ក្នុងគោលដៅលើកកម្ពស់មុខមាត់តំបន់ទេសចរណ៍ដ៏សំខាន់របស់កម្ពុជា រដ្ឋមន្ត្រីក្រសួងសង្គមកិច្ច អតីតយុទ្ធជន និង យុវនីតិសម្បទា បានជំរុញដល់ក្រុមការងារដោះស្រាយបញ្ហាជនអនាថា អ្នកសុំទាន ជនវិបល្លាសស្មារតី ធ្វើការប្រមូលពួកគាត់ដែលកំពុងនៅតាមទីសាធារណៈ ទីប្រជុំជន ឬតាមរមណីយដ្ឋាន យកមកដាក់នៅមណ្ឌលអប់រំ និងបញ្ជូនពួកគាត់ទៅព្យាបាល។
ក្នុងដំណើរចុះបំពេញបេសកកម្មនៅខេត្តសៀមរាប នៅរសៀលថ្ងៃទី០៨ ខែសីហា ឆ្នាំ២០២៣នេះ ឯកឧត្តម វង សូត បានលើកឡើងថា ខេត្តសៀមរាប ជាខេត្តគោលដៅនៃប៉ូលសេដ្ឋកិច្ចទេសចរណ៍វប្បធម៌ធម្មជាតិប្រវត្តិសាស្ត្រ ដែលសម្បូរទៅដោយប្រាង្គប្រាសាទ រមណីយដ្ឋានធម្មជាតិ ដែលបានកំពុងទាក់ទាញភ្ញៀវទេសចរណ៍ជាតិ អន្តរជាតិ ក្រោយពេលវិបត្តិជំងឺកូវីដ១៩ មានភាពធូស្រាល រាជរដ្ឋាភិបាលបានកំពុងធ្វើការស្តារ ឡើងវិញលើវិស័យទេសចរណ៍ ដែលជាឧស្សាហ៍កម្មគ្មានផ្សែង។ ដើមី្បរក្សាឲ្យនូវវប្បធម៌ប្រពៃណីជាតិ និង កុំឲ្យមានផលប៉ះពាល់ដល់សតិអារម្មណ៍ភ្ញៀវទេសចរ និង ធានានូវសុវត្ថិភាពដល់ភ្ញៀវ និង រក្សនូវសោភណ្ឌភាពនៃក្រុងវប្បធម៌មួយនេះ ក្រុមការងារដោះស្រាយបញ្ហាជនអនាថា អ្នកសុំទាន ជនវិបល្លាសស្មារតី ធ្វើការប្រមែប្រមូលនៅតាមទីសាធារណៈ ទីប្រជុំជន និង តាមតំបន់រមនីយដ្ឋាន យកមកដាក់នៅមណ្ឌលធ្វើការអប់រំ និង បញ្ជូនទៅធ្វើការព្យាបាលផងដែរ។
ឯកឧត្តមរដ្ឋមន្ត្រី បានធ្វើការវាយតម្លៃខ្ពស់ចំពោះកិច្ចខិតខំរបស់ថ្នាក់ដឹកនាំ និងមន្ត្រីនៃមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប សំខាន់លើកិច្ចសហការបានល្អជាមួយអាជ្ញាធរមូលដ្ឋាន ស្ថាប័ន អង្គភាពពាក់ព័ន្ធ និងដៃគូអភិវឌ្ឍន៍។ ឯកឧត្តម បានជម្រុញដល់ថ្នាក់ដឹកនាំ និងមន្ត្រីនៃមន្ទីរសង្គមកិច្ច អតីតយុទ្ធជន និងយុវនីតិសម្បទា ត្រូវអនុវត្តគោលនយោបាយដែលពាក់ព័ន្ធលើវិស័យសង្គមកិច្ច អតីតយុទ្ធជននិងយុវនីតិ សម្បទា ប្រកបដោយភាពជោគជ័យតាមផែនការ និងទិសដៅដែលក្រសួងបានដាក់ចេញ ព្រមទាំងត្រូវបន្តកិច្ចសហការឲ្យបានជិតស្និទ្ធជាមួយថ្នាក់ដឹកនាំនិងជំនាញរបស់ក្រសួង ថ្នាក់ដឹកនាំខេត្ត មន្ទីរជំនាញពាក់ព័ន្ធ និងដៃគូអភិវឌ្ឍន៍ ដើម្បីស្វែងរកយុទ្ធសាស្រ្តអនុវត្តការងារប្រកប ដោយភាពល្អប្រសើរឡើងនិង ប្រសិទ្ធភាពខ្ពស់។
យោងតាមរបាយការណ៍របស់លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានឲ្យដឹងថា រយៈពេល៧ខែ ឆ្នាំ២០២៣នេះ មជ្ឈមណ្ឌលសំចត សង្គមកិច្ចខេត្ត បានទទួលជនអនាថា អ្នកសុំទាន និង ជនវិបល្លាសស្មារតី សរុបចំនួន ១០៣នាក់ ស្រី ៤៩នាក់ ព្រមទាំងបានបញ្ជូនជនអនាថា មានសារធាតុញៀន ចំនួន១៣នាក់ ស្រី២នាក់ ទៅទទួលការព្យាបាលនៅមជ្ឈមណ្ឌលស្តារនីតិសម្បទា អ្នកញៀនគ្រឿងញៀនខេត្ត និងបញ្ជូនជន វិបល្លាសស្មារតី ទៅមជ្ឈមណ្ឌលស្តារនីតិសម្បទា ជនមានវិបល្លាសស្មារតី នៅខេត្តកណ្តាល ចំនួន២០នាក់ ស្រី០៤នាក់។ មជ្ឈមណ្ឌលសំចតសង្គមកិច្ចនេះ បានសាងសង់បន្ទប់ស្នាក់នៅទៅតាមស្តង់ដា បច្ចេកទេស ដោយយកចិត្តទុកដាក់ខ្ពស់ ពីសុវត្ថិភាព នៅពេលដែលប្រមូលបងប្អូនជាជនអនាថា អ្នកសុំទាន និង ជនវិបល្លាសស្មារតី មក ស្នាក់សំចត ព្រមទាំងមានរថយន្តសង្គ្រោះមួយគ្រឿង នៅប្រចាំការក្នុងមណ្ឌលទៀតផង។ លោកប្រធានមន្ទីរ ក៏បានលើកនូវបញ្ហាប្រឈម និងសំណូមពរមួយចំនួន ដល់ឯកឧត្តមរដ្ឋមន្ត្រី ព្រមទាំងបានលើកទិសដៅក្នុងការអនុវត្តបន្តទៀតផង៕
អត្ថបទ និងរូបភាព៖ លោក ជា ស្រស់ ,លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
