សម្ព័ន្ធសមាគមសហគ្រាសធុនតូច និងមធ្យមកម្ពុជា នាព្រឹកថ្ងៃទី១១ ខែ សីហា ឆ្នាំ២០២៣នេះ បានរៀបចំកម្មវិធីស្ដីពីការអភិវឌ្ឍន៍អាជីវកម្មក្រោយបរិបទកូវីដ-១៩ ជូនដល់ម្ចាស់សហគ្រាសធនតូច និងមធ្យម អ្នកចែកចាយនិងបោះដុំ ព្រមទាំងដៃគូពាក់ព័ន្ធក្នុងខេត្តសៀមរាប ដើម្បីផ្ដល់ចំណេះដឹង និងអត្ថប្រយោជន៍ដល់សហគ្រាសធុនតូច និងមធ្យម និងស្វែងយល់ពីរបៀបលក់ផលិតផលទៅកាន់ទីផ្សារក្នុងស្រុកអំពីដំណើរការនាំចេញទៀតផង។
លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា សម្រាប់ម្ចាស់សហគ្រាសធុនតូច និងមធ្យមក្នុងខេត្តសៀមរាប មានបញ្ហាជាច្រើនក្រោយបរិបទកូវីដ-១៩ ដោយសារខេត្តមួយនេះ ទីផ្សាសំខាន់លើវិស័យទេសចរ។ ហើយសិក្ខាសាលានៅថ្ងៃនេះវាពិតជាមានសារសំខាន់ណាស់ ដើម្បីជួយដោះស្រាយបញ្ហាប្រឈមរបស់ពួកគាត់ដែលកើតឡើងក្នុងសហគ្រាសផ្ទាល់ ទាក់ទងនឹងខ្សែសង្វាក់ទីផ្សារក្នុងស្រុក ការនាំចេញ ការទទួលបានច្បាប់ថ្មីៗ និងបទប្បញ្ញតិនានា។ ហើយក្រោយពីបានទទួលការបណ្តុះបណ្តាលក្នុងកម្មវិធីពេញមួយថ្ងៃនេះ ម្ចាស់សហគ្រាសធុនតូច និងមធ្យមទាំងអស់ នឹងទទួលបានចំណេះដឹងថ្មីបន្ថែមទៀត ដើម្បីយកទៅអនុវត្ត និងពង្រឹងសម្ថភាព និងអភិវឌ្ឍការងារធុរៈកិច្ចរបស់ខ្លួនឱ្យកាន់តែរីកចម្រើនបន្ថែមទៀត។
លោកអភិបាលរងខេត្ត រំពឹងថាក្រោយអាកាសយានដ្ឋានអន្តរជាតិសៀមរាប-អង្គរ ដាក់អោយដំណើរការ និងជំរុញទេសចរណ៍មកកាន់ខេត្តសៀមរាបបានកាន់តែច្រើន ដែលទាមទារម្ចាស់សហគ្រាសធុនតូច និងមធ្យម ត្រៀមខ្លួនផលិតផលរបស់ខ្លួនឪ្យត្រូវតាមស្តងដា ក្នុងការនាំចូលទៅកាន់ ទីផ្សាក្នុង និងក្រៅស្រុក។
ព័ត៌មានជាតិ ថ្មីៗ
បើតាមលោកឧកញ៉ា តែ តាំងប៉ ប្រធានក្រុមប្រឹក្សាភិបាលនៃសម្ព័ន្ធសមាគមសហគ្រាសធុនតូច និងមធ្យមកម្ពុជា បានបញ្ជាក់ថា គោលបំណងសិក្ខាសាលាថ្ងៃនេះ គឺជាឱកាសដ៏ល្អមួយសម្រាប់ម្ចាស់សហគ្រាសបានជួបផ្ទាល់ជាមួយធនាគារ និងក្រុមហ៊ុនផ្តល់សេកម្មផ្សេងៗ ដើម្បីបង្ហាញអំពីសេចក្តីត្រូវការរបស់ខ្លួនទៅកាន់ធនាគារ និងក្រុមហ៊ុនផ្តល់សេវាកម្មទាំងនោះ ឲ្យជួយដោះស្រាយបញ្ហារបស់ពួកគាត់ ក៏ដូចជាឲ្យសម្ព័ន្ធសមាគមសហគ្រាសធុនតូច និងមធ្យមកម្ពុជាបានដឹងអំពីបញ្ហាដែលកើតមានឡើងក្នុងសហគ្រាសនីមួយៗ យកមកប្រមូលផ្ដុំជាឯកសារ ស្វែងរកវិធីដោះស្រាយជូនម្ចាស់សហគ្រាសឱ្យទទួលបានជោគជ័យក្នុងអាជីវកម្មរបស់ខ្លួន។ លោកក៏បានអំពាវនាវប្រជាពលដ្ឋ ត្រូវរួមគ្នាកាត់បន្ថយការនាំចូលផលិតផលពីប្រទេសជិតខាង ដោយនាំគ្នាងាកមកគាំទ្រផលិតផលក្នុងស្រុកវិញ ដើម្បីជួយដល់សហគ្រាសក្នុងស្រុក មានលទ្ធភាពក្នុងការផលិត មានប្រាក់ចំណេញ ជាពិសេសបង្កើតការងារជូនប្រជាពលរដ្ឋ ស្របតាមគោលនយោបាយរបស់ រាជរដ្ឋាភិបាលក្នុងការកាត់បន្ថយភាពក្រីក្រជូនប្រជាពលរដ្ឋ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
