នាយកសាលាបឋមសិក្សាវត្តបូព៌ ក្រុងសៀមរាប លោក អន គុណរ័ត្ន បានឲ្យដឹងថា ចាប់ពីថ្ងៃទី៦ ខែកញ្ញា ឆ្នាំ២០២៣នេះតទៅ គណៈគ្រប់គ្រងសាលាបឋមសិក្សាវត្តបូព៌ នឹងចាប់ផ្តើមអនុវត្តន៍មិនឱ្យមានលក់នំកញ្ចប់គ្រប់ប្រភេទ នៅក្នុងបរិវេណសាលារៀនទៀតឡើយ ដោយសាលាបានអនុវត្តន៍នូវចក្ខុវិស័យ ៣សំខាន់គឺ៖ ទី១.គុណភាព ទី២.សុខភាព និងបរិស្ថាន និងទី៣.ឥរិយាបថ ខណៈដែលចក្ខុវិស័យទាំង៣ គុណភាព និងឥរិយាបថ សាលាធ្វើបានល្អហើយ។
លោក អន គុណរ័ត្ន បានឲ្យដឹងទៀតថា ចំពោះចក្ខុវិស័យចំនួន២ ដែលសាលាបានអនុវត្តល្អហើយក៏ពិតមាន ក៏ប៉ុន្តែបញ្ហាសុខភាពសាលាធ្វើមិនទាន់បានល្អគ្រប់គ្រាន់នៅឡើយ ដោយសង្គេតឃើញថា ក្មេងៗតែងតែមានបញ្ហាសុខភាពកើត ឡើងដោយសារតែចំណីអាហារ ដោយពួកគាត់ញ៉ាំមិនបានគិតពីសុខភាពរបស់គាត់ឡើយ។ ដូចនេះហើយបានជាគណៈគ្រប់គ្រងសាលា ចាប់ផ្តើមអនុវត្តន៍វិធានការគ្រប់គ្រងការលក់ដូរចំណីអាហារនៅក្នុងបរិវេណសាលា ដោយជំហានទី១ គឺការឈប់ឱ្យលក់មីនៅក្នុងបរិវេណសាលារៀនវត្តបូព៌នេះកាលពីឆ្នាំមុន និងសម្រាប់ឆ្នាំនេះ គឺបានចាប់អនុវត្តន៍ឈប់ឱ្យលក់អាហារដូចជា នំកញ្ចប់ ចាប់ពីថ្ងៃទី០១ ខែកញ្ញា ឆ្នាំ២០២៣នេះតទៅ ដោយឱ្យលក់តែប្រភេទអាហារក្នុងស្រុកដូចជានំប្រពៃណីខ្មែរជាដើម។
លោកនាយកសាលាបន្ថែមថា ពេលចាប់ផ្តើមអនុវត្តន៍សាលាបានជួបបញ្ហាប្រឈមពីរគឺ៖ ទី១.អាជីវករដោយសារតែគាត់មិនចង់លក់នំប្រពៃណីខ្មែរនេះទេ ព្រោះពេលលក់សល់វា និងខូចខាត, ទី២.ក្មេងៗមិនសូវចូលចិត្តញ៉ាំនំប្រពៃណីខ្មែរនោះទេ។ ប៉ុន្តែបន្ទាប់ពីចាប់ផ្តើមអនុវត្តន៍អស់រយៈ០៦ ថ្ងៃមកនេះឃើញថា ចាប់ផ្តើមចូលចិត្តញ៉ាំនំប្រពៃណីខ្មែរ ឯអាជីវករក៏លក់ដាច់គួរសមដែរ។ លោកថា ការចាប់ផ្តើមឱ្យលក់តែនំប្រពៃណីខ្មែរនេះ គឺគណៈគ្រប់គ្រងសាលាបឋម សិក្សាវត្តបូព៌ ក៏បានធ្វើការពិនិត្យជាប្រចាំផងដែរ ដោយតម្រូវឱ្យអាជីវករដែលយកនំមកលក់ នៅទីនេះ ត្រូវតែជានំដែលមានអនាម័យ និងមានសុវត្ថិភាពសម្រាប់ក្មេងៗ។
លោកបានបញ្ជាក់ថា នៅពេលសាលាអនុវត្តន៍បែបនេះ គណៈគ្រប់គ្រងសាលា ក៏បានសុំយោបល់ពី ឳពុកអ្នកម្តាយសិស្សឃើញថា មានការគាំទ្រលើកពីការគ្រោងទុក។ ជាមួយគ្នានោះដែរ លោកក៏ស្នើសុំលោកឳពុកអ្នកម្តាយ ជួយណែនាំកូនៗកុំឱ្យបរិភោគនំកញ្ចប់ ប្រហិត ស្ករគ្រប់ប្រភេទ និងភេសជ្ជៈប៉ូវកម្លាំងផ្សេងៗ ដែលធ្វើឱ្យប៉ះពាល់ដល់សុខភាពពួកគាត់ ហើយចូលរួមលើកទឹកចិត្ត និងណែនាំឱ្យមកទទួលទាននូវចំណីអាហារ ណា ដែលមិនប៉ះពាល់ដល់សុខភាពកូនៗ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
