សមាគមទីភ្នាក់ងារធ្វើដំណើរអាស៊ីប៉ាស៊ីហ្វិក ហៅកាត់ថា PATA បានសហការជាមួយក្រសួងទេសចរណ៍ បើកបណ្តុះបណ្តាលអ្នកជំនាញបន្ថែម (Upskiing) ដល់ប្រតិបត្ដិករទេសចរណ៍ ដើម្បីស្ដារ និងលើកស្ទួយទេសចរណ៍មុននឹងក្រោយវិបត្តិកូវីដ-១៩ ដែលវគ្គបណ្ដុះបណ្ដាលនេះ ធ្វើឡើងនៅសណ្ឋាគារសុខាល័យអង្គរ មានរយៈពេលពីរថ្ងៃ ចាប់ពីថ្ងៃទី១០-១១ ខែសីហា ឆ្នាំ២០២៣នេះ។
ឯកឧត្ដម ប៉ាក់ សុខុម រដ្ឋលេខាធិការក្រសួងទេសចរណ៍ មានប្រសាសន៍ថា វគ្គបណ្តុះបណ្តាលដ៏មានសារៈសំខាន់នេះ នឹងចូលរួមចំណែកយ៉ាងធំធេងក្នុងការពង្រឹងសមត្ថភាពអ្នកជំនាញទេសចរណ៍ ម្ចាស់អាជីវកម្មធុនតូច និងមធ្យមក្នុងវិស័យទេសចរណ៍ (SMEs)។ ក្រៅពីនោះសិក្ខាកាមទាំងអស់ នឹងទទួលបាននូវជំនាញបន្ថែមលើការគ្រប់គ្រងហិរញ្ញវត្ថុ ក៏ដូចជាការប្រើប្រាស់នូវបច្ចេកវិទ្យាថ្មីៗ តាមរយៈប្រព័ន្ធឌីជីថលក្នុងការទ្រទ្រង់ដល់អាជីវកម្មនៃវិស័យទេសចរណ៍នៅកម្ពុជា ក្នុងការស្តារ និងលើកស្ទួយទេសចរណ៏កម្ពុជា ក្នុងអំឡុងមុននិងក្រោយវិបត្តិកូវីដ-១៩ បានយ៉ាងមានប្រសិទ្ធភាព។ ជាក់ស្ដែងត្រឹមរយៈពេល ៦ខែ ឆ្នាំ២០២៣នេះ កម្ពុជាទទួលបានទេសចរអន្តរជាតិចំនួនជិត ២.៥លាននាក់ កើនឡើង៤០៨.១% ទេសចរជាតិប្រមាណ ១១លាននាក់ កើនឡើង ៧៣,២% ទេសចរជាតិចេញក្រៅមានចំនួន ៨៦ម៉ឺននាក់ កើនឡើង ៣៧៦,១%។
ឯកឧត្ដមបន្តថា កាលពីពេលកន្លងទៅប្រទេសជាសមាជិកអាស៊ាន បានឯកភាពដាក់បញ្ចូលបន្ថែមជំនាញម៉ាយស៍ (MICE) ចំនួន ៣២មុខ និងជំនាញស្ប៉ា (SPA) ចំនួន ៦បន្ថែមទៀត ដោយកម្ពុជាទទួលបន្ទុកដឹកនាំរៀបចំកម្មវីធីសិក្សាស្ប៉ា។ ដូចនេះចាប់ពីឆ្នាំ២០២៣មក អាស៊ាននឹងមានជំនាញចំនួន៧០ សម្រាប់បម្លាស់ទីការងារ និងបណ្តុះបណ្តាលតាមស្ដង់ដារួម ដែលនឹងផ្តល់ជម្រើសការងារ និងជំនាញបន្ថែមទៀត ដល់យុវជនកម្ពុជា ក្នុងការចាប់យកជំនាញទេសចរណ៍ទាំងសម្រាប់យុវជនសម្រាប់អ្នកធ្លាក់បាក់ឌុប ឬយុវជនដែលបានបញ្ចប់ការសិក្សាថ្នាក់ទី៨។ ហើយតាមរយៈការសិក្សា និងបទពិសោធន៍កន្លងមក បានបង្ហាញថា យុវជនកម្ពុជាដែលមានជំនាញទេសចរណ៍ អាចបំពេញការងារតាមអាជីវកម្មទេសចរណ៍ ឬបើកអាជីវកម្មខ្លួនឯងផ្ទាល់ ជាសហគ្រាសខ្នាតតូចបំផុត ខ្នាតតូច និង មធ្យម (MSME)។
