នៅព្រឹកថ្ងៃទី១០ ខែកក្កដា ឆ្នាំ២០២៣នេះ ឯកឧត្តម ទៀ សីហា ប្រធានគណកម្មាធិការគណបក្សប្រជាជនខេត្ត និងជាបេក្ខភាពតំណាងរាស្ត្រមណ្ឌលសៀមរាប និងលោកជំទាវ បានអញ្ជើញជួបសំណេះសំណាលជាមួយបងប្អូនជាសមាជិកសមាជិកានៃគណបក្សប្រជាជនកម្ពុជាជាង១.៧០០នាក់ មកពីសង្កាត់ទឹកវិល និងសង្កាត់សាលាកំរើក ក្រុង/ខេត្តសៀមរាប។
ឯកឧត្តម ទៀ សីហា មានប្រសាសន៍ថា គណបក្សប្រជាជនកម្ពុជា គឺជាគណបក្សចាស់ទុំខាងនយោបាយមួយ ដែលបានរំដោះប្រទេសជាតិចេញពីរបបប្រល័យពូជសាសន៍ ប៉ុល ពត ព្រមទាំងបានកសាង និងសម្រេចបាននូវសមិទ្ធផលជាប្រវត្តិសាស្រ្តយ៉ាងច្រើន សម្រាប់បុព្វហេតុជាតិ និង ផលប្រយោជន៍ជូនប្រជាជនកម្ពុជា សម្រាប់កូនចៅរបស់យើងជំនាន់ក្រោយ។ ជាក់ស្តែងដូចជាសមទ្ធិផលផ្លូវទាំង៣៨ខ្សែ និងការស្តារស្ទឹងឡើងវិញ រួមនឹងហេដ្ឋារចនាសម្ព័ន្ធក្នុងក្រុងជាច្រើនទៀត ឲ្យកាន់តែមានសម្រស់ស្រស់ត្រកាល គឺកើតចេញពីគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស។ ក្នុងរយៈពេលជាង ៤០ឆ្នាំកន្លងមកនេះ គណបក្សប្រជាជនកម្ពុជា បានដើរតួនាទីស្នូល និងជាប្រវត្តិសាស្រ្ត ក្នុងការផ្សះផ្សារ និងបង្រួបបង្រួមប្រទេសជាតិ ឲ្យរួបរួមគ្នាតែមួយក្រោមដំបូលម្លប់សន្តិភាពរបស់សម្តេចតេជោ ហ៊ុន សែន ។
ក្នុងឱកាសនោះដែរ ឯកឧត្តម ក៏បានជម្រុញដល់សមាជិកសមាជិកាទាំងអស់ ត្រូវចូលរួមជម្រុញដល់សមាជិកក្រុមគ្រួសារ និងបងប្អូនប្រជាពលរដ្ឋក្នុងមូលដ្ឋានដែលមានឈ្មោះបោះឆ្នោត អញ្ជើញទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះឲ្យបានគ្រប់ៗគ្នា ដែលជាព្រឹត្តិការណ៍ជាប្រវត្តិសាស្រ្តសម្រាប់ប្រជាជនកម្ពុជា ដែលត្រូវបំពេញកតព្វកិច្ចរបស់ខ្លួនជាពលរដ្ឋម្នាក់ ក្នុងការសម្រេចចិត្តបោះឆ្នោត ជូនគណបក្សដែលខ្លួនពេញចិត្ត ដើម្បីបន្តថែរក្សាការពារសន្តិភាព និងការអភិវឌ្ឍន៍ប្រទេសជាតិ ឲ្យកាន់តែមានការរីកចម្រើន និងគាំទ្រសម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រី និង ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីទៅថ្ងៃអនាគទៀត៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
