ចង្ក្រានសម័យថ្មី ដែលមានចង្ក្រានមេត្រីភាពបរិស្ថាន ត្រូវបានគេមើលឃើញថា កំពុងដើរតួនាទីជំនួសចង្រានពីបុរាណបន្តិចម្តង បន្ទាប់ពីប្រជាពលរដ្ឋដែលបានប្រើប្រាស់វាបានដឹងពីគុណតម្លៃ និងសន្សំសំចៃ។
អ្នកស្រី ឈ វ៉ាន់លី រស់នៅភូមិបុស្សក្រឡាញ់ សង្កាត់ជ្រាវ ដែលទើបនឹងប្រើប្រាស់ចង្ក្រានបរិស្ថាននេះបានប្រមាណជារយៈពេល១ខែ បានលើកឡើងថា កាលពីមុនអ្នកស្រីបានប្រើចង្ក្រានហ្គាស ឬចង្ក្រានឡូវ ដែលប្រើអុស ធ្យូងធម្មតា នៅក្នុងការចម្អិនម្ហូបអារប្រចាំថ្ងៃ។ ប៉ុន្តែក្រោយពីឃើញមិត្តភក្តិប្រើចង្រ្កានបរិស្ថាននេះ មានភាពងាយស្រួល ចំណាយតិច ក៏សាកល្បងប្រើវា ឃើញថា វាល្អមែន។ អ្នកស្រី ឈ វ៉ាន់លី លើកឡើងថា ប្រើចង្ក្រានឡូវ ពេលបង្កាត់ភ្លើងម្តងផ្សែងហុយទ្រលោម ឡើងក្រហាយភ្នែក។ ម្យ៉ាងប្រើចង្រ្កានឡូវពីមុនហ្នឹង ចុះអុស ចុះធ្យូងណាស់។
ចំណែកលោក ហូ ឆប ជាម្ចាស់តៀមកាហ្វេមួយកន្លែងនៅភូមិក្រសាំង សង្កាត់ជ្រាវ បានប្រាប់ថា ចង្ក្រានបរិស្ថាន បានជួយឲ្យលោកចំណេញទាំងពេលវេលា ទាំងកម្លាំង ទាំងថវិកា ហើយមិនបំពុលបរិស្ថាន។ លោកនិយាយថា កាលពីពេលប្រើចង្រ្កានឡូវ លោកត្រូវក្រោកដាំទឹកតាំងពីម៉ោងបីម៉ោង៤ ទៀបភ្លឺដើម្បីបង្កាត់ភ្លើងដាំទឹក។ ប៉ុន្តែចាប់ពីប្រើចង្ក្រានបរិស្ថាន អស់ពេលជាងមួយឆ្នាំមកនេះ លោកក្រោកមកដាំទឹកនៅប្រមាណជាងម៉ោង៥ភ្លឺក៏អាចទាន់ដល់ការឆុងកាហ្វេលក់ដែរ។
ព័ត៌មានជាតិ ថ្មីៗ
ចំណែកអ្នកភូមិក្រសាំងម្នាក់ទៀត គឺលោក លន កំសត់ ដែលកំពុងប្រើចង្ក្រានបរិស្ថានដើម្បីចម្អិនបាយ បានលើកឡើងដែរថា ប្រើចង្ក្រានបរិស្ថាននេះដាំបាយ លោកមិនបារម្ភខ្លាចបាយខ្លោច ឬក៏មានហានិភ័យអ្វីផ្សេងៗនៅពេលយើងរវល់ភ្លេចខ្លួននោះទេ។ លោកថា វាល្អប្រើ ចំណាយតិច និងជួយបរិស្ថាន។
ចង្ក្រានបរិស្ថាន ACE1 ត្រូវបាននាំចូលពីប្រទេសហូឡង់ កាលពីឆ្នាំ២០១៦ ។ ប៉ុន្តែនៅឆ្នាំ២០២០ ក្រុមការងារក៏រៀបចំផលិតនៅកម្ពុជា ដែលមានទីតាំងស្ថិតនៅសង្កាត់ជ្រាវ ក្រុងសៀមរាប។ ដោយបុគ្គលិកទាំងអស់ត្រូវបាន ការបណ្តុះបណ្តាលផ្ទាល់ពីគ្រូជនជាតិហូឡង់ លើជំនាញ និងបច្ចេកទេសនៃការផលិត ជួសជុល និងរបៀបថែទាំចង្ក្រាន ។
លោក សែម ចាន់វាសនា ប្រធានផ្នែកលក់របស់ស្ថាប័នចង្ក្រានបរិស្ថាន ACE1 បានប្រាប់ឱ្យដឹងថា ដោយសារមើលឃើញពីគុណប្រយោជន៍របស់ចង្ក្រានបរិស្ថាននេះ ប្រជាពលរដ្ឋកម្ពុជា បានចាប់អារម្មណ៍និងបានប្រើប្រាស់ចង្ក្រាននេះ មានការកើនឡើង។ លោក វាសនា បញ្ជាក់ថា ចំពោះគុណភាពនៃចង្ក្រានបរិស្ថាននេះ គឺអាចប្រើប្រាស់រហូតដល់ទៅចន្លោះពី ៨ ទៅ ១០ ឆ្នាំ និងអត្ថប្រយោជន៍របស់វា គឺជួយសន្សំសំចៃថវិកាទៅលើការទិញអុស ឬធ្យូងបាន ៦៥% បើប្រៀបធៀបនឹងការប្រើចង្ក្រានដទៃ ហើយអាចមួលបញ្ជាឱ្យចេញកម្តៅតិច ឬខ្លាំងបាន ដែលក្តៅខ្លាំងរហូតដល់៩០០ ឬ១០០០ អង្សា ហើយចង្ក្រាននេះអាចទ្រទំងន់បាន៨០ គីឡូក្រាម។
លោកបន្ថែមថាចំពោះសុវត្ថភាព គឺមិនផ្ទុះបណ្តាលឲ្យគ្រោះថ្នាក់ ឬក៏ធ្លាក់កន្ទុយអុសដែលអាចបង្កឲ្យមានភ្លើងឆេះផ្ទះ។ ចង្រ្កាននេះ ក៏អាចកាត់បន្ថយផ្សែងរហូតដល់ទៅ ៩៥% ដែលមិនបង្កផលប៉ះពាល់ដល់សុខភាព និងបរិស្ថានធម្មជាតិ។ ក្រៅពីការផលិតចង្ក្រានដែលមានមេត្រីភាពជាមួយបរិស្ថាននេះ អាជីវកម្មរបស់លោកក៏បានផលិតអុសបរិស្ថាន ដែលផលិតចេញពីកាកអំពៅ និងពីកម្ទិចកម្ទីឈើអាចម៍រណា ដែលពីមុនវត្ថុធាតុដើមទាំងអស់នេះ ត្រូវបានគេយកទៅបោះចោល ទៅដុតចោលនៅតាមទីកន្លែងផ្សេងៗបង្កឲ្យមានការបំពុលយ៉ាងធ្ងន់ធ្ងរដល់បរិស្ថាន៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
