នៅថ្ងៃទី២០ ខែសីហា ឆ្នាំ២០២៣នេះ ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បាននាំយកនូវសម្ភារៈសុខាភិបាលមួយចំនួន ប្រគល់ជូនដល់មន្ទីរពេទ្យបង្អែកខេត្តសៀមរាប ដើម្បីចូលរួមលើកកម្ពស់វិស័យសេវាសុខភាពសាធារណៈ និងសុខុមាលភាពរបស់ប្រជាពលរដ្ឋក្នុងខេត្តសៀមរាប ដោយសម្ភារៈទាំងនោះរួមមាន៖ ស្រោមដៃពេទ្យ ២៥កេស ស្មើនឹង ២៥០,០០០ស្រោមដៃ និង ឧបករណ៍តេស្តរកកូវីដ-១៩ ៤០ប្រអប់។
បើតាម ឯកឧត្តមវេជ្ជបណ្ឌិត ឌឿន វុទ្ធា អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានមានប្រសាសន៍ថា វិស័យសុខាភិបាល គឺជាវិស័យអាទិភាពមួយ ដែលបានរួមចំណែកយ៉ាងសំខាន់ដល់ការ អភិវឌ្ឍសេដ្ឋកិច្ច-សង្គមកិច្ច និងការកាត់បន្ថយភាពក្រីក្រនៅប្រទេសកម្ពុជាតាមរយៈការលើកកម្ពស់ស្ថានភាពសុខភាពរបស់ប្រជាពលរដ្ឋកម្ពុជា ឲ្យកាន់តែល្អប្រសើរឡើង ដែលផ្តល់ឱកាសដល់ប្រជាពលរដ្ឋចូលរួមយ៉ាងសកម្ម ក្នុងសកម្មភាពសង្គម-សេដ្ឋកិច្ចដើម្បីលើកស្ទួយជីវភាព រស់នៅឲ្យកាន់តែល្អប្រសើរ។
ឯកឧត្តមបន្តថា ជាមួយនឹងវឌ្ឍនភាពដែលក្រសួងសុខាភិបាលសម្រេចបាននាអំឡុងពេល និងក្រោយពេលវិបត្តិជំងឺកូវីដ-១៩ បានបង្ហាញនូវការគិតគូរ និងយកចិត្តទុកដាក់ខ្ពស់ពីសំណាក់រាជរដ្ឋាភិបាលដែលមានសម្ដេចតេជោ ហ៊ុន សែន ជានាយករដ្ឋមន្ត្រី។ ទន្ទឹមនោះ ក៏មិនអាចបំភ្លេចបានឡើយនូវការខិតខំថែរក្សា និងការពារនូវសុខសន្តិភាព ស្ថិរភាពនយោបាយ និងសន្តិសុខសង្គម ដែលបង្កើនការវិនិយោគ ព្រមទាំងរក្សានិរន្តរភាពនៃការផ្តល់សេវា និងការកែលម្អគុណភាពសុខាភិបាលសាធារណៈ។
តំណាងឲ្យមន្ទីរពេទ្យបង្អែកខេត្តសៀមរាប លោក ហួត សូនី អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្ត បានថ្លែងអំណរដល់ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលបានលះបង់កម្លាំងកាយ និងស្មារតី ក្នុងការគៀងគរនូវអំណោយរបស់សប្បុរសជនគ្រប់មជ្ឃដ្ឋាន ក្នុងនិងក្រៅប្រទេស ដើម្បីចូលរួមលើកកម្ពស់វិស័យសេវាសុខភាពសាធារណៈ និងសុខុមាលភាពរបស់ប្រជាពលរដ្ឋក្នុងខេត្តសៀមរាប។ សកម្មភាពនេះដែរ គឺមានសារសំខាន់បំផុត ក្នុងការបង្ហាញ និងបញ្ជាក់ឲ្យឃើញកាន់តែច្បាស់អំពីកិច្ចខិតខំប្រឹងប្រែងចូលរួមជាមួយរាជរដ្ឋាភិបាល ក្នុងការយកចិត្តទុកដាក់លើកកម្ពស់ និងគិតគូរអំពីសុខមាលភាពរបស់ប្រជាពលរដ្ឋខេត្តសៀមរាប និងជាការចូលរួមចំណែកកាត់បន្ថយភាពក្រីក្រ និងលើកកម្ពស់កម្រិតជីវភាពរស់នៅរបស់ប្រជាពលរដ្ឋឲ្យបានកាន់តែល្អប្រសើរឡើងផងដែរ៕
អត្ថបទ និងរូបភាព៖ លោក ហាំ ម៉េងហួត
កែសម្រួល៖ លោក អ៊ុន ណារាជ្យ
