នៅថ្ងៃទី១៥ ខែសីហា ឆ្នាំ២០២៣ គណៈកម្មការលទ្ធកម្មឃុំស្រណាល នៃរដ្ឋបាលស្រុកក្រឡាញ់ ខេត្តសៀមរាប បានសម្រេចការដេញថ្លៃជាស្ថាពរ នូវគម្រោងសាងសង់ផ្លូវបេតុងអាមេ ចំនួន១ខ្សែ ប្រវែង៨០ម៉ែត្រ និងគម្រោងជួសជុលផ្លូវដីស ក្រាលគ្រួសក្រហម ចំនួន ១ខ្សែ ប្រវែង៥៥៥ម៉ែត្រ។
លោក ឡុក វួន ប្រធានគណៈកម្មការលទ្ធកម្មឃុំស្រណាល បានឲ្យដឹងថា ការគ្រប់គ្រង និងប្រើប្រាស់មូនិធិឃុំ ដែលវិភាជន៍ដោយរាជរដ្ឋាភិបាល សម្រាប់ធ្វើការអភិវឌ្ឍក្នុងមូលដ្ឋាន និងចំណាយថវិការលើសពី ពីរលានរៀល គឺរដ្ឋបាលឃុំ ត្រូវធ្វើលទ្ធកម្ម គ្រប់គម្រោងទាំងអស់ ដែលបង្ហាញពី គណនេយ្យភាព និងតម្លាភាព សម្រាប់ការសាងសង់ផ្លូវ ធ្វើឲ្យត្រូវតាមស្តង់ដារលក្ខណៈបច្ចេកទេស ក្នុងការប្រតិបត្តិថវិការរបស់រដ្ឋបាលឃុំ។
លោក ឡុក វួន បង្ហាញថា សម្រាប់ឃុំស្រណាល មាន២គម្រោង ត្រូវបានដាក់ឱ្យដេញថ្លៃ ដែលមានក្រុមហ៊ុនចំនួន ៤ចូលរួមដេញថ្លៃ។ ក្នុងនោះ ក្រុមហ៊ុន ណំ សោភ័ណ្ឌ ទទួលបានទាំងពីរគម្រោង ដោយគម្រោងសាងសង់ផ្លូវបេតុងអាមេ ១ខ្សែ ប្រវែង៨០ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ ក្នុងតម្លៃប៉ាន់ស្មាន ៤៧,៨៧៣,៥៤៨រៀល ដេញថ្លៃបានក្នុងតម្លៃ៤៦,៩០០,០០០រៀល និង ជួសជុលផ្លូវដីស ក្រាលគ្រួសក្រហម ប្រវែង ៥៥៥ម៉ែត្រ ទទឹង៤.៥ម៉ែត្រ ក្នុងតម្លៃប៉ានស្មាន ៦៥,៨៦០,៧៧១រៀល ដេញថ្លៃបានក្នុងតម្លៃ៤៤,៨០០,០០០រៀល។
សូមជម្រាបថា សម្រាប់ការដេញថ្លៃ ក្នុងគម្រោងមូលនិធិឃុំ ឃុំស្រណាល ស្រុកក្រឡាញ់ មានការចូលរួមពី អភិបាលរង នៃគណៈអភិបាលស្រុកក្រឡាញ់ មន្ត្រីបច្ចេកទេសសាលាខេត្ត មន្ត្រីបច្ចេកទេសស្រុក គណៈកម្មការលទ្ធកម្មឃុំ រួមនឹងតំណាងក្រុមហ៊ុនដេញថ្លៃ។ ដោយឡែក ការដេញថ្លៃ ក្នុងគម្រោងមូលនិធិឃុំ ឃុំលាងដៃ ស្រុកក្រឡាញ់ ពុំទទួលបានជោគជ័យឡើយ ដោយសារក្រុមហ៊ុនចូលរួមដេញថ្លៃ មានត្រឹមតែ ២ក្រុមហ៊ុនប៉ុណ្ណោះ។
អត្ថបទ និងរូបភាព៖ លោក ធន់ ពូថេ
កែសម្រួល៖ លោក សេង ផល្លី
