ថ្លែងនៅក្នុងពិធីបើកកិច្ចប្រជុំលើកទី១៩ របស់លេខាធិការដ្ឋាននៃស្ថាប័នប្រឆាំងអំពើពុករលួយអាស៊ាន (អាស៊ាន-ផេក) នៅក្រុងសៀមរាប នាព្រឹកថ្ងៃទី១៦ ខែសីហានេះ ឯកឧត្តម ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយ បានជំរុញដល់ស្ថាប័នប្រឆាំងអំពើពុករលួយអាស៊ាន ធ្វើការពិភាក្សាអំពីបែបបទសម្រាប់គណៈកម្មការប្រឆាំងអំពើពុករលួយរបស់ទីម័រឡេស្តចូលជាសមាជិកអាស៊ាន-ផេក ជាភាគីទី១១។
ឯកឧត្តម ឱម យ៉ិនទៀង មានប្រសាសន៍ថា តំបន់អាស៊ានរបស់យើង ក៏ដូចជាពិភពលោកទាំងមូល បានឆ្លងកាត់ពេលវេលាដ៏លំបាកមួយហើយកំពុងតែតស៊ូខិតខំប្រឹងប្រែងយ៉ាងមោះមុតជាមួយការស្ដារប្រទេសឡើងវិញក្រោយវិបត្តិនៃជំងឺកូវីដ-១៩ ដែលរហូតមកដល់ពេលនេះមិនមែនកម្ពុជាតែម្នាក់អាចដោះស្រាយបញ្ហានេះបាននោះទេ គឺតម្រូវឲ្យមានកិច្ចសហការ និងការជួយគ្នាទៅវិញទៅមកពីបណ្តាប្រទេសជាមិត្ត និងជាបងប្អូន។នេះក៏មិនខុសពីអ្វីដែលក្រុមគ្រួសារអាស៊ាន-ផេក យើងបានន២ងកំពុងបន្តអនុវត្តមកដល់ពេលនេះ ដោយអនុលោមតាម ASEAN-PAC MoU និងផ្អែកលើស្មារតីចែករំលែកក្នុងនាមជាបងប្អូនក្នុងគោលដៅរួមគ្នាប្រឆាំងអំពើពុករលួយនៅក្នុងប្រទេសនីមួយៗរបស់ខ្លួន និងលទ្ធភាពឈានទៅជួយ និងគាំទ្រគ្នាទៅវិញទៅមកផ្អែកទៅតាមបរិបទ និងលទ្ធភាពនៃកិច្ចសហប្រតិបត្តិការដូចមានចែងនៅក្នុង ASEAN-PAC MoU។
ឯកឧត្តម ទេសរដ្ឋមន្ត្រីបន្តថា កិច្ចប្រជុំនៅពេលនេះដែរ នឹងពិនិត្យពិភាក្សា និងធ្វើការរៀបចំកិច្ចការនៅសេសសល់ពីកិច្ចប្រជុំថ្នាក់ដឹកនាំអាស៊ាន-ផេកលើកទី១៨ កាលពីថ្ងៃទី២២-២៣ ខែវិច្ឆិកា ឆ្នាំ២០២២ និងដើម្បីត្រៀមរៀបចំនូវរបៀបវារៈ ក៏ដូចជាការអនុវត្តការងាររបស់អាស៊ាន-ផេកសម្រាប់កិច្ចប្រជុំថ្នាក់ដឹកនាំអាស៊ាន-ផេក បន្ទាប់ទៀត។ ក្នុងនោះឯកឧត្តម បានស្នើដល់កិច្ចប្រជុំលេខាធិការដ្ឋានអាស៊ាន-ផេកលើកទី១៩ ចាប់ផ្តើមពិភាក្សាគ្នា ក្នុងលក្ខណៈត្រៀមទុកជាមុនសម្រាប់កិច្ចការចំនួន២ នាពេលខាងមុខគឺ ទី១.អំពីបែបបទនៃការដាក់ សម្ពោធកូនសៀវភៅអេឡិចត្រូនិករបស់អាស៊ាន-ផេក និងទី២.អំពីបែបបទសម្រាប់គណៈកម្មការប្រឆាំង អំពើពុករលួយរបស់ទីម័រឡេស្តចូលជាសមាជិកអាស៊ាន-ផេក ជាភាគីទី១១។ ក្រៅពីនេះការចែករំលែកបទពិសោធន៍ និងកិច្ចសហប្រតិបត្តិការរវាងភាគីអាស៊ាន-ផេកទាំងអស់ ការបន្តចូលរួមយ៉ាងសកម្មជាមួយនឹងកម្មវិធី ឬព្រឹត្តិការណ៍ របស់អាស៊ាន និងការចូលរួមក្នុងព្រឹត្តិការណ៍ពាក់ព័ន្ធដទៃទៀត ព្រមទាំងកិច្ចសហការលើការងារបណ្តុះបណ្តាលសមត្ថភាពជាមួយភាគីជាដៃគូទៅតាមការឯកភាពរបស់អាស៊ាន-ផេក នៅតែជាការងារដ៏មានសារសំខាន់។
សូមបញ្ជាក់ជូនថា ស្ថាប័នប្រឆាំងអំពើ ពុករលួយអាស៊ាន (ASEAN-PAC) បានបង្កើតឡើងនៅឆ្នាំ២០០៤ ក្រោមគោលបំណងរួមគឺពង្រឹង កិច្ចសហប្រតិបត្តិការរវាងគ្នានឹងគ្នា ជួយគ្នាទៅវិញទៅមក ទាំងលើការផ្លាស់ប្ដូរបទពិសោធន៍ ការកសាង សមត្ថភាព និងការស៊ើបអង្កេតសំណុំរឿង។ កិច្ចប្រជុំនេះត្រូវបានចាត់ទុកថាជាវេទិកាសំខាន់មួយ ដែល តំណាងស្ថាប័នទាំង១០ មកអង្គុយរួមគ្នា ជជែកពិភាក្សា ផ្លាស់ប្តូរមតិយោបល់ ត្រួតពិនិត្យសកម្មភាព ដែលបានអនុវត្តរួមគ្នា ១ឆ្នាំ កន្លងមក និងត្រៀមរាយការណ៍ជូនកិច្ចប្រជុំថ្នាក់ដឹកនាំស្ថាប័នប្រឆាំងអំពើ ពុករលួយអាស៊ានដែលនឹងធ្វើឡើងនៅសាធារណៈរដ្ឋប្រជាធិបតេយ្យប្រជាមានិតឡាវ នាចុងឆ្នាំនៅពេល ឡាវធ្វើជាប្រធានប្តូរវេនបន្ដពីកម្ពុជា។ លទ្ធផលសំខាន់ៗទទួលបានក្នុងកិច្ចប្រជុំទាំង២លើកនៅកម្ពុជា ក៏ដូចជាកិច្ចការងារក្នុងមួយឆ្នាំពេញដែលកម្ពុជាធ្វើជាប្រធានប្តូរវេន នឹងត្រូវរាយការណ៍ជូនដល់លេខាធិការដ្ឋាន អាស៊ានសម្រាប់ប្រើប្រាស់ជាព័ត៌មាន និងការរាយការណ៏បន្តនៅក្នុងកិច្ចប្រជុំកំពូលប្រចាំឆ្នាំរបស់ថ្នាក់ដឹកនាំ អាស៊ាន៕
អត្ថបទ និងរូបភាព៖ លោក ជា ស្រស់ ,បូ សាវី
កែសម្រួល៖ លោក អ៊ុន ណារាជ្យ
