គិតចាប់ពីខែមករា ដល់ខែកក្កដា ឆ្នាំ២០២៣នេះ ភ្ញៀវទេសចរជាង ៤៣ម៉ឹននាក់ បានទិញសំបុត្រចូលទស្សនាតំបន់រមណីយដ្ឋានអង្គរ ជាមួយនោះទោះស្ថិតក្នុងរដូវវស្សា ឬ Green Season ក្ដី ក៏ក្នុងមួយថ្ងៃៗ ក៏មានភ្ញៀវទេសចរអន្តរជាតិប្រមាណជាង ២,០០០នាក់ដែរ ចូលទស្សនាប្រាសាទអង្គរវត្ត។ នេះតាមការឱ្យដឹងពីឯកឧត្ដម លី សែ អគ្គនាយកគ្រឹះស្ថានអង្គរ នៅថ្ងៃទី១៥ ខែសីហា ឆ្នាំ២០២៣។
ឯកឧត្ដម លី សែ បន្ថែមថា លំហូរភ្ញៀវទេសចរអន្តរជាតិ មកកាន់ខេត្ដសៀមរាប ភាគច្រើនមកពីតំបន់អ៊ឺរ៉ុប។ បើតាមការព្យាករណ៍ របស់ក្រសួងទេសចរណ៍ សម្រាប់ឆ្នាំ២០២៣ ភ្ញៀវទេសចរអន្តរជាតិសរុបជាង ៨០ម៉ឺននាក់ នឹងចូលទិញសំបុត្រទស្សនាប្រាសាទនានា ក្នុងតំបន់រមណីយដ្ឋានអង្គរ ដែលអាចទទួលបានចំណូលប្រមាណ ៣៧លានដុល្លារអាមេរិក។
ព័ត៌មានជាតិ ថ្មីៗ
ឯកឧត្ដម អគ្គនាយក ក៏បានលើកឡើងដែរថា ការងើបឡើងវិញនៃចំនួនភ្ញៀវទេសចរអន្តរជាតិនេះ អាចមកពីកត្តាសុខសុវត្ថិភាព និងការអភិវឌ្ឍន៍រីកចម្រើននៅក្នុងខេត្ដទេសចរមួយនេះ។ ជាពិសេស ការផ្សព្វផ្សាយពីសក្ដានុពលទេសចរណ៍នៅកម្ពុជា ព្រមទាំងការបើកដំណើរការព្រលានយន្ដអន្ដរជាតិសៀមរាបអង្គរផងដែរ។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
