នៅខេត្តសៀមរាប នាព្រឹកថ្ងៃទី១១ ខែសីហា ឆ្នាំ២០២៣ អគ្គលេខាធិការដ្ឋាន នៃគណៈកម្មាធិការជាតិជំរុញចលនាភូមិ១ ផលិតផល១ សហការជាមួយគណៈកម្មាធិការខេត្តជំរុញចលនាភូមិ១ ផលិតផល១ ខេត្តសៀមរាប បានរៀបចំប្រជុំពិភាក្សានិងធ្វើបទបង្ហាញពាក់ព័ន្ធនឹងវេទិកាផ្គូផ្គងរវាងអ្នកផលិតឬអ្នកលក់និងអ្នកទិញ ក្រោមគម្រោង ការទទួលបានទីផ្សារដ៏មានតម្លៃសម្រាប់សហគ្រាសធុនតូច/មធ្យមនិងអ្នកផលិតនៅប្រទេសកម្ពុជា។
កិច្ចប្រជុំនេះដំណើរការទៅក្រោមកិច្ចដឹកនាំសម្របសម្រួលពី ឯកឧត្តម ផល សុជាតិ អគ្គលេខាធិការនៃគណៈកម្មាធិការជាតិជំរុញចលនាភូមិ១ ផលិតផល១ លោក យុន លីនណេ អភិបាលរងខេត្ត និងជាអនុប្រធានគណៈកម្មាធិការជាតិជំរុញចលនាភូមិ១ ផលិតផល១ ខេត្តសៀមរាប និងវត្តមានប្រធានសភាពាណិជ្ជមណ្ឌលសៀមរាប-ឧត្តរមាជ័យ, អភិបាលរងបណ្តាខេត្តមួយចំនួន នាយករងរដ្ឋបាលសាលាខេត្ត, ថ្នាក់ដឹកនាំមន្ទីរ អង្គភាព និងមន្ត្រីពាក់ព័ន្ធក្នុងខេត្ត ព្រមទាំងសមាជិក សមាជិកាភូមិ១ ផលិតផល១ ជាច្រើនរូប។
លោក យុន លីនណេ បានឲ្យដឹងថា ខេត្តសៀមរាបមាន ៤២ផលិតផល សម្រាប់ចូលរួមផ្គូផ្គងនាពេលខាងមុខ និងនៅមានផលិតផលមួយចំនួនទៀតដែលត្រៀមចូលជាសមាជិកនៃគណៈកម្មាធិការជាតិជំរុញចលនាភូមិ១ ផលិតផល១ ផងដែរ។ លោកក៏បានណែនាំដល់ផលិតករ អាជីវករ ម្ចាស់សហករណ៍សិប្បកម្ម សហគ្រាសធុនតូច ធុនមធ្យម ដែលជាសមាជិកសមាជិកានៃគណៈកម្មាធិការជាតិជំរុញចលនាភូមិ១ ផលិតផល១ សូមបន្តពង្រឹងគុណភាព អនាម័យ និងបច្ចេកទេសវិចខ្ចប់ឱ្យត្រូវតាមស្តង់ដារនៃផលិតផលរបស់ខ្លួន ដើម្បីចូលរួមក្នុងវេទិកាផ្គូផ្គងប្រកួតប្រជែងសម្រាប់ឈានចូលទីផ្សារជាតិ និងអន្តរជាតិ ពិសេសដើម្បីឱ្យផលិតផលរបស់ខ្លួនរក្សាបានលំនឹងទីផ្សារ ចៀសវាងបាននូវការប្រើពាក្យថា សូមជួយទិញខ្ញុំផង!។
