ថ្ងៃទី១៨ ខែកក្កដា ឆ្នាំ២០២៣នេះ លោកស្រី លី វណ្ណៈ ប្រធានការិយាល័យនិយ័តកម្មសុខាភិបាល នៃមន្ទីរសុខាភិបាលខេត្តសៀមរាប បញ្ជាក់ថា ពុំមានករណីពុលអាហារលើមនុស្សជិត២០នាក់ នៅអាហារដ្ឋានប៊ូហ្វេ ស្រីខួច ដូចការចុះផ្សព្វផ្សាយតាមតាមបណ្ដាសង្គមឡើយ។
តាមការបង្ហាញឱ្យដឹងពី លោកស្រី លី វណ្ណៈ ក្រោយធ្វើការសាកសួរទៅលើ មនុស្សទាំង១៩នាក់ ដែលមានរោគសញ្ញា ក្រោយពេលញ៉ាំអាហារនៅអាហារដ្ឋានស្រីខួចកាលពីថ្ងៃទី១៤ ខែកក្កដាកន្លងទៅនោះ មានតែ ១ករណីប៉ុណ្ណោះ ដែលបានទៅសម្រាកព្យាបាលនៅមន្ទីរពេទ្យឯកជន ដែលកើតទៅលើស្រ្តីវ័យ ៣៤ឆ្នាំ ដោយគ្រូពេទ្យធ្វើរោគវិនិច្ឆ័យថា ជាជម្ងឺ រលាកក្រពះពោះវៀន និងបាត់បង់ជាតិទឹកបន្តិចបន្តួច ដោយឡែកករណីទី២ ក្មេងប្រុសអាយុ១ឆ្នាំ ដែលក្តៅខ្លួន រាគ ក្អួត ពុំបានទទួលទានអាហារជាមួយម្ដាយនៅថ្ងៃនោះឡើយ។
លោកស្រី លី វណ្ណៈ បញ្ជាក់ថា បន្ទាប់ពីជួបភាគីទាំងសងខាងក្រុមការងារ នៃមន្ទីរសុខាភិបាលខេត្ត បានបន្តចុះទៅត្រួតពិនិត្យបញ្ហាអាម័យនៅអាហារដ្ឋាននោះម្តងទៀត និងសង្កេតឃើញថា នៅកន្លែងចំអិនអាហារ បរិវេណបរិភោគអាហារ និងសម្ភារៈប្រើប្រាស់ក្នុងអាហារដ្ឋានសមស្រប ពុំមានបញ្ហានោះឡើយ។
ព័ត៌មានជាតិ ថ្មីៗ
ជារួម ក្រុមការងារនៃមន្ទីរសុខាភិបាលខេត្ត បញ្ជាក់ថា ពុំមានករណីពុលអាហារនៅក្នុងខេត្តសៀមរាបឡើយ។ ករណីខាងលើគឺអាចបណ្ដាលមកពីកត្តាសុខភាពរបស់អ្នកទទួលទានផ្ទាល់។
អត្ថបទ និងរូបភាព៖ លោក ជា ស្រស់
កែសម្រួល៖ សេង ផល្លី
