ព្រះសង្ឃនៅតែដើរតួនាទីសំខាន់ក្នុងចូលរួមការបណ្តុះបណ្តាលធនធានមនុស្សនៅកម្ពុជា ដោយបច្ចុប្បន្ននេះ មានសាលារៀនមួយចំនួនបានស្ថិតនៅក្នុងបរិវេណវត្ត និងមានការជួយគាំទ្រពីវត្ត។ ក្រៅពីនេះព្រះសង្ឃ ក៏បានជួយឧបត្ថម្ភ និងសាងសង់ជាអគារសិក្សា នៅតាមតំបន់ជនបទជាបន្តបន្ទាប់ផងដែរ។
ជាក់ស្តែងនៅព្រឹកថ្ងៃទី០៦ ខែកក្កដា ឆ្នាំ២០២៣នេះ ព្រះសង្ឃជាគ្រូចៅអធិការវត្តមួយចំនួន ក្នុងក្រុងសៀមរាប រួមជាមួយពុទ្ធបរិស័ទក្នុងខេត្តសៀមរាប ដោយមានការផ្តួចផ្តើមពី ព្រះវិបុលសត្ថា រី សាត ព្រះគ្រូចៅអធិការវត្តកេសរារាម ក្រុងសៀមរាប បានរួមគ្នាសាងសង់អគារសិក្សា ១ខ្នង មាន ៣បន្ទប់ នៅសាលាបឋមសិក្សាកន្សែងលើ ស្ថិតនៅភូមិកន្សែងលើ ឃុំចាន់ស ស្រុកសូទ្រនិគម ខេត្តសៀមរាប ដើម្បីអាចឱ្យក្មេងៗសិស្សមតេយ្យមានកន្លែងរៀនសូទ្របានគ្រប់គ្រាន់។
ព័ត៌មានជាតិ ថ្មីៗ
ព្រះវិបុលសត្ថា រី សាត មានសង្ឃដីការឱ្យដឹងថា បច្ចុប្បន្ននេះ នៅសាលាបឋមសិក្សាកន្សែងលើនេះ មានអគារសិក្សាចំនួន ២ខ្នងហើយ សម្រាប់សិស្សថ្នាក់ទី១ ដល់ទី៦ ប៉ុន្តែខ្វះអគារសម្រាប់សិស្សមតេយ្យរៀន ដែលតម្រូវឱ្យសិស្សថ្នាក់ធំមករៀននៅក្នុងរោងឈើ ជញ្ជាំងស្លឹកដូង ដោយឱ្យអគារថ្មសម្រាប់សិស្សមតេយ្យរៀនជាបណ្តោះអាសន្នសិន។ ដោយមិនឃើញពីការខ្វះខាតបែបនេះ ព្រះអង្គក៏បានគៀងគរព្រះសង្ឃនៅក្នុងក្រុងសៀមរាបរួមជាមួយពុទ្ធបរិស័ទ មកជួយសាងសង់អគារសិក្សា១ខ្នងនេះឡើង ដោយដំណើរការសាងសង់ជួលជាងធ្វើខ្លះ និងព្រះសង្ឃធ្វើដោយផ្ទាល់ខ្លះ ដែលរហូតមកដល់ពេលនេះសម្រេចបាន៩០ភាគរយហើយ។ នៅថ្ងៃនេះដែរ ព្រះសង្ឃជាព្រះគ្រូចៅអធិការវត្ត និងសមណៈនិសិត្ស បានមកជួយលាបថ្នាំអគារសាលារៀនថ្មីនេះ រួមជាមួយការងារផ្សេងៗទៀត ដែលមិនបានជួលជាងធ្វើ។
ព្រះវិបុលសត្ថា រី សាត បានបន្តថា ដើម្បីចូលរួមជាមួយរាជរដ្ឋាភិបាលកម្ពុជាក្នុងការបណ្តោះបណ្តាលធនធានមនុស្ស ព្រះសង្ឃតែងតែផ្តល់នៅទីតាំងក្នុងបរិវេណវត្តសម្រាប់សាងសង់សាលារៀន និងជួយគាំទ្រដល់ដំណើរការបង្រៀនសិស្សជាប្រចាំផងដែរ។ ក្រៅពីនេះ វត្តរាម ក៏តែងតែផ្តល់ជាកន្លែងសម្រាប់ស្នាក់អាស្រ័យដល់សិស្សដែលមានជីវភាពខ្វះខាតមកបន្តការសិក្សាផងដែរ៕
អត្ថបទ និងរូបភាព៖ លោក ឃុត សៅ
កែសម្រួល៖ អ៊ុន ណារាជ្យ
