មគ្គុទេសក៍ទេសចរណ៍មួយរូប នៅក្នុងខេត្ដសៀមរាប បានប្រមូលរ៉ឺម៉កជើង ឬខ្លះហៅថា រ៉ឺម៉កកង់ យកទៅអភិរក្សឱ្យកូនខ្មែរជំនាន់ក្រោយបានស្គាល់ និងសម្រាប់បំរើភ្ញៀវទេសចរទៅទស្សនាអង្គរ បន្ទាប់រ៉ឺម៉កជើងនេះបានបាត់បង់អស់រយៈពេលច្រើនឆ្នាំ ខណៈដែលមធ្យោបាយដឹកជញ្ជូនបានរីកចំរើនខ្លាំងនៅក្នុងយុគ្គសម័យសន្ដិភាព។
លោក បូរ សុភា មគ្គុទេសក៍ភាសាបារាំង រស់នៅក្រុងសៀមរាប បានឱ្យដឹងថា រយៈពេល៥ឆ្នាំមកហើយ លោកបានដើររកទិញរ៉ឺម៉កជើងទៅរក្សាទុក្ខជិះកំសាន្ដជាលក្ខណៈគ្រួសារ។ ប៉ុន្ដែដោយសារមើលឃើញពីតម្រូវការវិស័យទេសចរច្រើន លោកបានរៀបចំថែរក្សាទុកសម្រាប់បំរើឱ្យវិស័យទេសចរណ៍វិញ ខណៈដែលលោកជាមគ្គុទេសក៍នាំភ្ញៀវជិះកង់ ទៅទស្សនារមណីយដ្ឋានអង្គរ និងតំបន់ផ្សេងៗទៀត។ លោកថា រ៉ឺម៉កជើងនេះ ជាមធ្យោបាយដឹកជញ្ជូមកនាសម័យកាលមុន ហើយបានបាត់បង់ជាច្រើនឆ្នាំមកហើយ ទើបលោកមានគំនិតយកមកអភិរក្សនិងថែរក្សាទុកឱ្យកូនខ្មែរជំនាន់ក្រោយបានស្គាល់ ជាពិសេសធ្វើជាមធ្យោបាយដឹកជញ្ជូនភ្ញៀវទេសចរ ព្រោះជួយដល់ការបំពុលបិស្ថាន មានសភាពស្ងប់ស្ងាត់ ជួយឱ្យអាម្មណ៍អ្នកជិះកំសាន្ដមានទឹកចិត្ដរីករាយ សមស្របជាមួយនឹងទេសភាពវប្បធម៌បុរាណ។
លោក បូរ សុភា បានបញ្ជាក់ថា ការរក្សាទុកមធ្យោបាយដឹកជញ្ជូនបែបនេះ ក៍បានជួយប្រជាពលរដ្ឋខ្លះមានការងារធ្វើនៅពេលពួកគាត់មានរ៉ឺម៉កជើង ទៅចូលរួមអភិរក្សជាមួយគ្នា។ ជាមួយគ្នានេះ លោកក៏សូមអំពាវដល់ប្រជាពលរដ្ឋដែលមានរ៉ឺម៉កង់ ឬរ៉ឺម៉កជើងនេះ រក្សាឱ្យបានគង់វង់ ហើយមានទំនាក់ទំនងជាមួយលោកដើម្បីចូលរួមដឹកជញ្ជូនភ្ញៀវទេសចរ ខណៈដែលបច្ចុប្បន្នការដឹកជញ្ជូនភ្ញៀវទៅកំសាន្ដនៅអង្គរដោយមធ្យោបាយបែបនេះ កំពុងមានការទាក់ទាញអ្នកទេសច្រើន។
មគ្គុទេសក៍ភាសាបារាំងរូបនេះ បានបញ្ជាក់ទៀតថា រ៉ឺម៉កកង់នេះ ត្រូវបានបំពាក់ដោយម៉ូទ័រជួយកម្លាំងមនុស្សបានរហូតដល់ ៨០ភាគរយ ហើយអាចជិះបានចំង៉ាយពី ៧០រហូតដល់១០០គីឡូម៉ែត្រ។ លោកក៍រំពឹងផងដែរថានៅចុងឆ្នាំ២០២៣នេះ អាចនឹងមានភ្ញៀវទេសចរត្រូវការជិះលំហែរតាមរម្មណីយដ្ឋានអង្គរច្រើន បន្ទាប់ពីព្រលានយន្ដហោះអន្ដរជាតិសៀមរាបអង្គរថ្មី បើកដំណើរការដឹកញ្ជូនភ្ញៀវមកកាន់ខេត្ដសៀមរាប៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
