នៅព្រឹកថ្ងៃទី១៩ ខែកក្កដា ឆ្នាំ២០២៣នេះ ក្រុមការងារថ្នាក់ជាតិចុះមូលដ្ឋានសង្កាត់ក្របីរៀល បានបន្តចុះជួបសំណេះសំណាលជាមួយប្រជាពលរដ្ឋ និងព្រះសង្ឃ និងដឹកនាំសមាជិកសមាជិការគណបក្សប្រជាជនកម្ពុជា ធ្វើយុទ្ធនាការឃោសនារកសំលេងឆ្នោត នៅសង្កាត់ក្របីរៀល ក្រុងសៀមរាប ខេត្ដសៀមរាប ។
មានប្រសាសន៍នាឱកាសនោះ ឯកឧត្ដម ហង់ ពៅ សមាជិកក្រុមការងារថ្នាក់ជាតិ និងប្រធានគណបក្សមូលដ្ឋាន នៃអាជ្ញាធរជាតិអប្សរា បានអំពាវនាវដល់ប្រជាពលរដ្ឋដែលមានអាយុគ្រប់បោះឆ្នោតទាំងអស់ ទៅចូលរួមបោះឆ្នោតជ្រើសតាំងតំណាងរាស្រ្ត នីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ខាងមុខឱ្យបានគ្រប់ៗគ្នា ដើម្បីបំពេញកាតព្វកិច្ច នៅក្នុងសង្គមប្រជាធិបតេយ្យ។ ជាមួយគ្នានោះ ក្នុងរយៈកាលជាង៤៤ឆ្នាំមកនេះ គណបក្សប្រជាជនកម្ពុជា បានខិតខំថែរក្សា និងការពារសុខសន្តិភាព ដែលរកបានមកយ៉ាងលំបាក ហើយបានបន្តជំរុញការអភិវឌ្ឍន៍ប្រទេសជាតិ ក្រោមការដឹកនាំរបស់សម្ដេចតេជោ ហ៊ុន សែន បានធ្វើឲ្យប្រទេសជាតិ មានសុខសន្តិភាព និងការអភិវឌ្ឍលើគ្រប់វិស័យ ព្រមទាំងជាប្រទេសដែលប្រកាន់យកនូវលទ្ធិប្រជាធិបតេយ្យ សេរីពហុបក្សបានត្រឹមត្រូវថែមទៀតផង។
ឯកឧត្តម ហង់ ពៅ មានប្រសាសន៍ទៀតថា ការបោះឆ្នោតគាំទ្រគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា មានលេខរៀងទី១៨ ក្នុងសន្លឹកឆ្នោត ត្រូវគូសលើសន្លឹកឆ្នោតឲ្យបានត្រឹមត្រូវ រក្សាតម្លៃនៃសន្លឹកឆ្នោត ជាការគាំទ្រគណបក្សប្រជាជនកម្ពុជាមួយសម្លេង ដើម្បីធានាសន្តិភាព និងការអភិវឌ្ឍ។ ជាមួយគ្នានោះ គណបក្សប្រជាជនកម្ពុជា បានខិតខំលះបង់កម្លាំងកាយចិត្ត និងយកជីវិតទៅប្តូរ ដើម្បីស្វែងរកសុខសន្តិភាព ជូនប្រជាជនកម្ពុជាតាំងពីបាតដៃទទេ។ ជាពិសេសគណៈបក្សប្រជាជនកម្ពុជា បានធ្វើឱ្យពួកគាត់រួចជីវិតពីសម័យប៉ុលពត ហើយមានជីវភាពរស់នៅសមរម្យប្រកបដោយភាពកក់ក្ដៅបំផុតល់បច្ចុប្បន្ន៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
