នាព្រឹកថ្ងៃទី២៧ ខែកក្កដា ឆ្នាំ២០២៣នេះ គណៈកម្មការរៀបចំការបោះឆ្នោតខេត្តសៀមរាប បានធ្វើការត្រួតពិនិត្យ បូកសរុបលទ្ឋផល និងរៀបចំប្រមូលសម្ភារឯកសារសម្រាប់បំរើឱ្យការបោះឆ្នោតដែលនៅសេសសល់ ដើម្បីបញ្ជូនទៅកាន់លេខាធិការដ្ឋាន នៃគណៈកម្មាធិការជាតិរៀបចំការបោះឆ្នោត ។
លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប មានប្រសាសន៍ថា៖ តាមនីតិវិធីនៃច្បាប់បោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ គណៈកម្មការរៀបចំការបោះឆ្នោតខេត្តសៀមរាប បានបង្កើតមជ្ឈមណ្ឌលមួយ សម្រាប់ការត្រួតពិនិត្យនិងបូកសរុបលទ្ឋផលនៃការបោះឆ្នោតទូទាំងខេត្ត ដោយបែងចែកជា៣ក្រុម ស្មើនឹង១២នាក់ ព្រមទាំងអញ្ជើញតំណាងគណបក្សនោយបាយ និងភ្នាក់ងារសង្កេតការណ៍ពីបណ្តាអង្គការសង្គមស៊ីវិល សមាគមនានាដើម្បីចូលរួមជាសាក្សីនិងចុះហត្ថលេខាផងដែរ។
លោក នឹម វ៉ាន់សំ បន្ថែមថា៖ ជាទូទៅតាមនីតិវិធី ក្រោយពីការបោះឆ្នោតបានបញ្ច ប់លទ្ឋផលនិងសម្ភារៈនៃការបោះឆ្នោត នៅតាមការិយាល័យនីមួយៗ ត្រូវបញ្ជូនមកគណៈកម្មការឃុំសង្កាត់រៀបចំការបោះឆ្នោត ក្រោយពីគណៈកម្មការឃុំសង្កាត់រៀបចំការបោះឆ្នោត ត្រួតពិនិត្យនិងដោះស្រាយពាក្យបណ្តឹងរួចហើយប្រសិនបើមាន ត្រូវប្រមូលវិចខ្ចប់បញ្ជូនទិន្នន័យនិងសម្ភារៈនៃការបោះឆ្នោត មកកាន់គណៈកម្មការរៀបចំការបោះឆ្នោតខេត្តសៀមរាប ដើម្បីធ្វើការរៀបចំវិចខ្ចប់តាមលំដាប់លំដោយពីកញ្ចប់ក.ខ.គ បញ្ចូលទៅកញ្ចប់ ឃ តែមួយ ព្រុមទាំងប្រមូលសម្ភារៈសេសសល់ មានទឹកខ្មៅ កេសការិយាល័យបោះឆ្នោត ហិបឆ្នោត បន្ទប់សំងាត់ ជាដើម បញ្ជូនទៅគណៈកម្មាធិការជាតិរៀបចំការបោះឆ្នោតតាមនីតិវិធី។
លោក នឹម វ៉ាន់សំ បានអះអាងផងដែរថា៖សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧ឆ្នាំ២០២៣នៅខេត្តសៀមរាប ក្រៅតែពីភ្លៀងរលឹមនៅថ្ងៃបោះឆ្នោត ទាំងអំឡុងយុទ្ឋនាការនៃការឃោសនា គឺដំណើរការនៃការបោះឆ្នោត បានប្រព្រឹត្តិទៅយ៉ាងរលូនពុំមានបញ្ហាអ្វីកើតឡើង និងពុំទទួលបានពាក្យបណ្តឹងឡើយ។
សូមបញ្ជាក់ថា គណៈកម្មការរៀបចំការបោះឆ្នោតខេត្តសៀមរាប បានបែងចែកក្រុមការងារសម្រាប់ត្រួតពិនិត្យលទ្ឋផលចំនួន៣ក្រុម ស្មើនឹង១២នាក់ ដើម្បីទទួលត្រួតពិនិត្យនៅតាមបណ្តាឃុំសង្កាត់ផ្សេងៗគ្នា ដោយធ្វើការការត្រួតពិនិត្យកំណត់ហេតុ បូកសរុបលទ្ឋផលនៃការបោះឆ្នោតក្នុងឃុំសង្កាត់ តាមទម្រង់១១០៣ និងតារាងបូកសរុបលទ្ឋផល ក្នុងទម្រង់១១០៩ ត្រួតពិនិត្យទិន្នន័យលទ្ឋផលនៃការបោះឆ្នោត ដែលគណៈកម្មការឃុំសង្កាត់រៀបចំការបោះឆ្នោត បានបញ្ជូនតាមអ៊ីនធឺណិត ឬហ្វ្លាស់ រក្សាទិន្នន័យដែល គណៈកម្មការឃុំសង្កាត់រៀបចំការបោះឆ្នោតបញ្ជូនមក បញរមទាំងបានធ្វើការត្រួតពិនិត្យកំណត់ហេតុនៃការបោះឆ្នោត តារាងកត់ត្រាសំឡេងឆ្នោត និងកំណត់ហេតុរាប់សន្លឹកឆ្នោត ៕
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