ឯកឧត្តម ផល សុជាតិ អគ្គលេខាធិការនៃគណៈកម្មាធិការជាតិជំរុញចលនាភូមិ១ ផលិតផល១ បានបញ្ជាក់ថា គណៈកម្មាធិការជាតិជំរុញចលនាភូមិ១ ផលិតផល១ បានបង្កើតអស់រយៈពេល ១៦ឆ្នាំហើយ ដោយសម្តេចតេជោហ៊ុនសែន នាយករដ្ឋមន្ត្រី បានយកចិត្តទុកដាក់ខ្លាំងណាស់លើចលនាភូមិ១ ផលិតផល១ ព្រោះវាអាចជួយធ្វើឱ្យសេដ្ឋកិច្ចមូលដា្ឋនល្អ។ ក្រោយឆ្នាំ២០១៣ និងជាបន្តបន្ទាប់បានរៀបចំកសាងឯកសារគតិយុត្តិសំខាន់ៗនិងគោលនយោបាយមួយចំនួនទៀត ក្នុងនោះបានរៀបចំឡើងវិញនូវគោលនយោបាយជាតិស្តីពីការជំរុញចលនាភូមិមួយផលិតផលមួយឆ្នាំ២០១៦-២០២៦ និងបានកសាងផែនការយុទ្ឋសាស្ត្រជាតិជំរុញចលនាភូមិមួយផលិតផលមួយលើកទី១ឆ្នាំ២០១៩-២០២៣។នៅចុងឆ្នាំ២០២១គណៈកម្មាធិការជាតិជំរុញចលនាភូមិ១ ផលិតផល១ បានចប់ដំណាក់កាលទី១ នៃចលនាភូមិ១ ផលិតផល១ និងនៅឆ្នាំ២០២១៖ មានខេត្តចំនួន១០ ចងក្រងបាន១២០ផលិតផល នៅឆ្នាំ២០២២ ទាំង ២៥រាជធានី/ខេត្ត ចងក្រងបាន៦០០ផលិតផល ដោយឡែកខេត្តសៀមរាប មាន៤២ផលិតផល។ ចំពោះយន្តការ និងគោលការណ៍ជំរុញចលនាភូមិមួយផលិតផលមួយ ឯកឧត្តមអគ្គលេខាធិការ បានបញ្ជាក់បន្ថែមយ៉ាងដូច្នេះថា៖
គួរឲ្យដឹងថា កិច្ចប្រជុំនេះធ្វើឡើងក្នុងគោលបំណងដើម្បីត្រៀមលក្ខណៈសម្បត្តិសម្រាប់ចូលរួមក្នុងវេទិកាផ្គូផ្គងរវាងអ្នកលក់និងអ្នកទិញ របស់គម្រោងអភិវឌ្ឍអាជីវកម្មប្រកបដោយសុចរិតភាព និងការទទួលបានទីផ្សារសម្រាប់អ្នកផលិតក្នុងស្រុក និង M/SMEs និងនាំចេញនៅនឹងកន្លែង ដែលគ្រោងរៀបចំឡើងពីថ្ងៃទី២៥ដល់ថ្ងៃទី២៧ខែសីហាខាងមុខនេះ នៅផ្សារម៉ាក្រូក្រុងសៀមរាបខេត្តសៀមរាប ដើម្បីដាក់តាំងបង្ហាញផលិតផលនានាស្វែងរកដៃគូអាជីវកម្ម។ សំដៅបង្កលក្ខណៈងាយស្រួលដល់ផលិតករដែលផលិតបានអាចបញ្ជូនផលិតផលរបស់ខ្លួនលក់ដល់គោលដៅដោយប្រសិទ្ឋិភាពនិងបានច្រើនជាងមុន។លើសពីនេះពួកគេនឹងមានឱកាសភ្ជាប់ទំនាក់ទំនងជាមួយតួអង្គផ្សេងៗដូចជាអាជ្ញាធរមូលដ្ឋាន អង្គការមិនមែបនរដ្ឋាភិបាល និងក្រុមយុជនដែលអាចផ្តល់ការគាំទ្រអាជីវកម្មរបស់ពួកគាត់៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