មានប្រសាសន៍ក្នុងឱកាសនោះដែរ លោក យុន លីនណេ អភិបាលរងខេត្ដ បានលើកឡើងថា វគ្គបណ្តុះបណ្តាលជំនាញបន្ថែមនាថ្ងៃនេះ បានបង្ហាញអំពីការយកចិត្តទុកដាក់របស់រាជរដ្ឋាភិបាល ដែលមានក្រសួងទេសចរណ៍ជាសេនាធិការ សហការជាមួយសមាគម ទីភ្នាក់ងារធ្វើដំណើរអាស៊ីប៉ាស៊ីហ្វិក(PATA) រៀបចំវគ្គបណ្តុះបណ្តាល ដើម្បីបង្កើនការយល់ដឹង និងជំនាញបន្ថែមទៅដល់ ម្ចាស់អាជីវកម្ម គ្រូបង្គោល ក៏ដូចជាមន្ត្រីបង្គោលប្រចាំមូលដ្ឋាន ទេសចរណ៍ ដែលជាក្រុមគោលដៅដ៏សំខាន់ក្នុងការចូលរួមជម្រុញ វិស័យទេសចរណ៍ឱ្យមានសន្ទុះ និងមាននិរន្តភាព។ ចំណេះដឹងថ្មីៗគឺជាព័ត៌មានមិនអាចខ្វះបានសម្រាប់ម្ចាស់ អាជីវកម្មគ្រប់រូប ជាក់ស្ដែងដូចជា៖ របាយការណ៍ហរិញ្ញវត្ថុ ប្រតិបត្តិការទិញ/លក់ ការគ្រប់គ្រងការចំណាយ ការគ្រប់គ្រង ផលិតផលឬសេវាកម្មរបស់ខ្លួនឱ្យមានប្រសិទ្ធភាព ដើម្បីឱ្យអាជីវ- កម្មរបស់ខ្លួនទទួលបានភាពរីកចម្រើន ព្រមទាំងអាចដើរទន្ទឹមនឹងការអភិវឌ្ឍឥតឈប់ឈររបស់សាកលលោក។
លោក យុន លីនណេ មានប្រសាសន៍ទៀតថា ចំណេះដឹងក្នុងការចេះធ្វើទីផ្សារឬការផ្សព្វផ្សាយក៏ជាជំនាញ មួយដែលមិនគួរមើលរំលង ព្រោះថាបើម្ចាស់អាជីវកម្មមានកង្វះ ខាតចំណេះដឹងទាំងនេះ វានឹងជះឥទ្ធិពលទៅដល់អាយុជីវិត អាជីវកម្មរបស់ខ្លួនជាក់ជាពុំខាន។ លោកក៏សង្ឃឹមថា វគ្គបណ្តុះបណ្តាលជំនាញបន្ថែមនេះ នឹងផ្តល់ចំណេះដឹងថ្មីៗ ឬគន្លឹះថ្មីៗ ដើម្បីជួយសម្រួលទៅដល់ម្ចាស់អាជីវកម្មធុនតូចនិង មធ្យម គ្រូបង្គោលផ្នែកទេសចរណ៍ មន្ត្រីបង្គោលប្រចាំមូលដ្ឋាន ទេសចរណ៍ ដែលអាចយកទៅប្រើប្រាស់ក្នុងគោលដៅណាមួយ ដែលបម្រើឱ្យអង្គភាពឬអាជីវកម្មរបស់ខ្លួន ដើម្បីចូលរួមបង្កើនភាព ធន់ក្នុងវិស័យទេសចរណ៍ ក៏ដូចជាចូលរួមជម្រុញនូវកត្តាធនធាន មនុស្សឱ្យបានកាន់តែច្រើនឡើង នៅក្នុងខេត្តសៀមរាប៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
