នៅថ្ងៃទី២៤ ខែកក្កដា ឆ្នាំ២០២៣ រដ្ឋបាលស្រុក សហការជាមួយកងកម្លាំងសមត្ថកិច្ច និងមន្ត្រីរាជការនៃស្រុកក្រឡាញ់បានអនុវត្តឱ្យមានការគោរពទង់ជាតិនៃព្រះរាជាណាចក្រកម្ពុជា ក្នុងគោលបំណងដើម្បីរួមចំណែកថែរក្សា លើកកំពស់អត្តសញ្ញាណជាតិ និងដាស់ អារម្មណ៍ ស្មារតីដល់សាធារណៈជន ភ្ញៀវទេសចរជាតិ-អន្តរជាតិ ដែលធ្វើដំណើរឆ្លងកាត់ទីរួម ស្រុកក្រឡាញ់ និងមន្ត្រីរាជការ លោកគ្រូ អ្នកគ្រូ សិស្សានុសិស្ស វិស័យឯកជន បងប្អូនអាជីវករគ្រប់ប្រភេទ និងអ្នកធ្វើដំណើរឆ្លងកាត់ នាំគ្នាគោរពទង់ជាតិ ដែលចាក់ផ្សាយតាមវិទ្យុបណ្តាញ មានឧគ្ឃោសនស័ព្ទ (មេក្រូ)នៅតាមបង្គោលទីសាធារណៈ បានរៀបចំរួចរាល់ចាប់ពីមុខអាគារ សាលាស្រុក រហូតដល់ផ្លូវបំបែករង្វង់មូលគ្រុឌថ្លែងសរ និងចាប់អនុវត្តពីថ្ងៃទី២៤ ខែកក្កដា ឆ្នាំ២០២៣តទៅ រៀងរាល់ថ្ងៃចន្ទ និងថ្ងៃសុក្រ វេលាម៉ោង ៧ព្រឹក ។
លោក សុខ ណារ៉េត អភិបាលស្រុក បានអំពាវនាវដល់អ្នកនៅតាមដងផ្លូវ និងកំពុងធ្វើដំណើរឆ្លងកាត់នៅវេលាម៉ោង៧ព្រឹកនិងពេលលឺសំឡេង ការចាក់ផ្សាយនូវចម្រៀងនគររាជ – សូមមេត្តាឈប់ការធ្វើដំណើរ ឬផ្អាកសកម្មភាពការងារផ្សេងៗសិន ដើម្បីចូលរួមគោរពទង់ជាតិ ឲ្យបានចប់ ទើបអាចបន្តការធ្វើដំណើរ ឬអនុវត្តការងារផ្សេងៗទៀតបាន។
លោកអភិបាលស្រុកមានប្រសាសន៍ថា៖ការអនុវត្តវត្តឱ្យមានការគោរពទង់ជាតិនេះ រដ្ឋបាលស្រុកទទួលបានការផ្តួចផ្តើមណែនាំពីរដ្ឋបាលខេត្ត និងបានការផ្តល់គំនិតយោបល់ពីឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកក្រឡាញ់ ខណៈដែលឯកឧត្តមក៏បានផ្តល់ជាចំណងដៃពិសេសជូនដល់រដ្ឋបាលស្រុកនូវឧបករណ៍សម្ភារៈប្រព័ន្ឋវិទ្យុបណ្តាញ រួមមាន មេក្រូចំនួន៤៥គ្រាប់ អំភ្លីកម្លាំង២០០វ៉ាត់០១គ្រឿង វិទ្យុស្តាប់សម្លេង០១គ្រឿង និងខ្សែភ្លើង ប្រវែង១៥២០ម៉ែត្រផងដែរ។
លោកបញ្ជាក់ថា៖ការអនុវត្តឱ្យមានការគោរពទង់ជាតិរៀងរាល់ថ្ងៃច័ន្ទ និងថ្ងៃស្រុកនេះឡើងក៏ជាការបង្កប់នូវសារឱ្យមហាជនគ្រប់ស្រទាប់ចូលរួមពង្រឹងការគោរពវិន័យ សណ្តាប់ធ្នាប់របៀបរៀបរយនៅទីសាធារណៈ និងចង់បង្ហាញពីសក្តានុពលរបស់ស្រុកព្រោះថាស្រុកក្រឡាញ់ជាច្រកចេញចូលដ៏សំខាន់ផ្នែកខាងលិចនៃខេត្តសៀមរាបជាខេត្តប៉ូលទេសចរណ៍ដ៏សំខាន់ដែលរាជរដ្ឋាភិបាលប្រសិទ្ឋិនាមថាជាតារារះនៅទិសឧត្តរ។
នាពេលខាងមុខ រដ្ឋបាលស្រុកនឹងរៀបចំវិទ្យបណ្តាញនៅតាមបណ្តារដ្ឋបាលឃុំទាំង១០ហើយ និងឲ្យអនុវត្តការគោរពទង់ជាតិនៅតាមឃុំទាំងនោះព្រមទាំងបន្តបំផុសឱ្យ ស្ថាប័នអង្គការសង្គមស៊ីវិល និងវិស័យឯកជននានាចូលរួមអនុវត្តទាំងអស់គ្នាផងដែរ៕
អត្ថបទ រូបភាព យូ វង្ស
