ថ្លែងក្នុងពីធីសំណេះសំណាលជាមួយសិស្សានុស្ស និងលោកគ្រូអ្នកគ្រូ នៃវិទ្យាល័យហ៊ុន សែន អង្គរធំ ស្រុកអង្គរធំ ខេត្តសៀមរាប នៅថ្ងៃទី០៥ ខែកក្កដា ឆ្នាំ២០២៣នេះ ឯកឧត្ដម ផៃ សុខខេង នាយករង ខុទ្ទការល័យសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ បានណែនាំដល់សិស្សានុសិស្សលោកគ្រូអ្នកគ្រូ ត្រូវជៀសឲ្យឆ្ងាយពីគ្រឿងញៀន និងប្រុងប្រយ័ត្នឲ្យបានខ្ពស់ចំពោះជំងឺអេដស៍ ខណៈបច្ចុប្បន្នករណីជំងឺអេដស៍នៅកម្ពុជា ហាក់កំពុងងើបឡើងវិញ។
ឯកឧត្ដម ផៃ សុខខេង មានប្រសាសន៍ថា បច្ចុប្បន្នកម្ពុជា នៅតែបន្តរងការគំរាមកំហែងឥតឈប់ឈរពីការចរាចរ ការជួញដូរ និងប្រើប្រាស់គ្រឿងញៀននៅលើពិភពលោក និងក្នុងតំបន់។ ជាក់ស្តែងការចរាចរគ្រឿងញៀនទាំងតាមផ្លូវគោក ផ្លូវទឹក ជាពិសេសករណីរក្សាទុកកែច្នៃផលិត និងជួញដូរគ្រឿងញៀននៅកម្ពុជា នៅតែបន្តកើតមាន។ ជាមួយគ្នានោះ បទល្មើសគ្រឿងញៀនដែលលេចធ្លោសម្រាប់កម្ពុជា មានដូចជាករណីរក្សាទុកកែច្នៃ ផលិត ជួញដូរ និងមានសារធាតុគីមីផ្សំ ដែលបានកើតមាននៅរាជធានីភ្នំពេញ និងខេត្តផ្សេងៗទៀត ក្នុងគោលបំណងនាំចេញទៅក្រៅប្រទេសតាមច្រកព្រំដែនកម្ពុជា-វៀតណាម និងដឹកជញ្ជូនចេញតាមច្រកសមុទ្រកម្ពុជា។
ឯកឧត្ដម ក៏បានណែនាំដល់លោកគ្រូអ្នកគ្រូ ត្រូវពង្រឹងបន្ថែមនូវបរិស្ថានសាលារៀន តាមរយៈការអប់រំអំពីភាពគ្មានការប្រើប្រាស់គ្រឿងញៀននៅក្នុងសាលារៀន ព្រោះការអប់រំ គឺជាឆ្អឹងខ្នងដ៏រឹងមាំសំរាប់មនុស្សគ្រប់ជាតិសាសន៍ ហើយសុខភាពជាឫសគល់នៃជីវិត ប៉ុន្ដែបើសិនមានសេពគ្រឿងញៀនវានឹងនាំឱ្យមានការបំផ្លាញដល់សុខភាព។ ដូច្នេះជួយពង្រឹងបរិស្ថានសាលារៀនឱ្យកាន់តែប្រសើរឡើង ក្នុងគោលបំណងត្រៀមបង្ការក្មេងៗដែលទៅសាលារៀនកុំឱ្យមានការប្រើប្រាស់គ្រឿងញៀន តាមរយៈការផ្សព្វផ្សាយអប់រំ ការអភិវឌ្ឍសហគមន៍ ការអប់រំជាក្រុម ដើម្បីទប់ស្កាត់កុំឱ្យមានការប្រើប្រាស់គ្រឿងញៀន។ ដោយឡែកចំពោះបញ្ហាជំងឺអេដស៍នៅកម្ពុជា ដោយភាគច្រើនកើតឡើងដោយសារមនុស្សស្រលាភេទដូចគ្នា។ ឯកឧត្ដមក៍បានអំពាវនាវដល់សិស្សានុសិស្ស ចូលរួមទប់ស្កាត់ការចម្លងមេរោគអេដស៍ ការសែបគ្រឿងញៀន ដើម្បីកុំឱ្យប៉ះពាល់ដល់សុខភាព និងចូលរួមគោរពច្បាប់ចរាចរណ៍ ព្រមទាំងស្នើរអោយសិស្សានុសិស្សដែលគ្រប់អាយុបានធ្វើប័ណ្ណបោះឆ្នោត ទៅចូលរួមបោះឆ្នោតអោយបានគ្រប់គ្នាផងដែរ។
សូមបញ្ជាក់ថា រាជរដ្ឋាភិបាលកម្ពុជា មានគោលនយោបាយច្បាស់លាស់ណាស់ក្នុងការទប់ស្កាត់ការប្រើប្រាស់គ្រឿងញៀន តាមរយៈអាជ្ញាធរជាតិប្រយុទ្ធប្រឆាំងគ្រឿងញៀន ដែលមានសមាជិក ២២ក្រសួងចូលរួម ហើយបានដាក់ចេញនូវយុទ្ធសាស្ដ្រចំនួន ៥ចំណុចសំរាប់អនុវត្ដ គឺ ១-កាត់បន្ថយតំរូវការ ២-កាត់បន្ថយការផ្គត់ ផ្គង់ ៣-កាត់បន្ថយការគ្រោះថ្នាក់ ៤-ពង្រឹង ការអនុវត្ដច្បាប់ និង៥-ពង្រឹងពង្រីកកិច្ច សហប្រតិបត្ដិការអន្ដរជាតិ៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
