រដ្ឋបាលស្រុកអង្គរជុំ ខេត្តសៀមរាប នៅថ្ងៃទី៣១ ខែសីហា ឆ្នាំ២០២៣នេះ បានរៀបចំបើកវេទិការផ្សព្វផ្សាយ និងពិគ្រោះយោបល់ របស់ក្រុមប្រឹក្សាស្រុកអង្គរជុំ អាណត្តិទី៣ ឆ្នាំ២០២៣ ក្រោមអធិបតីភាពឯកឧត្តម ទេស ច័ន្ទគីរី និងឯកឧត្តម ខូយ ឈីន សមាជិកក្រុមប្រឹក្សាខេត្ត ដោយមានការចូលរួមពីលោកប្រធានក្រុមប្រឹក្សាស្រុក អភិបាលស្រុក សមាគមក្រុមប្រឹក្សាថ្នាក់មូលដ្ឋានខេត្ត ព្រមទាំងអស់លោក លោកស្រីក្រុមការងារថ្នាក់ខេត្ត ចុះជួយមូលដ្ឋានស្រុកអង្គរជុំ ព្រមទាំងអាជ្ញាធរមូលដ្ឋាន ប្រជាពលរដ្ឋសរុប ៣៥៣នាក់។
លោក ភន់ សុខុម អភិបាលស្រុកអង្គរជុំ មានប្រសាសន៍ថា វេទិកាផ្សព្វផ្សាយ និងពិគ្រោះយោបល់នាពេលនេះ ធ្វើឡើងដើម្បីផ្ដល់ឱកាសជូនបងប្អូនប្រជាពលរដ្ឋ និងអ្នកពាក់ព័ន្ធទាំងអស់ បានស្វែងយល់ពីស្ថានភាពទូទៅនៃការអភិវឌ្ឍស្រុកឃុំ ព្រមទាំងបញ្ហាប្រឈមនានាដែលកើតមានរយៈកាលកន្លងមក។ ម្យ៉ាងទៀតវេទិកានេះ ក៏ផ្ដល់ឱកាសផងដែរជូនបងប្អូនប្រជាពលរដ្ឋអ្នកពាក់ព័ន្ធទាំងអស់ បានបញ្ចេញមតិយោបល់របស់ខ្លួនពាក់ព័ន្ធនឹងក្តីកង្វល់ បញ្ហាប្រឈម និងសំណូមពរ តាមតម្រូវការជាក់ស្ដែងនានានៅមូលដ្ឋាន។
លោកបន្តថា វេទិកាផ្សព្វផ្សាយ និងពិគ្រោះយោបល់គឺជាឧបករណ៍ និងជាឱកាសដ៏មានសារៈសំខាន់សម្រាប់លើកកម្ពស់គណនេយ្យភាព តម្លាភាព ការឆ្លើយតប និងការចូលរួមរបស់បងប្អូនប្រជាពលរដ្ឋទាំងបុរស និងស្ត្រីគ្រប់សមាសភាព ពិសេសយុវវ័យ និងជនងាយរងគ្រោះ ក្នុងកិច្ចដំណើរការអភិបាលកិច្ចរបស់ក្រុមប្រឹក្សានៃរដ្ឋបាលថ្នាក់ក្រោមជាតិរបស់ខ្លួន។ វេទិកានេះដែរ ក៏ជាការផ្តល់នូវពត៌មានជូនប្រជាពលរដ្ឋអំពីសមិទ្ធផលដែលក្រុមប្រឹក្សាសម្រេចបានកន្លងមក និងបញ្ហាប្រឈមនានាដែលមានឡើង និងទទួលយកអនុសាសន៍ និងសំណូមពររបស់ប្រជាពលរដ្ឋ ដើម្បីពិនិត្យ ពិភាក្សា និងដោះស្រាយជូន និងការជម្រុញឲ្យមានការចូលរួម និងបង្កើនឲ្យមានភាពស្និទស្នាលរវាងអ្នកផ្តល់សេវាសាធារ ណៈ និងអ្នកមកទទួលសេវាសាធារណៈឱ្យកាន់តែមានភាពល្អប្រសើរឡើង ។
សូមជម្រាបថា ក្នុងអង្គវេទិកាផ្សព្វផ្សាយ ពិគ្រោះយោបល់នេះដែរ ប្រជាពលរដ្ឋទាំង ៧ឃុំ បានលើនូវសំណួរសំណូមពរចំនួន២៥ ជាមួយគ្នានោះតំណាងស្ថាប័ន អង្គភាពពាក់ព័ន្ធ ក៏បានធ្វើការបកស្រាយបំភ្លឺ និងដោះស្រាយបានចំនួន ២២សំណួរ/សំណូមពរ ហើយរាល់សំណួរ សំណូមពរដែលមិនទានបានស្រាយបំភ្លឺ និងផ្តល់លទ្ធផលតាមរយៈអាជ្ញាធរមូលដ្ឋានរបស់បងប្អូននៅពេលក្រោយផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
