នៅសាលប្រជុំសាលាខេត្តសៀមរាប នារសៀលថ្ងៃទី១០ ខែសីហា ឆ្នាំ២០២៣នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានដឹកនាំបើកកិច្ចប្រជុំសាមញ្ញលើកទី៥១ ឆ្នាំទី៥ ជាឆ្នាំចុងក្រោយនៃអាណត្តិទី៣ របស់ខ្លួន ដោយមានការចូលរួមពីលោក ពិន ប្រាកដ អភិបាលរងខេត្ត ព្រមទាំងវត្តមានឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត តំណាងអាជ្ញាធរអប្សារា អាជ្ញាធរក្រុង/ស្រុក ថ្នាក់ដឹកនាំមន្ទីរ-អង្គភាព លោកនាយក នាយករងរដ្ឋបាល នាយក/នាយករងទីចាត់ការ អង្គភាពនានាជុំវិញខេត្តចូលរួមផងដែរ។
ក្នុងកិច្ចប្រជុំនាឱកាសនោះ បានប្រកាសឯកឧត្តម លី ហុងគឹម ជាសមាជិកក្រុមប្រឹក្សាខេត្ត ជំនួសឯកឧត្តម ធា ស៊ីវត្ថា ដែលបានទទួលមរណៈភាព ហើយសមាជិកសមាជិកានៃកិច្ចប្រជុំសាមញ្ញលើកទី៥១ បានធ្វើការអនុម័តលើរបៀបវារៈនៃកិច្ចប្រជុំដែលបានគ្រោងទុក ព្រមទាំងលើសេចក្តីព្រាងនៃកំណត់ហេតុ កិច្ចប្រជុំសាមញ្ញលើកទី៥០ ផងដែរ។ ជាមួយគ្នានោះអង្គប្រជុំ ក៏បានលើនូវបញ្ហាពាក់ព័ន្ធមួយចំនួន ផ្តោតលើការងារសណ្តាប់ធ្នាប់សាធារណៈ សំខាន់ទីចំណតយានយន្តសាធារណៈ ដែលមានអាជីវករ និងក្រុមហ៊ុនមួយចំនួន យកធ្វើជាទីតាំងដាក់តាំងទំនិញលក់ដូរ នៅតាមមុខផ្ទះរបស់ខ្លួន ព្រមទាំងលើកឡើងអំពីបញ្ហា ការចោលសម្រាមនៅតាមទីសាធារណៈ និងទីប្រជុំជន និងបញ្ហាការចាប់ដណ្តើមម៉ូយ ពេលរថយន្តដឹកអ្នកដំណើរមកដល់ធ្វើឲ្យប៉ះពាល់ដល់ចរាចរណ៍ និងសោភណ្ឌភាពក្រុងទៀតផង។
មានប្រសាសន៍នាឱកាសនោះលោក ពិន ប្រាកដ អភិបាលរងខេត្ត បានធ្វើការវាយតម្លៃខ្ពស់ ទៅលើលទ្ធផលការងារប្រចាំខែកក្កដា ព្រមទាំង បានជម្រុញដល់ថ្នាក់ដឹកនាំមន្ទីរ អង្គភាព អាជ្ញាធរក្រុង/ស្រុក សំខាន់គ្រប់ទីចាត់ការអង្គភាពចំណុះសាលាខេត្ត ដែលជាសេនាធិការ ជូនគណៈអភិបាលខេត្ត ត្រូវបង្កើនការយកចិត្តទុកដាក់ខ្ពស់ ក្នុងកិច្ចកសាង និងអភិវឌ្ឍន៍ ដោយផ្តោតសំខាន់ទៅ លើការងារសន្តិសុខ សណ្តាប់ធ្នាប់សាធារណៈ បញ្ហាអនាម័យ បរិស្ថានតាមក្រុង/ស្រុក ក្នុងការទទួលស្វាគមន៍ភ្ញៀវទេសចរជាតិ-អន្តរជាតិ ព្រមទាំងប្រតិភូជាន់ខ្ពស់ជាតិ អន្តរជាតិផងដែរ។
មានមតិបិទអង្គប្រជុំ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានគូសបញ្ជាក់ថា តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកបដោយក្រមសីលធម៌វិជ្ជាជីវៈ ពីសំណាក់ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាព និងអ្នកពាក់ព័ន្ធទាំងអស់ បានញ៉ាំងឲ្យដំណើរការនៃកិច្ចប្រជុំសាមញ្ញលើកទី៥១ របស់ក្រុមប្រឹក្សាខេត្ត ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក។ ក្នុងនោះលើកិច្ចសហការការពារសន្តិសុខ សណ្តាប់ធ្នាប់សាធារណៈ សន្តិសុខនយោបាយ ក្នុងពេលយុទ្ធនាការហែក្បួនឃោសនាបោះឆ្នោត របស់គណបក្សនយោបាយនានា និង កិច្ចដំណើរការបោះឆ្នោត និងរាប់សន្លឹកឆ្នោតបានប្រព្រឹត្តទៅល្អប្រសើរ។
ឯកឧត្តមបានបញ្ជាក់ថា គ្រប់កាលៈទេសៈដែលប្រជាពលរដ្ឋជួបការលំបាក អាជ្ញាធរខេត្តបានយកចិត្តទុកដាក់ក្នុងការដោះស្រាយរាល់បញ្ហាដែលបានលើកឡើង ព្រោះបញ្ហាទាំងនេះ គឺជាបញ្ហារបស់ប្រជាពលរដ្ឋដែលតែងតែលើកឡើងជាអន្លើៗ និងបានដោះស្រាយប្រកបដោយប្រសិទ្ធភាព មានសាមគ្គីភាពផ្ទៃក្នុង និងមានស្មារតីទទួលខុសត្រូវក្នុងការបំពេញការងារស្របតាមគោលនយោបាយច្បាប់ និងលិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការ នៅរដ្ឋបាលថ្នាក់ក្រោមជាតិផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
