រសៀលថ្ងៃទី២២ ខែសីហា ឆ្នាំ២០២៣ រដ្ឋបាលខេត្តសៀមរាប បានបើកកិច្ចប្រជុំពិភាក្សាស្ដីពីការរៀបចំផែនការយុទ្ធសាស្ត្រ ២០២៤-២០២៦ និងការរៀបចំសេចក្តីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងថវិកាឆ្នាំ២០២៤ ក្រោមអធិបតីភាព លោក លី សំរិទ្ធ អភិបាលរងខេត្ត ដោយមានការចូលរួមពីលោកលោកស្រី អភិបាលរងខេត្ត នាយក/នាយករងរដ្ឋបាលសាលាខេត្ត ថ្នាក់ដឹកនាំមន្ទីរ/អង្គភាពពាក់ព័ន្ធ នាយកទីចាត់ការ/អង្គភាពចំណុះសាលាខេត្ត និងមន្រ្តីពាក់ព័ន្ធជាច្រើនរូប។
ថ្លែងក្នុងឱកាសនោះ លោក លី សំរិទ្ធ បានលើកឡើងថា គោលនយោបាយម៉ាក្រូសេដ្ឋកិច្ចកម្ពុជាក្នុងឆ្នាំ២០២៤ ត្រូវបានរាជរដ្ឋាភិបាលព្យាករណ៍ថា នឹងសម្រេចបាននូវអត្រាកំណើនក្នុងរង្វង់៦,៦% ដែលកំណើននេះហាក់មានភាពល្អប្រសើរជាងឆ្នាំ២០២៣ ដែលមានកំណើនក្នុងអត្រា៥,៦%។ ហើយចំពោះកំណើនសេដ្ឋកិច្ចនៅឆ្នាំ២០២៤ អាចសម្រេចបានគឺពឹងទៅលើការត្រឡប់មករកភាពល្អប្រសើរឡើងវិញនៃតម្រូវការខាងក្រៅ និងទំនុកចិត្តរបស់អ្នកវិនិយោគ ស្របពេលដែលសកម្មភាពសេដ្ឋកិច្ចក្នុងស្រុកនៅបន្តរក្សាបាននូវតុល្យភាព។
លោក លី សំរិទ្ធ បានបញ្ជាក់ថា យោងតាមសារាចររបស់រាជរដ្ឋាភិបាល ការព្យាករណ៍កំណើនសេដ្ឋកិច្ចកម្ពុជាខាងលើ គឺត្រូវបានគិតគូរក្នុងកម្រិតបន្ទាត់មូលដ្ឋាន ស្របពេលដែលទស្សនវិស័យសេដ្ឋកិច្ចសកល និងតំបន់កាន់តែមានភាពមិនប្រាកដប្រជាខ្ពស់នោះ។ ផ្អែកលើសមិទ្ធកម្ម ក្នុងកម្រិតបន្ទាត់មូលដ្ឋាននេះ កំណើនសេដ្ឋកិច្ចកម្ពុជាក្នុងឆ្នាំ២០២៤ ត្រូវបានគាំទ្រដោយវិស័យសំខាន់មួយចំនួន រួមមាន៖ ទី១.វិស័យកសិកម្ម ត្រូវបានព្យាករណ៍ថា នឹងសម្រេចបានកំណើនក្នុងរង្វង់ ១,១% ដែលគាំទ្រដោយកំណើននៃអនុវិស័យដំណាំ និងអនុវិស័យចិញ្ចឹមសត្វស្របពេលដែលអនុវិស័យនេសាទរំពឹងថានឹងបន្តងើបឡើងវិញសន្សឹមៗ។ ទី២.វិស័យឧស្សាហកម្ម ត្រូវបានព្យាករណ៍ថា នឹងសម្រេចបានកំណើនក្នុងអត្រា ៨,៥% ដែលទ្រទ្រង់ដោយកំណើនល្អប្រសើរនៃអនុវិស័យកាត់ដេរ ខណៈអនុ- វិស័យសំណង់បន្តសម្រេចបានកំណើនទាបជាងនិន្នាការមុនវិបត្តិកូវីដ-១៩ ។ ទី៣.វិស័យសេវាកម្ម ត្រូវបាន ព្យាករណ៍ថា នឹងបន្តនិន្នាការកើនឡើងក្នុងអត្រា៦,៩% ដោយការបន្តកើនឡើងនូវសកម្មភាពក្នុងអនុវិស័យ សណ្ឋាគារ និងភោជនីយដ្ឋាន និងសេវាកម្មគាំទ្រផ្សេងទៀត រួមមានអនុវិស័យលក់ដុំ-រាយ និងអនុវិស័យដឹកជញ្ជូន និងគមនាគមន៍ ខណៈដែលអនុវិស័យអចលនទ្រព្យត្រូវបានរំពឹងថា នៅបន្តសម្រេចបានកំណើនទាបជាងនិន្នាការធម្មតា។
លោកអភិបាលរងខេត្ត បានបញ្ជាក់ទៀតថា ដើម្បីធានាសម្រេចឱ្យបាននូវគោលដៅអភិវឌ្ឍន៍សំខាន់ៗ ដែលមានចែងក្នុងរបៀបវារៈគោលនយោបាយ នៅក្នុងឆ្នាំដំបូងនៃរដ្ឋាភិបាលនីតិកាលទី៧ ក្នុងឆ្នាំ២០២៤ រាជរដ្ឋាភិបាលត្រូវបង្កើនការវិនិយោគ និងបង្កើតតម្លៃបន្ថែមលើមូលដ្ឋានកំណើនសេដ្ឋកិច្ចដែលមានស្រាប់ ជាមួយនឹងការជំរុញឱ្យមានការវិនិយោគទៅលើប្រភពថ្មីនៃកំណើនដែលមានសក្តានុពលសេដ្ឋកិច្ច ដែលមានផលិតភាពខ្ពស់ ព្រមទាំងបន្តពង្រឹងសមត្ថភាពស្ថាប័ន និងលើកកម្ពស់សមត្ថភាពមន្រ្តី របបសោធន៍ជូននិវត្តជន និងជំនួយសង្គមផ្សេងៗក៏ដូចជាការបន្ដដំឡើងបៀវត្សអប្បបរមាជូនមន្ត្រីរាជការ។ ដើម្បីលើកកម្ពស់សុខុមាលភាពសង្គម កសាងភាពធន់នៃសង្គមកម្ពុជា និងធានាសម្រេចឱ្យបានគោលដៅអភិវឌ្ឍន៍សំខាន់ដ៍ទៃផ្សេងៗទៀតដែលមានចែងនៅក្នុងគោលនយោបាយអភិវឌ្ឍន៍ជាតិ យុទ្ធសាស្ត្រចតុកោណដំណាក់កាលទី៤ ដែលត្រូវបានបញ្ចប់ក្នុងចុងនីតិកាលទី៧ នៃរដ្ឋសភា យុទ្ធសាស្តពហុកោណសម្រាប់នីតិកាលទី៨ នឹងដាក់ចេញឱ្យអនុវត្តក្នុងពេលឆាប់ៗនេះ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
