សំណង់អគារថ្មីពីរខ្នង និងចំណតរថយន្ដ ដែលមានតម្លៃប្រមាណ ៤ពាន់លានរៀល របស់គ្រឹះស្ថានអង្គរ ត្រូវបានសម្រេចការសាងសង់បានជាង ៧០ភាគរយហើយ ដែលគ្រោងនឹងបញ្ចប់ការសាងសង់នៅចុងឆ្នាំ២០២៣នេះ ដែលមានទីតាំងនៅខាងជើងទីតាំងលក់សំបុត្ររបស់គ្រឹះស្ថានអង្គរចាស់ នៅតាមបណ្តោយផ្លូវសម្ដេចវិបុលបញ្ញា សុខ អាន (ផ្លូវ៦០) ក្នុងសង្កាត់ស្លក្រាម ក្រុងសៀមរាប។
បើតាម ឯកឧត្ដម លី សែ អគ្គនាយកគ្រឹះស្ថានអង្គរ បានបញ្ជាក់ថា ដោយមើលឃើញពីលំហូរភ្ញៀវទេសចរអន្ដរជាតិមកកំសាន្តក្នុងខេត្តសៀមរាបកាន់តែមានចំនួនកើនឡើង ហើយនៅខាងមុខគ្រឹះស្ថានអង្គរបច្ចុប្បន្នមានទីធ្លាតូចពិបាកដល់ការចតរថយន្ដ ទើបគ្រឹះស្ថានអង្គរ បានសហការជាមួយអាជ្ញាធរជាតិអប្សរា សម្រេចសាងសង់ចំណតរថយន្ដមួយកន្លែង និងអាគារចំនួនពីរទៀត សម្រាប់បំរើឱ្យវិស័យទេសចរណ៍ ដែលក្នុងអាគារនោះនឹងបង្ហាញនូវផ្ទាំងទស្សនីយភាពវប្បធម៌អរិយធម៌ខ្មែរដល់ភ្ញៀវទេសចរទស្សនា មុនពេលពួកគាត់ទៅទស្សនាប្រាសាទអង្គរ។
ឯកឧត្ដម បានឲ្យដឹងថា អាគារថ្មីដែលកំពុងសាងសង់នេះមានរចនាបទខ្មែរ និងចំណតរថយន្ដមានទំហំផ្ទៃដីទទឹង ៣៣ម៉ែត្រ បណ្ដោយ ១៨០ម៉ែត្រ ដែលផ្ដល់ដីដោយអាជ្ញាធរជាតិអប្សរា ហើយសមិទ្ធផលទាំងនេះបានបង្ហាញថា រាជរដ្ឋាភិបាលដែលដឹកនាំដោយសម្ដេចតេជោ នាយករដ្ឋមន្ដ្រី មានសុខសន្ដិភាព មានការអភិវឌ្ឍន៍គ្រប់ទីកន្លែង ជាពិសេសអ្នកទេសចរកំពុង តែមានការវិវឌ្ឍន៍ទៅមុខឥតឈប់ឈរ។
សូមបញ្ជាក់ថា ទីតាំងលក់សំបុត្រចូលទស្សនាអង្គរ ឬគ្រឹះស្ថានអង្គរ មានទីតាំងស្ថិតនៅភូមិបឹងដូនប៉ា សង្កាតស្លក្រាម ក្រុងសៀមរាប។ បច្ចុប្បន្ននេះ ភ្ញៀវទេសចរអន្ដរជាតិទិញសុំបុត្រចូលទស្សនាអង្គរក្នុងមួយថ្ងៃប្រមាណជាង ២ពាន់នាក់ ខណៈដែលរយៈពេល៧ខែ ក្នុងឆ្នាំ២០២៣នេះ មានអ្នកទេសចរទិញសំបុត្រចូលទស្សនាអង្គរជាង ៤០ម៉ឺននាក់ ហើយនៅដំណាច់ឆ្នាំ២០២៣នេះ ភ្ញៀវទេសចរអន្ដរជាតិទៅទស្សនាអង្គរ នឹងឡើងដល់ជាង ៨០ម៉ឺន ចំណូលថវិការដ្ឋជាង ៣៧លានដុល្លាពីការលក់សំបុត្រ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
