នៅថ្ងៃទី២៨ ខែកក្កដា ឆ្នាំ២០២៣ លោកជំទាវ ទាង អេង ទៀសីហា អនុប្រធានគណៈកម្មាធិការកាកបាទក្រហមកម្ពុជាសាខាខេត្តសៀមរាប បានអញ្ជើញប្រគល់ផ្ទះមនុស្សធម៌ទី៨៧ ដល់លោកតា សាត វឿន អាយុ៧៣ឆ្នាំ និងប្រពន្ធឈ្មោះ ឆែម អាន ដែលជាជនចាស់ជរា ទីទ័លក្រ រស់នៅភូមិល្វា ឃុំស្រែណូយ ស្រុកវ៉ារិន ខេត្តសៀមរាប។
តាមរបាយការណ៍របស់សាខាកាកបាទក្រហមកម្ពុជា ខេត្តសៀមរាប បានឲ្យដឹងថា លោកតា សាត វឿន និងភរិយា មានកូនចំនួន៥នាក់ ក្នុងនោះកូនប្រុសវ័យ ៤៨ឆ្នាំជាអតីតយុទ្ធជន ពិការភ្នែក និងពិការដៃ ក្នុងសមរភូមិអន្លង់វែងក្នុងឆ្នាំ១៩៩៧ និងកូនស្រីវ័យ ៤១ឆ្នាំជាស្ត្រីមេម៉ាយ ប្ដីស្លាប់ដោយគ្រោះថ្នាក់ចរាចរណ៍។ ដោយឡែកកូន៣នាក់ទៀត បានបែកគ្រួសារ និងទៅធ្វើការនៅឆ្ងាយពីផ្ទះ។ បច្ចុប្បន្ន លោកតា លោកយាយ និងកូនស្រី ស្នាក់នៅក្នុងខ្ទមទ្រុឌទ្រោម និងសំយ៉ាបជង្រុកស្រូវ រីឯកូនប្រុសមានពិការភាពស្នាក់នៅវត្ត។
ថ្លែងសំណេះសំណាល ជាមួយលោកតាលោកយាយ និងប្រជាពលរដ្ឋមានជីវភាពខ្វះខាត១០០គ្រួសារ លោកជំទាវ ទាង អេង ទៀសីហា បញ្ជាក់ថា ផ្ទះមនុស្សធម៌ទី៨៧ និងអំណោយដែលបាននាំយកមកប្រគល់ជូនលោកតា លោកយាយ និងបង ប្អូនប្រជាពលរដ្ឋនាពេលនេះ គឺទទួលបានពីសាខាកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជាប្រធាន។ ជានិច្ចជាកាលសម្ដេច តែងតែមានការយកចិត្តទុកដាក់ខ្ពស់ ចំពោះសុខទុក្ខប្រជាពលរដ្ឋជួបទុក្ខលំបាក ដោយមិនប្រកាន់និន្នាការនយោបាយ ពណ៌សំបុរ សាសនាអ្វីឡើយ។ លោកជំទាវ ក៏បានថ្លែងអំណរគុណដល់ក្រុមការងារសាខាកាកបាទក្រហមកម្ពុជា ខេត្តសៀមរាប ដែលតែងតែលះបង់នូវកម្លាំងកាយ មិនខ្លាចការនឿយហត់ ធ្វើយ៉ាងណាទៅឱ្យដល់កន្លែងប្រជាពលរដ្ឋដែលកំពុងជួបទុក្ខលំបាក ក៏ដូចជាកិច្ចសហការល្អពីអាជ្ញាធរមូលដ្ឋានគ្រប់លំដាប់ថ្នាក់។
ទន្ទឹមនោះ លោកជំទាវ ក៏បានបង្ហាញនូវទឹកចិត្តសប្បាយរីករាយ ចំពោះបងប្អូនប្រជាពលរដ្ឋក្នុងស្រុកវ៉ារិន ដែលបានបង្ហាញនូវឆន្ទៈទៅចូលរួមបោះឆ្នោតជ្រើសតាំងតំណាងរាស្ត្រនីតិកាលទី៧ កន្លងមកយ៉ាងច្រើនកុះករ។ លោកជំទាវ បញ្ជាក់ថានេះ ជាសកម្មភាពបង្ហាញពីការឈឺឆ្អាលជាមួយប្រទេសជាតិ ដើម្បីជ្រើសរើសមេដឹកនាំដែលមានសមត្ថភាព និងសាកសមសម្រាប់ដឹកនាំប្រទេសកម្ពុជាទៅរកសុខសន្តិភាព និងការអភិវឌ្ឍកាន់រីកចម្រើនបន្ថែមទៀត។
គួរជម្រាបថា មនុស្សធម៌ទី៨៧នេះ សង់លើផ្ទៃដីផ្ទាល់ខ្លួនរបស់លោកតាលោកយាយ មានទំហំ ៦ម៉ែត្រ x ៦ម៉ែត្រ មាន២បន្ទប់ ដំបូលប្រក់ស័ង្កសីភ្លីក្បឿង ជញ្ជាំងស្មាតបត និងបាតក្រាលការ៉ូ មានកម្ពស់ផុតពីដីកន្លះម៉ែត្រ ។ ក្នុងនោះ សាខាកាកបាទក្រហមកម្ពុជា ខេត្តសៀមរាប ក៏បាននាំយកអំណោយជូនលោកតា លោកយាយ ដើម្បីឡើងគេហដ្ឋានថ្មី រួមមាន អង្ករ ៦០គ.ក មី ២កេស ត្រីខ ២យួរ ថវិកា ៤០ម៉ឹនរៀល ព្រមទាំងគ្រឿងឧបភោគបរិភោគ និងសម្ភារៈមួយចំនួនទៀត។ ដោយឡែក គ្រួសារក្រីក្រចំនួន ១០០គ្រួសារ ក្នុងមួយគ្រួសារទទួលបាន អង្ករ ៣០គ.ក មី ១កេស ត្រីខ ១យួរ ថវិកា ៤ម៉ឹនរៀល ព្រមទាំងគ្រឿងឧបភោគបរិភោគ និងសម្ភារៈមួយចំនួនទៀតផងដែរ។
អត្ថបទ និងរូបភាព៖ លោក ជា ស្រស់
កែសម្រួលអត្ថបទ ៖ លោក សេង ផល្លី
