នៅព្រឹកថ្ងៃទី០៦ ខែកក្កដា ឆ្នាំ២០២៣នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បានដឹកនាំបើកកិច្ចប្រជុំសាមញ្ញលើកទី៥០ របស់ខ្លួន ដើម្បីធ្វើការពិនិត្យ ពិភាក្សា និងអនុម័តសេចក្ដីព្រាងកំណត់ហេតុកិច្ចប្រជុំសាមញ្ញលើកទី៤៩ ដោយមានការចូលរួមពីសំណាក់េកឧត្តមលោកជំទាវសមាជិកក្រុមប្រឹក្សាខេត្ត លោកលោកស្រីអភិបាលរងខេត្ត តំណាងមន្ទីរអង្គភាពខេត្ត រួមនឹងអាជ្ញាធរក្រុងស្រុកជាច្រើនរូប។
មានប្រសាសន៍ក្នុងឱកាសនោះ ឯកឧត្តម អ៊ាន ឃុន បានគូសបញ្ជាក់ពីការអនុវត្តកិច្ចការរបស់រដ្ឋបាលខេត្តសៀមរាប ទាំងលើកិច្ចការរដ្ឋបាល ទំនាក់ទំនង សហប្រតិបត្តិការអន្តរជាតិ និងការងារសន្តិសុខសណ្តាប់ធ្នាប់សាធារណៈ ការងារគ្រប់គ្រងគ្រោះ មហន្តរាយ និិងការដោះស្រាយបញ្ហាផ្សេងៗ ប្រចាំឆមាសទី១ ឆ្នាំ២០២៣ របស់រដ្ឋបាលខេត្ត។ ឯកឧត្តម ក៏បានលើកយកនូវកិច្ចការសំខាន់ដែលរដ្ឋបាលខេត្ត ក៏ដូចរដ្ឋបាលក្រុង ស្រុក មន្ទីរអង្គភាពត្រូវបន្តការអនុវត្តក្នុងខែកក្កដា ឆ្នាំ២០២៣ ដោយឯកឧត្តម បានសង្កត់ធ្ងន់ទៅលើបងប្អូនប្រជាពលរដ្ឋដែលមានអត្តសញ្ញាណប័ណ្ណផុតការបរិច្ឆេតហើយនោះ អាជ្ញាធរក្រុងស្រុក ឃុំសង្កាត់ ត្រូវជម្រុញដល់បងប្អូនទៅធ្វើលិខិតបញ្ជាក់អត្តសញ្ញាណប័ណ្ណសម្រាប់បម្រើឲ្យការបោះឆ្នោត (ឯ.អ )។ ឯកឧត្តម បានគូសបញ្ជាក់អំពីលទ្ធផលរបស់គណៈកម្មាធិការជាតិរៀបចំការបោះឆ្នោតខេត្តសៀមរាប បានចេញឯកសារបញ្ជាក់អត្តសញ្ញាណ ឯ.អ នៅតាមឃុំសង្កាត់ បានចំនួន ៣.៧៣៣នាក់។ ក្រោយពេលច្បាប់បោះឆ្នោតបានធ្វើវិសោធនកម្ម នឹងដាក់ឲ្យប្រើប្រាស់ទូទាំងប្រទេស ដូច្នេះមន្ត្រីរាជការ រួមទាំងក្រុងស្រុក ឃុំសង្កាត់ ត្រូវអប់រំប្រជាពលរដ្ឋដែលមានឈ្មោះបោះឆ្នោត ឲ្យបានទៅបោះឆ្នោតគ្រប់ៗគ្នា ដើមី្បធានាបានសិទ្ធិស្របច្បាប់ក្នុងនាមពលរដ្ឋកម្ពុជា។
ក្នុងនោះដែរសមាជិកក្រុមប្រឹក្សាខេត្ត ក៏បានលើកឡើងនូវបញ្ហាមួយចំនួនពាក់ព័ន្ធប្រជាពលរដ្ឋមានអត្តសញ្ញាណប័ណ្ណ ហួសសុពលភាព និងការធ្វើលិខិតបញ្ជាក់អត្តសញ្ញាណប័ណ្ណ សម្រាប់បម្រើឲ្យការបោះឆ្នោត ការដាក់ឈ្មោះព្រំប្រទល់រដ្ឋបាលក្រុងស្រុក ឃុំសង្កាត់ បញ្ហាសុំបង្កើតវត្តថ្មីក្នុងតំបន់រមណីយដ្ឋានអង្គរ បញ្ហាផ្លូវធ្វើស្អាតត្រូវបានជីកកកាយធ្វើឲ្យខូចសោភណ្ឌភាពផ្លូវ ព្រមទាំងសុំឲ្យធ្វើការកែតម្រូវនូវរាល់បញ្ហាប្រឈមលើកឡើងជាន់គ្នាដដែលៗ របស់មន្ទីរពាក់ព័ន្ធមួយចំនួន។
តំណាងឯកឧត្តម ទៀ សីហា អភិបាលខេត្តសៀមរាប លោក នាក់ ណេរ៉ុន អភិបាលរងខេត្ត បានណែនាំដល់អាជ្ញាធរក្រុងស្រុក ត្រូវបង្កើនយកចិត្តទុកដាក់ខ្ពស់ អំពីសុខមាភាពរបស់ប្រជាពលរដ្ឋ នៅក្នុងរដូវមានភ្លៀងធ្លាក់នេះ ព្រោះវាតែងតែបង្កឲ្យកើតមានជម្ងឺគ្រុនចាញ់ គ្រុនឈាម និងគ្រុនឈិក សំខាន់លើកុមារ ក៏ដូចមនុស្សគ្រប់វ័យ។
ជាមួយគ្នានោះលោកអភិបាលរងខេត្ត ក៏បានឯកភាពនូវរាល់ចំណុចដែលសមាជិកក្រុមប្រឹក្សាខេត្តលើកឡើង នៅក្នុងកិច្ចប្រជុំសាមញ្ញាលើកទី៥០ នេះ ក្នុងគោលដៅជម្រុញដល់អាជ្ញាធរ សមត្ថកិច្ច បង្កើនការយកចិត្តទុកដាក់ខ្ពស់ អំពីសោភណ្ឌភាព សន្តិសុខ សណ្តាប់ធ្នាប់នៅក្នុងក្រុង ស្រុក ឃុំសង្កាត់ ជូនដល់គ្រប់គណបក្សនយោបាយ ក្នុងពេលយុទ្ធនាការឃោសនាបោះឆ្នោតនេះ។ ម៉្យាងទៀត ចំពោះការដាក់បង្ហាញនូវបង្គោលព្រំប្រទល់រដ្ឋបាលក្រុងស្រុក ឃុំសង្កាត់ នោះជាការល្អ សម្រាប់បងប្អូនអ្នកធ្វើដំណើរឆ្លងកាត់បានស្គាល់ច្បាស់អំពីភូមិសាស្ត្រ និងដែនសមត្ថកិច្ចរដ្ឋបាលក្រុងស្រុក ឃុំសង្កាត់ ដើមី្បបង្កានៅពេលមានហេតុការណ៍អ្វីកើតឡើង ក្នុងការងាយស្រួលដល់សមត្ថកិច្ចចុះជួយអន្តរាគមន៍បានទាន់ពេលវេលា៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ អ៊ុន ណារាជ្យ
