំទាវ ជាអនុរដ្ឋលេខាធិការ សមាជិកក្រុមប្រឹក្សាខេត្ត អភិបាលរងខេត្ត លោកលោកស្រីថ្នាក់ដឹកនាំមន្ទីរអង្គភាព អាជ្ញាធរក្រុងស្រុកផងដែរ។
ឯកឧត្តម ស៊ាន បូរ៉ាត់ បានគូសបញ្ជាក់ថា ក្រោមម្លប់នៃសន្តិភាពរាជរដ្ឋាភិបាលកម្ពុជា បានសម្រេចបាននូវសមិទ្ធផលថ្មីៗជាច្រើន លើមាគ៌ានៃការអភិវឌ្ឍ ក្នុងនោះពាក្យស្លោក អរគុណសន្តិភាព អរគុណនយោបាយ ឈ្នះ ឈ្នះ ត្រូវបានគាំទ្រដោយប្រជាពលរដ្ឋគ្រប់ទិសទី។ សន្តិភាព ស្ថេរភាពនយោបាយ និងសន្តិសុខនេះហើយ ដែលជាមូលដ្ឋានគ្រឹះសម្រាប់ការអភិវឌ្ឍ និងការរស់នៅដ៏សុខដុមរមនារបស់ប្រជាពលរដ្ឋ។ ភាពជោគជ័យ ការខិតខំទាំងអស់ និងការដាក់ចេញនូវយុទ្ធសាស្ត្រច្បាស់ៗ បានក្លាយជាចលករ និងជាមូលដ្ឋានដ៏រឹងមាំលើការអភិវឌ្ឍធនធានមនុស្សប្រកបដោយគុណភាព សមត្ថភាព និងគុណធម៌ គឺជាកត្តាគន្លឹះ សម្រាប់ទ្រទ្រង់កំណើនសេដ្ឋកិច្ច និងភាពប្រកួតប្រជែងរបស់ប្រទេស ទាំងក្នុងពេលចំពោះមុខ ទាំងសម្រាប់អនាគត។ ពិសេសក្នុងពេលដែលកម្ពុជា ឈានចូលទៅជាប្រទេសមានចំណូលមធ្យមកម្រិតទាបក្នុងពេលដ៏ខ្លីខាងមុខ ហើយបន្តឡើងទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍនៅឆ្នាំ២០៥០ តាមចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា។
ឯកឧត្តម រដ្ឋលេខាធិការ មានប្រសាសន៍ថា ការរីកចម្រើនសេដ្ឋកិច្ចខាងលើនេះ ក៏បានធ្វើឲ្យរីកចម្រើនវិស័យអប់រំនៅកម្ពុជា បានឈានប្រកបដោយភាពស្វាហាប់ព្រមៗគ្នា ចាប់ពីការអភិវឌ្ឍធនធានមនុស្សចាប់តាំងពីកម្រិតមត្តេយ្យរហូតដល់អនុវិទ្យាល័យ វិទ្យាល័យ ជំនាញវិជ្ជាជីវៈ ឧត្តមសិក្សា និងថ្នាក់ក្រោយឧត្តមសិក្សា។ ជាក់ស្ដែងសមណៈនិសិ្សត និងនិសិ្សតជ័យលាភីទាំងអស់នាពេលនេះ គឺជាធនធានមនុស្សដ៏មានសារៈសំខាន់មិនអាចខ្វះបាន សម្រាប់ចូលរួមបំពេញបន្ថែមទៅលើការរីកចម្រើនវិស័យផ្សេងៗសម្រាប់ជាតិ និងប្រជាជនកម្ពុជា ហើយអ្នកទាំងនេះនឹងត្រូវចេញទៅបំពេញការងារតាមជំនាញក្នុងសង្គម តាមរយៈចំណេះដឹង និងចំណេះធ្វើរបស់ខ្លួនទទួលបានពីសាកលវិទ្យាល័យ ដោយយកទៅអនុវត្តជាក់ស្តែង និងដកពិសោធន៍ផ្ទាល់ និងសិក្សាស្រាវជ្រាវកែលម្អបន្ថែមទៀត ពីអ្នកប្រកបការងារជុំវិញខ្លួន។
ឯកឧត្តម បានសង្កត់ធ្ងន់ថា ការអភិវឌ្ឍធនធានមនុស្ស ជាពិសេសយុវជន គឺសំដៅទៅលើការកសាងសមត្ថភាពខាង ចំណេះដឹង ចំណេះធ្វើព្រមទាំងសមត្ថភាពក្នុងការស្រាវជ្រាវ និងការអភិវឌ្ឍ។ ទន្ទឹមនឹងការលើកស្ទួយគុណភាពខាងសុខភាព កាយសម្បទា សីលធម៌ ស្មារតីទទួលខុសត្រូវ និងមនសិការស្នេហាជាតិ និង វិជ្ជាជីវៈ ដោយគ្មានការរើសអើងខាងយេនឌ័រ រួមជាមួយនឹងប្រព័ន្ធសុវត្ថិភាពសង្គមគត់មត់ ព្រមទាំងផ្តល់ឱកាសស្មើៗគ្នាដល់កុមារ និងយុវជន ក្នុងការទទួលការអប់រំទាំងអស់។ ឯកឧត្តម ក៏បានជំរុញបន្ថែមដល់សាស្ត្រាចារ្យ សមណៈនិសិ្សត និសិ្សតទាំងអស់ ត្រូវពង្រឹង ពង្រីកនូវគុណភាពអប់រំបន្ថែមទៀត ឲ្យឆ្ពោះទៅលើកកម្ពស់សេដ្ឋកិច្ចជាតិឲ្យកាន់តែមានភាពរីកចម្រើន ហើយសមណៈនិសិ្សន និសិ្សតទាំងអស់ ក៏ត្រូវបន្តការសិក្សារបស់ខ្លួនស្របតាមទិសស្លោក «ការសិក្សារៀនសូត្រគឺធ្វើគ្មានទីបញ្ចប់ទេ»។ ម៉្យាងទៀត យើងគ្រប់រូបត្រូវរួមសាមគ្គីគ្នាក្នុងការថែរក្សាសន្តិភាពឲ្យបានគង់វង្សជាអមតៈ ជាពីសេសសូមអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៧ នៃរដ្ឋសភា នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ឲ្យបានគ្រប់ៗគ្នាផងដែរ៕
អត្ថបទ និងរូបភាព៖ លោក ម៉ី សុខារិទ្ធ, លោក ទ្រា ពន្លឺ
កែសម្រួល៖ អ៊ុន ណារាជ្យ
