គិតត្រឹម ៦ខែដើមឆ្នាំ២០២៣នេះ អាកាសយានដ្ឋានអន្តរជាតិសៀមរាប ទទួលបានអ្នកដំណើរប្រមាណជាង ៥០ម៉ឹននាក់ ដែលចំនួននេះ ឯកឧត្តម ស៊ិន ចាន់សេរីវុត្ថា អនុរដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរណ៍ស៊ីវិល រំពឹងថាអាចនឹងកើនដល់ជាង ១លាននាក់ ស្របពេលអាកាសយានដ្ឋានអន្តរជាតិសៀមរាបអង្គរ គ្រោងនឹងបើកជាផ្លូវការនៅពាក់កណ្ដាលខែតុលានេះ។
មានប្រសាសន៍ក្នុងដំណើរទស្សនកិច្ចពិនិត្យបច្ចេកទេស នៅអាកាសយានដ្ឋានអន្តរជាតិសៀមរាបអង្គរ ប៉ុន្មានថ្ងៃ មុនការបោះឆ្នោតជ្រើសតាំងតំណាងរាស្ត្រ នីតិកាលទី៧ ឯកឧត្តម ស៊ិន ចាន់សេរីវុត្ថា បង្ហាញថា បច្ចុប្បន្ន ខេត្តសៀមរាប មានក្រុមហ៊ុនអាកាសចរណ៍ចំនួន៨ កំពុងដំណើរការទៅតាមកម្មវិធី ចំពោះការហោះហើរក្រៅកម្មវិធី ហៅថា charter flights ក៏មានច្រើនផងដែរ។ ជាមួយនោះ ក្នុងមួយខែៗ ខេត្តសៀមរាប ទទួលបានអ្នកដំណើរប្រមាណជាង ១ម៉ឹននាក់។
ឯកឧត្តម អនុរដ្ឋលេខាធិការ បញ្ជាក់ថា តាមរបាយការណ៍ និងការចុះពិនិត្យបច្ចេកទេសផ្ទាល់នៅលើទីតាំង ការសាងសង់សម្រេចបានប្រមាណ ៩៨ភាគរយហើយ ដូច្នេះការបើកដំណើរការអាកាសយានដ្ឋានអន្តរជាតិសៀមរាបអង្គរ នឹងមិនមានការប្រែប្រួលឡើយ។
គួររំលឹកថា អាកាសយានដ្ឋានអន្តរជាតិសៀមរាបអង្គរ គឺជាអាកាសយានដ្ឋានអន្តរជាតិលំដាប់ 4E បានចាប់ផ្តើមសាងសង់កាលពីខែមីនា ឆ្នាំ២០២០ លើផ្ទៃដីប្រមាណ៧០០ហិកតា ស្ថិតនៅក្នុងភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម។ អាកាសយានដ្ឋាននេះ មានចំណតយន្តហោះរហូតដល់ទៅ ៣៨ទីតាំង។
អត្ថបទ៖ លោក សេង ផល្លី
