នៅថ្ងៃទី២៥ ខែកក្កដា ឆ្នាំ២០២៣នេះ ឯកឧត្តម គុជ លីណា អនុប្រធានគណ:កម្មាធិការសាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណ:អភិបាលខេត្ត និងជាប្រធានគណ:កម្មាធិការសាខាកាកបាទក្រហមកម្ពុជាខេត្តសៀមរាប រួមជាមួយនាយកប្រតិបត្តិ និងក្រុមការងារសាខាកាកបាទក្រហមកម្ពុជាខេត្ត និងសមាជិក សមាជិកា អនុសាខាកាកបាទក្រហមកម្ពុជាស្រុកក្រឡាញ់ បានអញ្ជើញសាកសួរសុខទុក្ខ និងនាំយកអំណោយសាខាកាកបាទក្រហមកម្ពុជាខេត្ត មកចែកជូនដល់បងប្អូនប្រជាពលរដ្ឋក្រីក្រី ចាស់ជរា ស្រ្តីមេម៉ាយចំនួន ១៥០គ្រួសារមកពីឃុំទាំង១០ ក្នុងស្រុកក្រឡាញ់។
លោក សុខ ណារ៉េត អភិបាលស្រុកក្រឡាញ់ និងប្រធានអនុសាខាកាកបាទក្រហមកម្ពុជាស្រុកមានប្រសាសន៍ថា៖ នេះជាសកម្មភាពមនុស្សធម៌របស់កាកបាទក្រហមកម្ពុជាសាខាខេត្តសៀមរាប ធ្វើឡើងតបតាមសេចក្តីរាយការណ៍របស់អាជ្ញាធរឃុំ ភូមិ អំពីស្ថានភាពរស់នៅប្រចំាថ្ងៃរបស់គ្រួសារក្រីក្រ និងងាយរងគ្រោះ ដែលក្នុងបន្ទុកគ្រួសារមានចាស់ជរា ជនមានពិការភាព ស្រ្តីមេម៉ាយកូនច្រើន បាននឹងកំពុងជួបការលំបាកខ្លំាងក្នុងជីវភាពរស់នៅប្រចំាថ្ងៃ។ អាជ្ញាធរឃុំ ភូមិ បានធ្វើការពិនិត្យ និងវាយតម្លៃ ឃើញថាពួកគាត់ទាំង ១៥០គ្រួសារពិតជាមានភាពខ្វះខាតក្នុងជីវភាពរស់នៅប្រចាំថ្ងៃពិតប្រាកដមែន និងដោយសារអនុសាខាកាកបាទក្រហមស្រុកពុំមានលទ្ធភាពដោះស្រាយបាន ទើបអនុសាខាកាកបាទក្រហមកម្ពុជាស្រុក ធ្វើសំណើសុំទៅ ឯកឧត្តម ប្រធានគណ:កម្មាធិការសាខាកាកបាទក្រហម កម្ពុជាខេត្ត ជួយដោះស្រាយជាអំណោយជូនដល់គ្រួសារកំពុងជួបការលំបាកខ្លាំង នៅថ្ងៃនេះ។ ក្នុងរបាយការណ៍របស់លោកស៊ុំ សំអន នាយកប្រតិបត្តិ និងក្រុមការងារសាខាកាកបាទក្រហមកម្ពុជា ខេត្តថា៖ អំណោយដែលនាំយកមកនេះក្នុងមួយគ្រួសារទទួលបានរួមមាន៖ អង្ករ ៣០គ.ក្រ, មី ១កេស, ត្រីខ ១យួរ, អំបិល ១គ.ក្រ, ស្ករស ១គ.ក្រ, ទឹកត្រី ១យួរ, ឃីត ១កញ្ចប់ (មុងភួសារុងក្រមា) និងថវិកា ៥ម៉ឺនរៀល។
ឯកឧត្តម គុជ លីណា អនុប្រធានគណ:កម្មាធិការសាខាកាកបាទក្រហមកម្ពុជាខេត្ត មានប្រសាសន៍ថា៖ សម្ភារ:អំណោយយកមកចែកជូននៅពេលនេះជាអំណោយទទួលបានពីសប្បុរសជននានា ដែលបានចូលរួមឧបត្ថម្ភមកដល់សាខាកាកបាទក្រហមកម្ពុជាខេត្ត ដើម្បីប្រើប្រាស់ទៅតាមភាពជាក់ស្តែងសម្រាប់ជួយគ្រួសារ ដែលងាយរងគ្រោះ និងមានភាពខ្វះខាតខ្លាំងក្នុងជីវភាពប្រចាំថ្ងៃ។ ឯកឧត្តម គុជ លីណា បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះប្រជាពលរដ្ឋគ្រប់រូប មិនប្រកាន់វណ្ណ: ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ឯកឧត្តម មានប្រសាសន៍ ផ្តាំផ្ញើឱ្យបងប្អូនប្រជាពលរដ្ឋយើងទាំងអស់សូមប្រុងប្រយ័ត្ន និងត្រូវបង្ការថែរក្សាចំពោះសុខភាព ដើម្បីទប់ស្កាត់កុំឱ្យឆ្លងជំងឺនានាយាយីមកលើកូនចៅ និងក្រុមគ្រួសារយើង ជាពិសេសក្នុងរដូវវស្សានេះត្រូវរក្សាអនាម័យក្នុងការរស់នៅឱ្យបានស្អាតជានិច្ច ដើម្បីបង្ការចៀសឆ្ងាយពីជំងឺរាគរុស និងគ្រុនចាញ់គ្រុនឈាមជាដើម និងប្រយ័ត្នជានិច្ចចំពោះកុមារតូចៗកុំឱ្យទៅលេងទឹកថ្លុក ប្រឡាយ បឹងបួរ ខ្លាចក្រែងគ្រោះថ្នាក់កើតឡើងជាយថាហេតុ ហើយបើសង្ស័យថាមានកើតជំងឺណាមួយសូមរួសរាន់ទៅកាន់មណ្ឌលសុខភាពដែលនៅកៀកជិតនឹងមូលដ្ឋានរបស់យើងឲ្យបានទាន់ពេលវេលា៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
