រថយន្តក្រុងសាធារណ:ចំនួន ១០គ្រឿង ដែលបានដឹកជញ្ជូនប្រជាពលរដ្ឋ ដោយឥតគិតថ្លៃ ពីរាជធានីភ្នំពេញ មកកាន់ខេត្តសៀមរាប ដើម្បីមកចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី៧ នៅថ្ងៃអាទិត្យ ទី២៣ ខែកក្កដាស្អែកនេះ គឺពុំទាន់គ្រប់តម្រូវការធ្វើដំណើររបស់ប្រជាពលរដ្ឋនៅឡើយទេ ខណ:ក្រុមការងារ របស់រដ្ឋាករស្វយ័តដឹកជញ្ជូនសាធារណ:សាលារាជធានីភ្នំពេញ បានបង្ហើបថាបានទទួលបទបញ្ជា បន្ថែមរថយន្តក្រុងសាធារណ: បន្ថែមទៀត។
តាមការឱ្យដឹងពីប្រជាពលរដ្ឋ ដែលបានធ្វើដំណើរតាមរថយន្តក្រុងសាធារណ:ទាំងនោះ ដែលផ្ដល់ដោយរាជរដ្ឋាភិបាល ថាមានចំនួនច្រើន។ សម្ដេចតេជោ ហ៊ុន សែន នាយករដ្ឋមន្ត្រី បានចេញបទបញ្ជាឲ្យសាលារាជធានីភ្នំពេញបញ្ចេញរថយន្ត ចំនួន៤៣០គ្រឿង ដើម្បីដឹកជញ្ជូនបងប្អូនប្រជាពលរដ្ឋ ឲ្យមកចូលរួមបោះឆ្នោតនៅតាមបណ្តាខេត្ត ក្នុងនោះខេត្តសៀមរាប មានចំនួនជាង ១០គ្រឿង។ ទន្ទឹមនឹងនោះ បងប្អូនប្រជា ពលរដ្ឋ ដែលបានធ្វើដំណើរមកកាន់គោលដៅខេត្តសៀមរាប លើកឡើងថា គឺជាការបំពេញកាតព្វកិច្ចជាពលរដ្ឋល្អ ហើយក៏ជាការបង្ហាញសិទ្ធជាពលរដ្ឋស្របច្បាប់មួយរូប ក្នុងការជ្រើសរើសតំណាងរាស្ត្រ ដែលខ្លួនពេញចិត្ត។
តាមការលើកឡើងប្រហាក់ប្រហែលគ្នា ពួកគាត់រំពឹងដែរថា បន្ទាប់ពីការបោះឆ្នោតបានបញ្ចប់ ប្រទេសកម្ពុជា នឹងទទួលបានមេដឹកនាំ ដែលមានសមត្ថភាព ដែលអាចនាំមកនូវសុខសន្តិភាព និងកាន់តែមានការអភិវឌ្ឍបន្ថែមទៀត ដូចបណ្ដាប្រទេសជឿនលឿននានា ខណ:បច្ចុប្បន្នពួកគាត់បញ្ជាក់ថាប្រទេសកម្ពុជា បាននឹងកំពុងមានការអភិវឌ្ឍលើគ្រប់វិស័យគួរឲ្យកត់សំគាល់ផងដែរ។
ព័ត៌មានជាតិ ថ្មីៗ
ជាមួយទឹកចិត្តសប្បាយរីករាយ ពួកគាត់មើលឃើញថា ការផ្ដល់ជូននូវការធ្វើដំណើរតាមរថយន្តក្រុង ដោយមិនគិតថ្លៃ នៅអំឡុងពេលបោះឆ្នោតនេះ បានជួយសម្រួលដល់ការចំណាយរបស់ប្រជាពលរដ្ឋ យ៉ាងច្រើន ដែលនេះជាការគិតគូរខ្ពស់របស់ប្រមុខរាជរដ្ឋាភិបាលកម្ពុជា។
សូមជម្រាបជូនថា យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ ក៏ដូចជារដ្ឋបាលខេត្តសៀមរាប កាលពីពេលថ្មីៗនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដល់រថយន្តក្រុងសាធារណ:សរុបចំនួន ៤៣០គ្រឿង ក្នុងនោះរថយន្តក្រុងសាធារណ:មកកាន់ខេត្តសៀមរាបមានចំនួន ១០គ្រឿង ដើម្បីដឹកជញ្ជូនប្រជាពលរដ្ឋពីរាជធានីភ្នំពេញ ទៅកាន់បណ្ដាខេត្តនានានៅថ្ងៃទី២២ ខែកក្កដា ឆ្នាំ២០២៣ ដើម្បីជួយសម្រួលឲ្យបងប្អូនបានចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី៧ ដោយពុំមានបង់ប្រាក់ ការកក់ទុកជាមុន ឬទាមទារឯកសារអ្វីទាំងអស់។ ចំពោះការវិលត្រឡប់មកពីតាមបណ្ដាខេត្ត មករាជធានីភ្នំពេញវិញ គឺនឹងចេញដំណើរនៅថ្ងៃទី២៤ ខែកក្កដា ឆ្នាំ២០២៣៕
អត្ថបទ និងរូបភាព: លោកសេង ផល្លី កែសម្រួលដោយ លីវ សុខុន!!! សូមឯកឧត្តមមេត្តាជ្រាបសូមអរគុណ។
